.jpg)
សន្និសីទម៉ាក្រូ សេដ្ឋកិច្ចប្រចាំឆ្នាំលើកទី៩ កាលពីថ្ងៃទី ២៤ ខែវិច្ឆិកា។ រូបថត សហការី
ភ្នំពេញៈ និន្នាការនៃការប្រើប្រាស់បច្ចេកវិទ្យានឹងបន្តកើនឡើងឥតឈប់ដែលនឹងនាំមកនូវគុណប្រយោជន៍ជាច្រើនទៅដល់សេដ្ឋកិច្ចជាតិ តាមរយៈការបង្កើនផលិតភាព ការកាត់បន្ថយថ្លៃដើម និងបញ្ហាអវិជ្ជមានជាច្រើនទៀតក្នុងប្រព័ន្ធហិរញ្ញវត្ថុកម្ពុជា។ នេះបើតាមលោកស្រី ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា។
ក្នុងពិធីបើកសន្និសីទម៉ាក្រូ សេដ្ឋកិច្ចប្រចាំឆ្នាំលើកទី ៩ ស្តីពី «ដំណើរឆ្ពោះទៅកាន់ការស្ដារឡើងវិញ និងភាពធន់ក្រោយកូវីដ ១៩» ដែលរៀបចំដោយធនាគារជាតិនៃកម្ពុជា និងអង្គការកម្មវិធីអភិវឌ្ឍន៍សហប្រជាជាតិ ( UNDP) នៅរាជធានីភ្នំពេញ កាលពីថ្ងៃទី ២៤ វិច្ឆិកា លោកស្រី ជា សិរី បានលើកឡើងថា បន្ទាប់ពីរយៈពេលជាង ២ ឆ្នាំនៃការរីករាលដាលជំងឺកូវីដ នៅពេលនេះការឆ្លងរាលដាលកូវីដ ១៩ នៅកម្ពុជាមានកម្រិតតិចតួចបំផុត និងមិនមានអ្វីគួរឱ្យបារម្ភទៀតទេ ដែលនេះបានអនុញ្ញាតឱ្យសកម្មភាពសេដ្ឋកិច្ចក្នុងវិស័យចម្បងៗបន្តងើបឡើងវិញជាលំដាប់។
ក្នុងន័យនេះផែនការនៃការស្តារសេដ្ឋកិច្ចឡើងវិញ និងគោលនយោបាយពាក់ព័ន្ធគួរត្រូវបានសិក្សា និងពិភាក្សាឱ្យបានស៊ីជម្រៅដើម្បីជំរុញកំណើនសេដ្ឋកិច្ច។លោកស្រីបានបន្ថែមថា ក្នុងចំណោមធាតុផ្សំដែលនឹងចូលរួមចំណែកជំរុញកំណើនសេដ្ឋកិច្ចនោះ «ឌីជីថលូបនីយកម្ម» គឺជាចំណុចសំខាន់មួយដែលកម្ពុជាកំពុងយកចិត្តទុកដាក់ខ្លាំង ខណៈកន្លងមកគេសង្កេតឃើញថា របៀបរបបរស់នៅក្នុងសង្គម និងការបម្រើការងារនៅតាមស្ថាប័ននានាមានការផ្លាស់ប្តូរយ៉ាងច្រើន ដោយប្ដូរទៅរកការប្រើប្រាស់ប្រព័ន្ធអនឡាញ។
លោកស្រីថ្លែងថា៖ «និន្នាការនៃការប្រើប្រាស់បច្ចេកវិទ្យានឹងបន្តកើនឡើងឥតឈប់ ដែលនឹងនាំមកនូវគុណប្រយោជន៍ជាច្រើនដល់សេដ្ឋកិច្ចជាតិ តាមរយៈការបង្កើនផលិតភាព និងអាចរួមចំណែកកាត់បន្ថយថ្លៃដើម និងបញ្ហាអតិផរណា ដែលយើងបាននិងកំពុងជួបប្រទះនាពេលបច្ចុប្បន្ន»។
លោកស្រីបន្តថា៖ «ក្នុងន័យនេះ ខ្ញុំសូមគូសបញ្ជាក់ថា ការធ្វើទំនើបកម្មប្រព័ន្ធធនាគារនារយៈពេលកន្លងមកនេះ ពិសេសប្រព័ន្ធទូទាត់បានរួមចំណែកដល់ការទ្រទ្រង់សកម្មភាពអាជីវកម្មខ្នាតតូច និងមធ្យមក្នុងអំឡុងវិបត្តិកូវីដ ១៩ និងបានទប់ស្កាត់ការឆ្លងរាលដាលនៃជំងឺដោយបានជួយកាត់បន្ថយការប៉ះពាល់ផ្ទាល់ កាត់បន្ថយការធ្វើដំណើរមិនចាំបាច់ និងរក្សានូវគម្លាតសង្គមជាដើម ស្របពេលដែលទំនើបកម្មសេវាហិរញ្ញវត្ថុ បានលើកកម្ពស់បរិយាប័ន្នហិរញ្ញវត្ថុ ឬការប្រើប្រាស់សេវាហិរញ្ញវត្ថុផ្លូវការនៅតាមតំបន់ជនបទឱ្យកាន់តែប្រសើរផងដែរ»។
ទោះយ៉ាងណា លោកស្រីក៏លើកឡើងថា ផលអវិជ្ជមាននៃឌីជីថលូបនីយកម្ម មិនគួរត្រូវបានមើលរំលងនោះទេ ព្រោះ ឌីជីថលូបនីយកម្ម បានផ្ដល់លទ្ធភាពដល់ប្រជាជនរស់នៅតាមតំបន់ដាច់ស្រយាលអាចទទួលបាននូវសេវាកម្មចាំបាច់ផ្សេងៗរួមទាំងសេវាហិរញ្ញវត្ថុ ដែលពួកគាត់អាចនឹងមិនបានទទួលប្រសិនបើគ្មានទំនើបកម្មផ្នែកបច្ចេកវិទ្យា ប៉ុន្តែឌីជីថលូបនីយកម្មក៏ទាមទារកត្តាជាមូលដ្ឋានមួយចំនួនផងដែរ គឺលទ្ធភាពក្នុងការប្រើឧបករណ៍អេឡិចត្រូនិក និងសេវាអ៊ីនធឺណិតមានតម្លៃសមរម្យ បើពុំដូចនោះទេឌីជីថលូបនីយកម្ម អាចបង្កឱ្យមានវិសមភាពសង្គម។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់ភ្នំពេញប៉ុស្តិ៍នៅថ្ងៃទី ២៤ ខែវិច្ឆិកា ថា វត្តមានរបស់កូវីដ ១៩ បានធ្វើឱ្យការប្រើប្រាស់បច្ចេកវិទ្យានៅកម្ពុជាមានដំណើរការទៅមុខកាន់តែលឿន និងកំពុងចូលរួមចំណែកយ៉ាងច្រើនក្នុងការជួយជំរុញកំណើនសេដ្ឋកិច្ច។
លោកបានបញ្ជាក់ថា៖ «ការប្រើប្រាស់ប្រព័ន្ធឌីជីថលនេះក៏ជួយឱ្យរដ្ឋាភិបាលអាចធ្វើការគ្រប់គ្រងចរាចរណ៍សាច់ប្រាក់បានកាន់តែងាយស្រួល និងច្បាស់លាស់។ វាក៏ជួយឱ្យធនាគារជាតិងាយស្រួលរៀបចំគោលនយោបាយហិរញ្ញវត្ថុ ឱ្យបានត្រឹមត្រូវ និងជួយលើកកម្ពស់ការប្រើប្រាស់ប្រាក់រៀលក្នុងចរន្តសេដ្ឋកិច្ចកាន់តែច្រើនផងដែរ»៕
