ភ្នំពេញៈ ពាណិជ្ជកម្មទ្វេភាគីកម្ពុជា និងវៀតណាម ក្នុងរយៈពេល ១០ ខែដំបូងឆ្នាំ ២០២២ មានទឹកប្រាក់សរុបជាង ៥ ពាន់លានដុល្លារ កើនជាង ២០ភាគរយ បើធៀបរយៈពេលដូចគ្នាឆ្នាំ ២០២១ ក្នុងនោះជញ្ជីងពាណិជ្ជកម្មកម្ពុជាមានឱនភាពជិត ១,៧ ពាន់លានដុល្លារ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យអគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ចាប់ពីខែមករា-ខែតុលា ឆ្នាំ ២០២២ ការផ្លាស់ប្តូរទំនិញរវាងកម្ពុជា-វៀតណាម មានចំនួនសរុប ៥ ០០១,៨៧លានដុល្លារ កើន ២០,៥ ភាគរយពីចំនួន ៤ ១៤៩,៦៣ លានដុល្លារ ដោយក្នុងនោះការនាំទំនិញពីកម្ពុជាទៅវៀតណាម មានទឹកប្រាក់ ១ ៦៦៤,៤៤ លានដុល្លារ កើន ២,៨ភាគរយ និងការនាំចូលពីវៀតណាម មាន ៣ ៣៣៧,៤៣ លានដុល្លារ កើន ៣១,៩ ភាគរយ។ ចំនួននេះធ្វើឱ្យពាណិជ្ជកម្មកម្ពុជា មានឱនភាព ១,៦៧ ពាន់លានដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់ ភ្នំពេញ ប៉ុស្តិ៍ថា ទោះបីទឹកប្រាក់នាំទំនិញពីវៀតណាមមកកម្ពុជាមានចំនួនច្រើនជាងការនាំចេញពីកម្ពុជាទៅវៀតណាម ប៉ុន្តែវាមិនមែនជាបញ្ហាសម្រាប់កំណើនសេដ្ឋកិច្ចកម្ពុជានោះទេ ព្រោះកម្ពុជា គឺជាប្រទេសកំពុងអភិវឌ្ឍន៍ដែលត្រូវការនាំចូលវត្ថុធាតុដើមជាច្រើនដើម្បីបម្រើឱ្យការផលិត និងកែច្នៃសម្រាប់នាំចេញទៅទីផ្សារអន្តរជាតិ។
លោកបន្តថា ម្យ៉ាងទៀត គម្លាតទឹកប្រាក់នាំចេញនាំចូលទំនិញរវាងប្រទេសទាំង ២ នឹងត្រូវកាត់បន្ថយខ្លះមកវិញនៅអំឡុងចុងឆ្នាំ ដែលជាពេលកម្ពុជាប្រមូលផលកសិកម្មជាច្រើនយកទៅលក់នៅវៀតណាម។
លោកបញ្ជាក់ថា៖ «គម្លាតនេះនឹងត្រូវកាត់បន្ថយខ្លះមកវិញនៅចុងឆ្នាំ ដែលជាពេលផលិតផលកសិកម្មកម្ពុជាជាច្រើនប្រភេទ (ជាពិសេសស្រូវ ដំឡូងមី និងស្វាយចន្ទី) ត្រូវបាននាំទៅលក់នៅប្រទេសវៀតណាម»។
លោកបានបន្តថា កសិផលជាទំនិញចម្បងគេដែលកម្ពុជានាំចេញទៅលក់នៅវៀតណាម ចំណែកផលិតផលដែលវៀតណាមនាំមកកម្ពុជា មានដូចជា ដែក សម្ភារសំណង់ ប្រេង បន្លែ ផ្លែឈើ ជី និងគ្រឿងយន្តកសិកម្ម ជាដើម។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ការកើនឡើងជាបន្តបន្ទាប់នៃទំហំពាណិជ្ជកម្មរវាងប្រទេសមានព្រំដែនជាប់គ្នាទាំង ២ គឺដោយសារតែភាពល្អប្រសើរនៃទំនាក់ទំនងរវាងរដ្ឋាភិបាលប្រទេសទាំង ២ ក៏ដូចជាផ្នែកឯកជន។ ទំហំទឹកប្រាក់នេះនឹងបន្តកើនឡើងខ្ពស់ថែមទៀត ដោយសារកម្ពុជា និងវៀតណាម ជាសមាជិកកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ផងដែរ។
លោកបន្តទៀតថា សម្រាប់ការនាំចេញរបស់កម្ពុជា ដែលមានចំនួនតិចជាងការនាំចូលរបស់វៀតណាម គឺដោយសារប្រទេសវៀតណាម មានកម្លាំងផលិតកម្មច្រើនជាងកម្ពុជា។
លោកថ្លែងថា៖ «ជាលក្ខណៈសត្យានុម័តដោយសារតែវៀតណាមមានប្រជាជនច្រើន និងកម្លាំងផលិតកម្មខ្លាំង ហេតុនេះការនាំចេញរបស់គេមកកម្ពុជា គឺតែងតែមានប្រៀប»។
លោកបន្តថា ទោះយ៉ាងណាតាមរយៈអ្វីដែលកម្ពុជាកំពុងខិតខំ (ការធ្វើពិពិធកម្មទំនិញ) លោករំពឹងថា គម្លាតនេះនឹងត្រូវកាត់បន្ថយជាបណ្តើរៗ។
ក្នុងឆ្នាំ ២០២១ ពាណិជ្ជកម្មទ្វេភាគីកម្ពុជា-វៀតណាម មានទឹកប្រាក់សរុប ៥ ១២៨ លានដុល្លារ កើន ៣១,២ ភាគរយ បើធៀបឆ្នាំ ២០២០ ក្នុងនោះកម្ពុជានាំទៅវៀតណាម ១ ៩៨៥,០៨ លានដុល្លារ កើន ៥៨,៦ ភាគរយ និងវៀតណាមនាំចូលវិញមានចំនួន ៣ ១៤៣,៥៣ លានដុល្លារ កើនឡើង ១៨,៤ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕