ភ្នំពេញៈ អ្នកចិញ្ចឹមជ្រូកក្នុងស្រុកបានស្នើឱ្យរដ្ឋាភិបាលជួយអន្តរាគមន៍ ខណៈតម្លៃជ្រូករស់ ពេលនេះធ្លាក់ចុះយ៉ាងគំហុក ហើយចំនួនអ្នកចិញ្ចឹមជ្រូកដែលបោះបង់មុខរបរនេះក៏មានកាន់តែច្រើនដែរ បន្ទាប់ពីមិនមានប្រាក់បន្តខាតបង់ ពិសេសអ្នកចិញ្ចឹមខ្នាតតូចៗដែលមាន ដើមទុនតិចតួច។
បើយោងតាមសមាគមអ្នកចិញ្ចឹមសត្វកម្ពុជា ផ្សព្វផ្សាយកាលពីព្រឹកថ្ងៃទី ២៨ ខែវិច្ឆិកា គឺតម្លៃជ្រូករស់ (លក់មុខកសិដ្ឋាន) សប្តាហ៍ទី ៤៩ (សប្តាហ៍នេះ) ឆ្នាំ ២០២២ គឺនៅភ្នំពេញកណ្តាល ជ្រូករស់មានតម្លៃ ៧ ៥០០ រៀលក្នុង ១ គីឡូក្រាម, តំបន់និរតី មានតម្លៃ ៧ ២០០ រៀល, តំបន់បស្ចិម មានតម្លៃ ៧ ៥០០ រៀល, តំបន់ពាយព្យ ៦ ៨០០ រៀល, តំបន់ឦសាន ៧ ០០០ រៀលនិងតំបន់អាគ្នេយ៍ មានតម្លៃ ៧ ២០០ រៀល។
ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ បានប្រាប់ភ្នំពេញប៉ុស្តិ៍នៅថ្ងៃទី២៨ ខែវិច្ឆិកាថា តម្លៃជ្រូករស់ បានធ្លាក់ចុះយ៉ាងគំហុកនៅក្នុងរយៈពេលប៉ុន្មានខែចុងក្រោយនេះ គឺធ្លាក់ចុះប្រហែល ៥០ ភាគរយបើធៀបរយៈពេលដូចគ្នាឆ្នាំមុន។ តម្លៃជ្រូករស់ធ្លាក់ចុះនេះ គឺអាចមកពីមូលហេតុចម្បងៗ ចំនួន ២ គឺទី១ ដោយសារកំណើននៃការចិញ្ចឹមក្នុងស្រុកកាលពីឆ្នាំមុន ដែលធ្វើឱ្យមានជ្រូករស់ច្រើនកំពុងនៅក្នុងកសិដ្ឋានចិញ្ចឹម និងចំណុចទី ២ ដែលជាចំណុចសំខាន់នោះ គឺការកើនឡើងការនាំចូលសាច់ជ្រូកបង្កកពីក្រៅប្រទេស (ប្រទេសឆ្ងាយៗ) ដោយឆ្លងកាត់តាមប្រទេសជិតខាង។
លោកបន្ថែមថា ភាគច្រើននៃផលិតផលសាច់បង្កក ដែលនាំចូល គឺរួមមាន គ្រឿងក្នុង ជើង និងក្បាល ដែលផលិតផល ទាំងអស់នេះនៅប្រទេសរីកចម្រើនគេបោះចោល។
លោកបានថ្លែងថា៖ «អ្វីដែលជាឧបសគ្គសម្រាប់អ្នកចិញ្ចឹមជ្រូកនៅកម្ពុជាពេលនេះគឺការនាំចូលយ៉ាងច្រើននៃបរិមាណសាច់ជ្រូកបង្កក។ នេះជាបញ្ហាធ្ងន់ធ្ងរមួយដែលប៉ះពាល់ដល់អ្នកចិញ្ចឹមក្នុងស្រុក ដោយសាច់បង្កកទាំងនោះមានតម្លៃទាប គឺប្រមាណ ៩ ០០០ រៀលក្នុង ១ គីឡូក្រាមតែប៉ុណ្ណោះ»។
លោកបញ្ជាក់ថា៖ «ក្នុងនាមអ្នកចិញ្ចឹមជ្រូក ក៏ដូចជាសមាគមអ្នកចិញ្ចឹមសត្វកម្ពុជា ខ្ញុំស្នើឱ្យរដ្ឋាភិបាលមេត្តាជួយអន្តរាគមន៍ដើម្បីធ្វើឱ្យវិស័យចិញ្ចឹមសត្វនៅកម្ពុជាអាចបន្តជីវិតទៅមុខទៀត ព្រោះបើស្ថានភាពដូចរាល់ថ្ងៃ គឺការចិញ្ចឹមទាំងអស់នឹងត្រូវបញ្ចប់។ ជាក់ស្តែងអ្នកចិញ្ចឹមជ្រូកនៅពេលលក់ជ្រូកគឺសងការប្រាក់កម្ចីមិនរួចផង»។
លោកបន្ថែមថា៖ «ក្នុងនាមអ្នកចិញ្ចឹមក្នុងស្រុកយើងពិតជាចង់ឱ្យកម្ពុជាអាចធានាសន្តិសុខស្បៀងដោយខ្លួនឯងបាន ១០០ ភាគរយ និងឈានដល់ការនាំចេញនៅពេលអនាគត»។
លោកប្រាប់ទៀតថា អ្វីដែលចោទក្នុងពេលនេះគឺអ្នកចិញ្ចឹមជ្រូកខ្នាតតូច ដែលជាកសិករមានជ្រូកចន្លោះពី ២០ ៣០០ ក្បាល គឺពួកគាត់មិនមានថវិកាសម្រាប់ទ្រទ្រង់ ខណៈកសិដ្ឋានធំៗអាចនៅមានធនធានខ្លះសម្រាប់បន្តដំណើរការទោះជាខាតបង់ខ្លាំងក៏ដោយ។
ទាក់ទងនឹងទីផ្សារសាច់ជ្រូកដាក់លក់នៅលើទីផ្សារ លោក ស្រ៊ុន ពៅ បានប្រាប់ថា តម្លៃមិនបានធ្លាក់ចុះទេ ព្រោះតម្លៃផលិតផលដូចជា ជើង និងគ្រឿងក្នុងត្រូវបានលក់ក្នុងតម្លៃទាប ដើម្បីទប់ទល់ទៅនឹងតម្លៃផលិតផលបង្កក។
លោក សំ ធារិទ្ធ អ្នកគ្រប់គ្រងកសិដ្ឋានចិញ្ចឹមជ្រូក ចន ហេង នៅកៀនស្វាយ ខេត្តកណ្ដាល បាននិយាយថា តម្លៃជ្រូករស់រយៈពេល ៤-៥ ខែចុងក្រោយនេះ បានធ្លាក់ដល់កម្រិតទាបដែលធ្វើឱ្យអ្នកចិញ្ចឹម ពិសេសអ្នកចិញ្ចឹមខ្នាតតូចត្រូវខាតបង់ធ្ងន់ធ្ងរ និងបោះបង់មុខរបរនេះចោលតែម្តង។ ការធ្លាក់ចុះតម្លៃជ្រូក គឺបណ្តាលមកពីការនាំចូលសាច់បង្កកដែលមានបរិមាណច្រើនរៀងរាល់ថ្ងៃ។ លោកបន្តថា ការនាំចូលសាច់បង្កកកំពុងបង្កើនសម្ពាធកាន់តែធ្ងន់ដល់អ្នកចិញ្ចឹមក្នុងស្រុក។
លោកបន្ថែមថា នៅពេលនេះជ្រូករស់អាចលក់បានក្នុងរង្វង់ ៧ ០០០ រៀល ក្នុង ១ គីឡូក្រាម ខណៈថ្លៃដើមផលិតកម្មគឺស្ថិតចន្លោះពី ៩ ០០០-១០ ០០០ រៀល ទើបអាចរួចខ្លួន។ កាលពីឆ្នាំមុនតម្លៃជ្រូករស់នៅចន្លោះពី ១១ ០០០-១៥ ០០០ រៀល ក្នុង ១ គីឡូក្រាម។
លោកអះអាងថា៖ «ជាការចាំបាច់ណាស់ក្នុងដំណាក់កាលនេះគឺពួកយើងត្រូវការការគាំទ្រពីរដ្ឋាភិបាល ដើម្បីធ្វើឱ្យតម្លៃជ្រូករស់កើនឡើងវិញ ពីព្រោះបច្ចុប្បន្នមានអ្នកចិញ្ចឹមជ្រូកជាច្រើនត្រូវវ័ណ្ឌកជាប់បំណុលគេ ដោយសារការចិញ្ចឹមជ្រូក»។
សម្រាប់ការនាំចូលជ្រូករស់ ឬសាច់ជ្រូកពីប្រទេសជិតខាងមកកម្ពុជាពេលនេះ គឺមិនមានទៀតទេ ព្រោះតម្លៃនៅប្រទេសជិតខាងខ្ពស់ជាងកម្ពុជា។ នេះបើតាមលោក ធារិទ្ធ៕