ភ្នំពេញៈ ខណៈអេកូទេសចរណ៍ និងទេសចរណ៍សហគមន៍ កំពុងដើរតួនាទីយ៉ាងសំខាន់នៅក្នុងការស្តារវិស័យទេសចរណ៍ឡើងវិញពីវិបត្តិជំងឺកូវីដ ១៩ នារយៈពេលជាង ២ ឆ្នាំកន្លងមកនេះ រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងនូវអនុសាសាន៍គន្លឹះសំខាន់ៗ ៧ ដែលនឹងអាចរួមចំណែកក្នុងការជួយអភិវឌ្ឍវិស័យអេកូទេសចរណ៍ និងទេសចរណ៍សហគមន៍ឱ្យកាន់តែមានប្រសិទ្ធភាព និងស័ក្តិសិទ្ធិភាព ជាពិសេសប្រែក្លាយបញ្ហាប្រឈមឱ្យទៅជាកាលានុវត្តភាព។
ថ្លែងក្នុងពិធីបើកវេទិកាជាតិអេកូទេសចរណ៍លើកទី៣ នៅរាជធានីភ្នំពេញកាលពីថ្ងៃទី ២១ ខែវិច្ឆិកា លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍បានលើកឡើងថា រយៈពេលជាង ២ ឆ្នាំមកនេះ វិបត្តិជំងឺកូវីដ-១៩ បានកែប្រែ និងផ្លាស់ប្ដូរស្ទើរទាំងស្រុងនូវរចនាសម្ព័ន្ធវិស័យទេសចរណ៍ ទាំងនៅក្នុងតំបន់ និងពិភពលោក។
លោកបន្តថា ទោះយ៉ាងណា កម្ពុជាត្រូវបានទទួលស្គាល់ជាលក្ខណៈអន្តរជាតិលើការងារសហគមន៍ និងអេកូទេសចរណ៍ ពិសេសក្នុងក្របខ័ណ្ឌអាស៊ាន តាមរយៈការអនុវត្តគំរូអភិវឌ្ឍន៍សហគមន៍ទេសចរណ៍ក្រោមទម្រង់ភាពជាដៃគូរដ្ឋ-ឯកជន-ប្រជាជន ដើម្បីផ្ដល់សិទ្ធិដល់ប្រជាពលរដ្ឋសហគមន៍ ផ្តល់ប្រយោជន៍អតិបរមាដល់មូលដ្ឋាន កាត់បន្ថយភាពក្រីក្រ និងគោរពតាមគោលការណ៍ចីរភាព និងទទួលខុសត្រូវ ស្របទៅតាមទស្សនទាន «ការអភិរក្សបម្រើដល់ការអភិវឌ្ឍ ការអភិវឌ្ឍបម្រើដល់ការអភិរក្ស» និងស្របទៅតាមគោលការណ៍នៃការបែងចែកផលប្រយោជន៍ប្រកបដោយសមធម៌ (Equitable Profit-Sharing Model)។
លោកថ្លែងថា៖ «ពិតណាស់កម្ពុជាសម្បូរដោយសក្តានុពលធម្មជាតិ និងអេកូទេសចរណ៍នៅទូទាំងប្រទេសរាប់ចាប់ពីតំបន់ឆ្នេរសមុទ្រដែលជាសមាជិកក្លិបឆ្នេរសមុទ្រស្អាតបំផុតលើសកលលោក តំបន់ជួរភ្នំក្រវាញ រួមបញ្ចូលទាំងតំបន់អារ៉ែង បឹងទន្លេសាប និងតំបន់ភូមិភាគឦសានជាដើម។ នៅក្នុងន័យនេះ ការអភិវឌ្ឍជាសហគមន៍ទេសចរណ៍ និងអេកូទេសចរណ៍ដែលមានចរិតយុទ្ធសាស្ត្រ និងនយោបាយ ពិតជាបានរួមចំណែកសំខាន់ក្នុងការអភិវឌ្ឍនៅតាមមូលដ្ឋាន»។
តាមរយៈសារៈសំខាន់របស់អេកូទេសចរណ៍ និងទេសចរណ៍សហគមន៍នេះលោក ថោង ខុន បានលើកឡើងនូវអនុសាសន៍គន្លឹះសំខាន់ៗមួយចំនួននៅក្នុងន័យរួមចំណែកដល់ការអភិវឌ្ឍវិស័យអេកូទេសចរណ៍-ទេសចរណ៍សហគមន៍ប្រកបដោយប្រសិទ្ធភាព។
អនុសាសន៍ទាំងនោះរួមមាន ទី១. ការកំណត់តំបន់អេកូទេសចរណ៍អាទិភាពថ្នាក់ជាតិ, ទី២. ការបញ្ចូលសកម្មភាពទេសចរណ៍ និងអេកូទេសចរណ៍ទៅក្នុងសហគមន៍ដែលមានសក្ដានុពល (ទោះបីស្ថិតក្រោមដែនសមត្ថកិច្ចក្រសួង-ស្ថាប័នណាក៏ដោយ), ទី៣. ការស្ថាបនាផ្លូវតភ្ជាប់ទៅតំបន់សហគមន៍ ការផ្គត់ផ្គង់អគ្គិសនី ទឹកស្អាត ទូរស័ព្ទ អ៊ីនធឺណិត ការគ្រប់គ្រងសំរាម និងបញ្ហាផ្សេងៗ, ទី៤ ស្នើឱ្យដៃគូអភិវឌ្ឍន៍ អង្គការជាតិ និងអន្តរជាតិផ្ដល់ការគាំទ្រផ្នែកបច្ចេកទេស និងហិរញ្ញវត្ថុដល់ក្រសួងទេសចរណ៍ និងគណៈកម្មាធិការជាតិគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍លើការអនុវត្តគម្រោងពាក់ព័ន្ធនឹងអេកូទេសចរណ៍ និងសហគមន៍។
ចំណែក ទី៥ ស្នើវិស័យឯកជនជួយពង្រឹងការគាំទ្រទៅដល់សហគមន៍ ពិសេសការជំរុញការរៀបចំកញ្ចប់ទស្សនកិច្ចទៅតំបន់សហគមន៍ និងប្រើប្រាស់សេវារបស់សហគមន៍, ទី៦ សូមសហគមន៍ទាំងអស់លើកឡើងនូវបញ្ហាប្រឈមសំខាន់ៗ ដើម្បីរួមគ្នាដោះស្រាយ និងទី៧ បញ្ចូលទស្សនទាននៃភាពច្នៃប្រឌិត និងនវានុវត្តភាពក្នុងការអភិវឌ្ឍតំបន់អេកូទេសចរណ៍ស្របតាមយុគសម័យបដិវត្តន៍ឧស្សាហកម្ម ៤.០។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានថ្លែងថា វិស័យកសិកម្មបានរួមចំណែកយ៉ាងសំខាន់សម្រាប់ជំរុញការអភិវឌ្ឍវិស័យទេសចរណ៍តាមរយៈការផ្គត់ផ្គង់ម្ហូបអាហារ និងបរិស្ថាន ជាដើម។
លោកបានថ្លែងថា៖ «ក្រសួងកសិកម្ម រុក្ខាប្រមាញ់ និងនេសាទ នឹងបន្តពង្រឹងសមត្ថភាព ផ្ដល់ការគាំទ្រ និងលើកទឹកចិត្តសហគមន៍នៅទូទាំងប្រទេសឱ្យចូលរួមចំណែកកាន់តែច្រើន និងសកម្មថែមទៀតក្នុងសកម្មភាពអភិវឌ្ឍន៍ កសិ-ទេសចរណ៍ និងទេសចរណ៍ធម្មជាតិ ដោយបំពេញតួនាទីគឺជាកន្លែងទាក់ទាញភ្ញៀវទេសចរឱ្យមកកម្សាន្ត ជាទីតាំងផលិតស្បៀងអាហារ និងផ្តល់សេវាកម្មដល់ទេសចរ ជាប្រភពនាំមកនូវប្រាក់ចំណូលដល់គ្រួសារប្រជាជននៅតាមសហគមន៍ និងជាខែលដ៏រឹងមាំក្នុងការការពារបរិស្ថាន និងធនធានធម្មជាតិ»៕