ភ្នំពេញៈ កម្ពុជាបាននាំចេញផ្លែស្វាយស្រស់ជាង ១៣,៨ ម៉ឺនតោនទៅទីផ្សារអន្តរជាតិ នៅក្នុងរយៈពេល ១០ ខែដើមឆ្នាំ ២០២២ ធ្លាក់ចុះជាង ៣១ ភាគរយបើធៀបរយៈពេលដូចគ្នាឆ្នាំ ២០២១ ក្នុងនោះទីផ្សារវៀតណាម បានស្រូបយកជាង ៥៦ ភាគរយ។ នេះបើយោងតាមក្រសួងកសិកម្ម រុក្ខាប្រមាញ់ និងនេសាទ។
របាយការណ៍ក្រសួងកសិកម្ម បង្ហាញថា ចាប់ពីខែមករា ដល់ខែតុលា ឆ្នាំ ២០២២ ការនាំចេញផ្លែស្វាយស្រស់ទៅលក់នៅទីផ្សារអន្តរជាតិ មានចំនួនសរុប ១៣៨ ៣៧៧,៥៥ តោន ថយចុះ ៣១,៥៤ ភាគរយបើធៀបនឹងរយៈពេលដូចគ្នាឆ្នាំ ២០២១ ។ ទីផ្សារវៀតណាម បានស្រូបយកផលិតផលផ្លែស្វាយស្រស់ច្រើនជាងគេ ដោយមានចំនួន ៧៨ ៥៦៦,២៣ តោន, ថៃ ៣២ ១៨១,១២ តោន, ចិន ២៧ ៤៦៧,៨៨ តោន, កូរ៉េ ១៦០,០៨ តោន និងទីក្រុងហុងកុង ២,២៤ តោន។
លោក ហ៊ុន ឡាក់ អគ្គនាយកក្រុមហ៊ុន រីចហ្វាម អេស៊ា ឯ.ក ដែលជាក្រុមហ៊ុនដាំដុះ និងនាំចេញផ្លែស្វាយ បានប្រាប់ភ្នំពេញប៉ុស្តិ៍កាលពីថ្ងៃទី ២២ ខែវិច្ឆិកា ថា ការនាំចេញផ្លែស្វាយស្រស់ធ្លាក់ចុះនៅពេលនេះ គឺបណ្តាលមកពីកត្តាមួយចំនួនដូចជា អាកាសធាតុមានភ្លៀងធ្លាក់ច្រើន,ការកើនឡើងតម្លៃធាតុចូលកសិកម្ម (ជី និងថ្នាំកសិកម្ម), តម្លៃទីផ្សារប្រែប្រួលខ្លាំង ព្រមទាំងឧបសគ្គមួយចំនួនដែលកើនឡើងចំពោះទីផ្សារប្រទេសចិន (ការរឹតបន្តឹងសកម្មភាពឆ្លងព្រំដែន ដើម្បីទប់ស្កាត់ការឆ្លងរាលដាលជំងឺកូវីដ ១៩ ។
លោកបានប្រាប់ទៀតថា សម្រាប់បញ្ហាតម្លៃដែលប្រែប្រួលខ្លាំងនោះ គឺតម្លៃផ្លែស្វាយស្រស់ឆ្នាំនេះកើនឡើងខ្ពស់ និងប្រែប្រួលជាបន្តបន្ទាប់ ជាក់ស្តែងដោយសារផលឆ្នាំនេះចុះទាប ធ្វើឱ្យតម្លៃផ្លែស្វាយស្រស់ (សម្រាប់នាំចេញ) កាលពីអំឡុងដើមខែតុលា រហូតដល់ដើមខែវិច្ឆិកា ដែលកាលពីឆ្នាំមុនតម្លៃប្រហែល ៥០០ រៀលក្នុង ១ គីឡូក្រាម បានហក់ឡើងដល់ពី ២ ២០០-២ ៥០០ រៀល ខណៈពេលនេះបានធ្លាក់មកនៅចន្លោះពី ១ ២០០-១ ៥០០ រៀល។
លោកថ្លែងថា៖ «ដោយសារឆ្នាំនេះទិន្នផលផ្លែស្វាយកម្ពុជាធ្លាក់ចុះ ហើយតម្លៃមិនមានស្ថិរភាព និងការនាំចេញទៅប្រទេសចិនជួបបញ្ហាទៀតនោះ វាធ្វើឱ្យការនាំចេញធ្លាក់ចុះគួរឱ្យកត់សម្គាល់»។
លោកលើកឡើងទៀតថាដើម្បីធ្វើឱ្យការដាំដុះ និងនាំចេញផ្លែស្វាយស្រស់មាននិរន្តរភាព គឺត្រូវទាមទារឱ្យមានការរៀបចំគោលនយោបាយរួមមួយដែលមានការចូលរួមពីអ្នកពាក់ព័ន្ធទាំងអស់ ដូចជា ប្រជាកសិករ អ្នកវិនិយោគ អ្នកកែច្នៃ អ្នកនាំចេញ អ្នកដឹកជញ្ជូន និងរដ្ឋាភិបាលផងដែរ។
ទាក់ទងនឹងការលើកឡើងរបស់រដ្ឋមន្ត្រីក្រសួងកសិកម្ម លោក ឌិត ទីណា កាលពីថ្ងៃទី ១៤ ស្តីពី «ការប្រើប្រាស់ថាមពលអគ្គិសនីសម្រាប់វិស័យកសិកម្ម» ដោយរដ្ឋាភិបាលបានបញ្ចុះមកនៅត្រឹម ៤៨០ រៀលក្នុង ១ គីឡូវ៉ាត់សម្រាប់ការប្រើប្រាស់ចន្លោះពីម៉ោង ៩ យប់ ដល់ម៉ោង ៧ ព្រឹក លោក ហ៊ុន ឡាក់ អះអាងថា គោលនយោយបាយរបស់រដ្ឋាភិបាលក្នុងការបន្ទាបតម្លៃដើមផលិត តាមរយៈការប្រើប្រាស់អគ្គិសនីតម្លៃទាបនេះនឹងជួយធ្វើឱ្យថ្លៃដើមផលិតចុះកាន់តែទាប ដើម្បីលើកកម្ពស់សមត្ថភាពប្រកួតប្រជែងលើទីផ្សារអន្តរជាតិ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ថា ចំណុចសំខាន់មួយនៃការធ្លាក់ចុះបរិមាណនាំចេញផ្លែស្វាយស្រស់ គឺដោយសារការរឹតបន្តឹងចរាចរណ៍ទំនិញរបស់ប្រទេសចិន ខណៈកម្ពុជាតែងដាក់ក្តីរំពឹងខ្ពស់ទៅលើទីផ្សារប្រទេសចិន។ លោកបន្តថា អ្វីៗនឹងមានភាពល្អប្រសើរឡើងវិញ នៅពេលប្រទេសចិនបើកទ្វារឡើងវិញ ស្របពេលដែលផលិតផលកម្ពុជានឹងមានវត្តមានកាន់តែច្រើនលើទីផ្សារអន្តរជាតិ តាមរយៈកិច្ចព្រមព្រៀងដែលចូលជាធរមានរួចហើយដូចជា ព្រមព្រៀងពាណិជ្ជកម្មសេរីកម្ពុជា-ចិន (CCFTA) និងកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ព្រមទាំងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) ដែលនឹងចូលជាធរមាននៅខែធ្នូខាងមុខ។
លោកបញ្ជាក់ថា៖ «នៅពេលសេដ្ឋកិច្ចពិភពលោកមានស្ថិរភាពល្អ ជាពិសេសប្រទេសចិនបើកទូលាយឡើងវិញ ខ្ញុំគិតថាការនាំចេញផ្លែស្វាយស្រស់នឹងកើនឡើងវិញជាមិនខាន»។
បើតាមក្រសួងកសិកម្ម ក្រៅពីផ្លែស្វាយស្រស់ កម្ពុជាក៏បាននាំចេញតំណាប់ស្វាយចំនួន ១៥ ៨១៦,៦៩ តោនផងដែរ ដោយកើនឡើង ១,០៦ ភាគរយធៀបរយៈពេលដូចគ្នាឆ្នាំ ២០២១ ក្នុងនោះការនាំចេញទៅប្រទេសចិន មានចំនួន ១៣ ៨៥១,៩៥ តោន, ថៃ ៩៦៨,២១ តោន, ហ្វីលីពីន ៥៧១,៧៧ តោន, វៀតណាម ២០០ តោន, ជប៉ុន ១១១,៥៤ តោន, រុស្ស៊ី ៧១,០៥ តោន, អ៊ីតាលី ២៦,៤៦ តោន, ចក្រភពអង់គ្លេស ៩,៧៨ តោន, កូរ៉េ ៥,៨៩ តោន, អាមេរិក ០,០៣ តោន និងប្រទេសអូស្ត្រាលី ០,០១ តោន។
កាលពីឆ្នាំ ២០២១ កម្ពុជាបាននាំចេញផ្លែស្វាយស្រស់ចំនួន ២៤២ ៤៨៣,៧៦ តោនកើនឡើង ១៤៨,៣៨ ភាគរយបើធៀបនឹងរយៈពេលដូចគ្នាឆ្នាំ ២០២០ ក្នុងនោះនាំទៅប្រទេសវៀតណាមចំនួន ១៩៩ ០៧៧,៣៨ តោន,ថៃ ៣៨ ៤១៩,២៨ តោន,ចិន ៤ ៧៧១ តោន,កូរ៉េ ១៤៩,១១ តោន,ទីក្រុងហុងកុង ៥០,៧៨ តោន,សិង្ហបុរី ១៦,២០ តោននិងកូវ៉ែត ០,០១ តោន។ដោយឡែកការនាំចេញតំណាប់ស្វាយមានចំនួន ១៧ ៨៧៩,៨២ តោនកើនឡើង ១៧៩,៣០ ភាគរយ នាំទៅប្រទេសចិន ១៤ ២៤៦,២០ តោន, ថៃ ១៥០១,១៣ តោន,ហ្វីលីពីន ៩៧៥,០៨ តោន,វៀតណាម ៥៥៩,៣០ តោន,ជប៉ុន ៥២៣,៧០ តោន,រុស្ស៊ី ២៣ តោន,ចក្រភពអង់គ្លេស ២១,១៤ តោន,កូរ៉េ ១៨,៧០ តោន,សហរដ្ឋអាមេរិក ៨,៥៦ តោន,កោះតៃវ៉ាន់ ៣ តោន,និងកាហ្សាក់ស្ថាន ០,០៥ តោន៕