.jpg)
កុងតឺន័រផ្ទុកទំនិញជាច្រើននៅកំពង់ផែស្វយ័តក្រុងព្រះសីហនុ។ ហេង ជីវ័ន
ភ្នំពេញៈ ចំនួនទឹកប្រាក់ពីការផ្លាស់ប្តូរទំនិញរវាងកម្ពុជា និងកាណាដា រយៈពេល ១០ ខែដើមឆ្នាំ ២០២២ មានចំនួនជិត ៩៧៥ លានដុល្លារ កើនជាង ១៨ ភាគរយបើធៀបរយៈពេលដូចគ្នាឆ្នាំ ២០២១ ក្នុងនោះការនាំចេញរបស់កម្ពុជាគ្របដណ្តប់រហូតដល់ជិត ៩៧ ភាគរយនៃចំនួនទឹកប្រាក់សរុប។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យបានឱ្យដឹងថា ទំហំទឹកប្រាក់នៃពាណិជ្ជកម្មរវាងប្រទេសទាំង ២ រយៈពេល ១០ ខែ មានចំនួនសរុប ៩៧៤,៨៣ លានដុល្លារ កើនឡើង ១៨,៥ ភាគរយពីចំនួន ៨២២,៣៩ លានដុល្លារកាលពីរយៈពេល ១០ ខែឆ្នាំ ២០២១។ យោងតាមតារាងខាងលើ គឺកម្ពុជានាំទំនិញទៅប្រទេសកាណាដា ក្នុងទឹកប្រាក់សរុប ៩៤៥,៣១ លានដុល្លារ កើនឡើង ១៩,៧ ភាគរយពីចំនួន ៧៨៩,៩៨ លានដុល្លារ និងការនាំទំនិញពីកាណាដា មកកម្ពុជា មានទឹកប្រាក់ ២៩,៥១ លានដុល្លារ ធ្លាក់ចុះ ៨,៩ ភាគរយពីចំនួន ៣២,៤១ លានដុល្លារ។
សម្រាប់ខែតុលា ឆ្នាំ ២០២២ ពាណិជ្ជកម្មរវាងប្រទេសទាំង ២ មានទឹកប្រាក់ ៧៣,៩២ លានដុល្លារ ធ្លាក់ចុះ ១,៥៧ ភាគរយបើធៀបខែតុលា ឆ្នាំ ២០២១ ដែលមានចំនួន ៧៥,១ លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ ក្នុងថ្ងៃទី ២២ ខែវិច្ឆិកាថា ផ្អែកលើទំនាក់ទំនងល្អរវាងរដ្ឋាភិបាលនៃប្រទេសទាំង ២ ព្រមទាំងប្រភេទនៃផលិតផលកម្ពុជាដែលកំពុងមានតម្រូវការខ្ពស់នៅទីផ្សារប្រទេសកាណាដា គឺចំនួនទឹកប្រាក់ធ្វើពាណិជ្ជកម្មរបស់ប្រទេសទាំង ២ ត្រូវរំពឹងថា នឹងមានភាពវិជ្ជមានកាន់តែខ្លាំងនៅពេលអនាគត ខណៈនាអំឡុងពេលមកចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធដែលកម្ពុជាធ្វើជាម្ចាស់ផ្ទះកាលពីពេលថ្មីនេះៗ ប្រមុខរដ្ឋាភិបាលនៃប្រទេសទាំង ២ ក៏បានសន្យានឹងជំរុញកិច្ចសហប្រតិបត្តិការផ្នែកពាណិជ្ជកម្មផងដែរ។
លោកបានបញ្ជាក់ថា៖ «កាណាដាជាប្រទេសដែលតែងបញ្ជាទិញផលិតផលវាយនភណ្ឌពីប្រទេសកម្ពុជាច្រើន ដូច្នេះនៅពេលស្ថានភាពសេដ្ឋកិច្ចពិភពលោកល្អប្រសើរឡើងវិញ ខ្ញុំគិតថានឹងមានអ្នកវិនិយោគពីកាណាដាជាច្រើនចូលមកបញ្ជាទិញ ឬបើកអាជីវកម្មនៅកម្ពុជា»។
បើតាមលោក លឹម ហេង ក្រៅពីផលិតផលវាយនភណ្ឌ កម្ពុជាក៏បាននាំចេញផលិតផលមួយចំនួនទៀតទៅកាន់ប្រទេសកាណាដា ដែលរួមមាន កង់ គ្រឿងបង្គុំអគ្គិសនីអេឡិចត្រូនិក និងផលិតផលកសិកម្ម ចំណែកទំនិញនាំពីកាណាដា មានដូចជា រថយន្ត គ្រឿងសំណង់ និងគ្រឿងបរិក្ខារប្រើបច្ចេកវិទ្យាទំនើបៗ។
សភាពាណិជ្ជកម្មកម្ពុជាកាលពីថ្ងៃទី ២៧ ខែឧសភា ឆ្នាំ ២០២២ បានបើកការិយាល័យតំណាងរបស់ខ្លួននៅក្នុងទីក្រុងតូរ៉ុនតូ ប្រទេសកាណាដា ដែលការិយាល័យនោះត្រូវប្រើប្រាស់ជាកន្លែងជួបពិភាក្សា និងផ្សព្វផ្សាយពីសក្តានុពលវិនិយោគរបស់កម្ពុជាទៅកាន់វិនិយោគិនដែលមានចំណាប់អារម្មណ៍ចំពោះការបណ្តាក់ទុននៅកម្ពុជា។
នៅក្នុងជំនួនជាមួយលោកនាយករដ្ឋមន្ត្រី ហ៊ុន សែន កាលពីថ្ងៃទី ១២ ខែវិច្ឆិកា លោក Justin Trudeau នាយករដ្ឋមន្ត្រីនៃប្រទេសកាណាដា បានលើកឡើងថា អាស៊ាន និងកាណាដា រួមទាំងកម្ពុជា គឺមានសក្ដានុពលខ្លាំងសម្រាប់កិច្ចសហប្រតិបត្តិការលើវិស័យជាច្រើន។ ចំពោះទំនាក់ទំនងទ្វេភាគីជាមួយកម្ពុជា គឺស្ថិតនៅចំណុចកណ្ដាលនៃកិច្ចសហប្រតិបត្តិការរយៈពេលវែង ពិសេសទំនាក់ទំនងលើវិស័យពាណិជ្ជកម្មការទូត អប់រំ ការប្រែប្រួលអាកាសធាតុជាដើម។
កាលពីឆ្នាំ ២០២១ ទំហំពាណិជ្ជកម្មរវាងប្រទេសកម្ពុជា-កាណាដា មានទឹកប្រាក់សរុប ៩៩៤,៧២ លានដុល្លារកើនឡើង ២៣,៣ ភាគរយបើធៀបនឹងរយៈពេលដូចគ្នាឆ្នាំ ២០២១ ។ ក្នុងនោះកម្ពុជានាំចេញទំនិញទៅកាណាដា មានទឹកប្រាក់ ៩៥៤,៨៣ លានដុល្លារ កើនឡើង ២៧,១ ភាគរយ ខណៈទំនិញដែលកាដាណានាំមកកម្ពុជាមានទឹកប្រាក់ ៣៩,៨៩ លានដុល្លារ ថយចុះ ២៨,២ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
