.jpg)
ស្រូវដែលកសិករប្រមូលបានក្នុងខេត្តបន្ទាយមានជ័យ កាលពីថ្ងៃទី ១៨ ខែវិច្ឆិកា។ រូបថត រដ្ឋបាលខេត្ត
ភ្នំពេញៈ ប្រធានសហព័ន្ធ ស្រូវអង្ករកម្ពុជា (CRF) បានស្វាគមន៍វិធានការទម្លាក់ប្រាក់បន្ថែមរបស់រដ្ឋាភិបាលចំនួន ១០ លានដុល្លារដែលប្រាក់នេះនឹងជួយបង្កើនទុនដល់ម្ចាស់រោងម៉ាស៊ីនកិនស្រូវក្នុងស្រុកឱ្យមានលទ្ធភាពថែមទៀតក្នុងការប្រមូលទិញស្រូវក្នុងតម្លៃសមរម្យពីប្រជាកសិករនៅខេត្តបាត់ដំបង និងបន្ទាយមានជ័យដែលកំពុងប្រមូលផល និងប្រឈមការធ្លាក់ថ្លៃ។
ធនាគារអភវិឌ្ឍន៍ជនបទ និងកសិកម្ម (ARDB) កាលពីថ្ងៃទី ២១ ខែវិច្ឆិកា បានចេញសេចក្តីប្រកាសព័ត៌មានថា រដ្ឋាភិបាលកម្ពុជាដែលមានក្រសួងសេដ្ឋកិច្ច និងហិរញ្ញវត្ថុ ជាសេនាធិការបានគិតគូរយ៉ាងយកចិត្តទុកដាក់ខ្ពស់ និងបានសម្រេចផ្តល់ថវិកាបន្ថែម ១០ លានដុល្លារលើមូលនិធិសម្រាប់ទិញស្រូវចំនួន ៨៣ លានដុល្លារតាមរយៈ ARDB សម្រាប់គាំទ្រដល់ម៉ាស៊ីនកិនស្រូវ និងក្រុមហ៊ុនកែច្នៃនាំចេញអង្ករ ក្នុងការប្រមូលទិញស្រូវពីប្រជាកសិករតាមតម្លៃសមស្របចៀសវាងការទិញទម្លាក់ថ្លៃពីឈ្មួញខិលខូចមួយចំនួន។
ARDB លើកឡើងថា ក្នុងរយៈពេលប៉ុន្មានថ្ងៃនេះតម្លៃស្រូវមានការប្រែប្រួលនៅបណ្តាខេត្តផលិតស្រូវមួយចំនួន ជាពិសេសខេត្តបាត់ដំបង និងខេត្តបន្ទាយមានជ័យ ដែលបណ្តាលមកពីរដូវប្រមូលផលធំ ហើយមានការច្រូតកាត់ព្រមគ្នា ជាហេតុធ្វើឱ្យបរិមាណស្រូវដែលត្រូវលក់មានចំនួនច្រើនក្នុងពេលតែមួយ។
ARDB បានបញ្ជាក់ថា៖ «ការណ៍នេះ ធ្វើឱ្យរោងម៉ាស៊ីនកិនស្រូវពុំអាចប្រមូលទិញស្រូវទាំងអស់នោះបាន ដែលនាំឱ្យតម្លៃស្រូវមានការប្រែប្រួលធ្លាក់ចុះ បើធៀបទៅដើមរដូវ។ ហេតុដូច្នេះ ធនាគារអភិវឌ្ឍន៍ជនបទ និងកសិកម្ម សូមអំពាវនាវឱ្យប្រជាកសិករតាមតំបន់ដែលត្រូវប្រមូលផលស្រូវ សូមដាក់កម្មវិធីច្រូតកាត់ជាមួយរោងម៉ាស៊ីនកិនស្រូវនៅក្នុងតំបន់របស់ខ្លួនដើម្បីចៀសវាងការប្រមូលផលក្នុងពេលតែមួយព្រមគ្នាដែលអាចបណ្តាលឱ្យមានការបង្អាប់ថ្លៃស្រូវ»។
លោក សុង សារ៉ន ប្រធាន CRF បានប្រាប់ភ្នំពេញប៉ុស្តិ៍នៅថ្ងៃទី ២២ ខែវិច្ឆិកា ថា ការបញ្ចេញសាច់ប្រាក់បន្ថែមរបស់រដ្ឋាភិបាលនឹងបើកលទ្ធភាពកាន់តែច្រើនបន្ថែមទៀតដល់សមាជិក CRF ក្នុងការបង្កើនការទិញ និងផ្តល់តម្លៃ សមរម្យដល់ប្រជាកសិករនៅខេត្តប៉ែកខាងលិចដូចជា បាត់ដំបង និងបន្ទាយមានជ័យ ដែលកំពុងប្រមូលផល។
លោកថ្លែងថា៖ «នេះគឺជាថវិកាបន្ថែមលើកញ្ចប់ថវិកាដែលមានស្រាប់ដែលបានបញ្ចេញទៅរោងម៉ាស៊ីនកិនស្រូវ និងសហគមន៍ផលិតស្រូវផ្សេង។ ការបន្ថែមថវិកានេះ គឺដើម្បីជួយសម្រួលទៅដល់ការផលិតស្រូវ និងច្រូតកាត់ស្រូវនៅខេត្តប៉ែកខាងលិច ដូចជាខេត្តបាត់ដំបង បន្ទាយមានជ័យ ដែលកំពុងតែប្រមូលផលស្រូវប្រភេទផ្ការំដួលច្រើន»។
លោកបញ្ជាក់ថា៖ «ការទម្លាក់ថវិកាបន្ថែមរបស់រដ្ឋាភិបាលនឹងជំរុញឱ្យតម្លៃស្រូវនឹងឡើងថ្លៃលឿន។ យើងខ្ញុំប្តេជ្ញាចូលរួមជាមួយរដ្ឋាភិបាលដើម្បីទិញស្រូវមកស្តុកបន្ថែមទៀត និងធានាបានតម្លៃស្រូវសមរម្យដល់បងប្អូនប្រជាពលរដ្ឋនៅប៉ែកខាងលិច»។
យោងតាមលោក សារ៉ន សហព័ន្ធស្រូវអង្ករកម្ពុជា ក៏បានបញ្ជូន និងលើកទឹកចិត្តដល់សមាជិកដែលមានមូលដ្ឋាននៅប៉ែកខាងកើតដូចជា ព្រៃវែង កំពង់ចាម កំពង់ស្ពឺ ភ្នំពេញ កណ្តាល ទៅចុះជួយទិញស្រូវពីបងប្អូនប្រជាពលរដ្ឋនៅប៉ែកខាងលិចដើម្បីជួយសម្រួលដោយសារតែបងប្អូនរោងម៉ាស៊ីនកិនស្រូវនៅប៉ែកខាងលិចរវល់មមាញឹកសម្ងួតមិនទាន់ ឃ្លាំងរបស់ពួកគាត់មានស្តុកទុកច្រើន និងពេញ និងការខ្វះខាតថវិកា។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីយប់ថ្ងៃទី ១៨ ខែវិច្ឆិកា បានសរសេរលើបណ្តាញសង្គមហ្វេសប៊ុកថា៖ «កសិករនៅក្នុងខេត្តទាំង ២ មានចិត្តសប្បាយរីករាយ និងបានសហការលក់ស្រូវទៅតាមតម្លៃដែលបានកំណត់ ហើយមកទល់ពេលនេះរោងម៉ាស៊ីននៅតែបន្តប្រមូលទិញយ៉ាងសស្រាក់សស្រាំ។ ក្រុមការងារនៅបន្តតាមដានយកចិត្តទុកដាក់ដោយមិនឱ្យកសិករយើងបាត់បង់ប្រយោជន៍ដោយគ្មានហេតុផលនោះឡើយ»។
តាមរយៈវីដេអូឃ្លីបដែលបង្ហោះនោះបានបង្ហាញពីសំឡេងកសិករម្នាក់ធ្វើការថ្លែងអំណរគុណដល់រដ្ឋមន្ត្រីក្រសួងកសិកម្ម ព្រមទាំងមន្ត្រីមន្ទីរកសិកម្ម និងអ្នកសារព័ត៌មាន ដែលជួយ និងផ្សព្វផ្សាយពីការត្អូញត្អែររបស់កសិករ។
កសិកររូបនោះបញ្ជាក់ថា៖ «បងប្អូនកសិករកំពុងមមាញឹកយកស្រូវមកលក់នៅសាលាឃុំទ្រាស (ខេត្តបន្ទាយមានជ័យ) បានតម្លៃសមរម្យដូចការរំពឹងទុករបស់ពួកគាត់ពិតមែន។ គោរពអរគុណដល់ឯកឧត្តម និងមន្ទីរក្រសួងកសិកម្មដែលបានធ្វើតាមការសន្យា»៕
