ភ្នំពេញៈ កម្ពុជា​នឹង​ដឹកនាំ​ប្រតិភូ​​អន្តរជាតិ​ប្រមាណ​ជាង ១២០​ នាក់​ ដែល​មក​ចូលរួម​ «​សន្និបាត​ក្លិប​ឆ្នេរ​សមុទ្រ​ដែល​ស្អាត​ជាងគេ​លើស​កល​​លោក​» នៅ​ខែធ្នូ​ខាងមុខ ទៅ​ទស្សន​កិច្ច​នៅ​គោលដៅ​ទេសចរណ៍​តំបន់ឆ្នេរ​កោះ និង​សហគមន៍​អេកូ​ទេសចរណ៍​សំខាន់​មួយចំនួន ដើម្បី​បង្ហាញ​ពី​គោលដៅ​ទេសចរណ៍​កម្រិត​ខ្ពស់​នៅ​កម្ពុជា និង​ជាការ​ផ្សព្វផ្សាយ​ទៅកាន់​ពិភពលោក​ពី​សក្តានុពល​នៃ​វិស័យ​ទេសចរណ៍​កម្ពុជា​។​

​លោក ថោង ខុន រដ្ឋមន្ត្រីក្រសួង​ទេសចរណ៍​បានលើកឡើង​ក្នុង​កិច្ចប្រជុំ​ត្រៀម​រៀបចំ «​សន្និបាត​ក្លិប​ឆ្នេរសមុទ្រ​ដែល​ស្អាត​ជាងគេ​នៅលើ​ពិភពលោក និង​ពិធីបុណ្យ​សមុទ្រ​លើក​ទី ​៩ ជុំ​ទី ​៣ នៅ​ខេត្ត​ព្រះសីហនុ​» កាលពី​ថ្ងៃទី​ ២៨ ខែវិច្ឆិកា ឆ្នាំ ​២០២២​។ លោក​ថា បន្ទាប់​ពី​ស្ថានភាព​ការរីក​រាលដាល​ជំងឺ​​កូ​វីដ ​១៩ នៅ​កម្ពុ​ជាមាន​ភាព​ធូរស្រាល ក្រសួងទេសចរណ៍​បាន​ខិតខំ​យ៉ាងខ្លាំង​ក្នុងការ​ផ្សព្វផ្សាយ និង​ទាក់ទាញ​ឱ្យ​ភ្ញៀវ​​ទេសចរ​បរទេស​ចូលមក​ទស្សនា​កម្ពុជា ពិសេស​នៅតាម​ទីតាំង​សំខាន់ៗ​។​

​លោក​បាន​ថ្លែងថា​៖ «​ក្នុង​ដំណាក់​​កាល​ស្ដារ​វិស័យ​ទេសចរណ៍​ក្រោយ​វិបត្តិ​ជំងឺ​កូ​វីដ​ ១៩ គឺ​មានតែ​គោលដៅ​ឆ្នេរសមុទ្រ កោះ និង​សហគមន៍​អេកូ​​ទេសចរណ៍​នេះ​ទេ ដែល​ដើរតួ​សំខាន់​ក្នុងការ​ទាក់ទាញ និង​ទទួលភ្ញៀវ​ទេសចរ​បាន​ច្រើន​»​។​

​ទីប្រឹក្សា​សមាគម​ទីភ្នាក់ងារ​ទេស​​ចរណ៍​កម្ពុជា លោក ហូ វណ្ឌី បាន​ប្រាប់​ ភ្នំពេញ​ ប៉ុស្តិ៍​ ក្នុង​ថ្ងៃទី ២៩ ខែ​​វិច្ឆិកា​ថា ការនាំ​ថ្នាក់ដឹកនាំ និង​ប្រតិបត្តិ​ករ​ក្នុង​វិស័យ​ទេសចរណ៍​បរទេស​ឱ្យទៅ​ទស្សនា​នៅ​ទីតាំង​ទេសចរណ៍​ដែលមាន​សក្តានុពល​ដោយផ្ទាល់ នឹង​ផ្តល់​ផល​វិជ្ជមាន​ច្រើន​សម្រាប់​ការផ្សព្វផ្សាយ​។​

​លោក​និយាយថា​៖ «​នៅក្នុង​ខែធ្នូ​ខាងមុខ ខេត្ត​ព្រះសីហនុ​នឹង​ធ្វើជា​ម្ចាស់ផ្ទះ​រៀបចំ​បុណ្យ​សមុទ្រ និង​សន្និបាត​ក្លិប​ឆ្នេរសមុទ្រ​ដែល​ស្អាត​ជាងគេ​លើ​សកលលោក ដែលជា​ឱកាស​សម្រាប់​កម្ពុជា​ក្នុងការ​ផ្សព្វ​​ផ្សាយ​ពី​វិស័យ​ទេសចរណ៍​ដ៏​ស្រស់​ត្រកាល និង​សម្បូរបែប​របស់​កម្ពុជា​ទៅកាន់​ពិភពលោក​។ បច្ចុប្បន្ន​តំបន់ឆ្នេរ និង​កោះ​ក្នុង​ខេត្ត​ព្រះសីហនុ ក៏ត្រូវ​បានរៀបចំ​យ៉ាង​ស្អាត​ដើម្បី​ត្រៀម​ទទួលភ្ញៀវ​គ្រប់​ជាតិ​សាសន៍​»​។​

​ក្រៅពី​តំបន់ឆ្នេរ​កោះ នៅក្នុង​ក្រុង​​ព្រះសីហនុ​ក៏មាន​កន្លែង​កម្សាន្ត សំណង់​អគារ និង​មជ្ឈមណ្ឌល​ពាណិជ្ជកម្ម​ចម្រុះ​ជាច្រើន​ផងដែរ​។ នេះ​បើតាម​លោក វណ្ឌី​។​

​ប្រធាន​នាយកដ្ឋាន​ជំរុញ​ផលិត​ផល​ទេសចរណ៍​នៃ​ក្រសួងទេសចរណ៍ លោក ជុក ជំនោរ បានឱ្យដឹងថា គោលដៅ​ដែល​ក្រសួងទេសចរណ៍​គ្រោង​នឹង​រៀបចំ​ទស្សនកិច្ច​ជូន​ប្រតិភូ​អន្តរជាតិ​នៅពេល​ខាងមុខ មាន​ដូច​ជា កោះរ៉ុង កោះ​ឋានសួគ៌ កោះ​សង្សារ កោះក្របី កោះ​ឫស្សី សហគមន៍​អេកូ​ទេសចរណ៍​ពាម​ក្រសោប នៅ​ខេត្ត​កោះកុង ក៏ដូចជា​ឆ្នេរសមុទ្រ​នានា​នៅ​ខេត្ត​ព្រះសីហនុ​។​

​បើ​យោងតាម​លោក ជុក ជំនោរ ប្រតិភូ​បរទេស​ដែល​បាន​បញ្ជាក់ថា នឹងចូលរួម​ក្នុង​សន្និបាត​ក្លិប​ឆ្នេរ​​សមុទ្រ​ដែល​ស្អាត​ជាងគេ​លើស​កល​​លោក​នេះ គឺមាន​មកពី​ប្រទេស​នានា​ដូចជា វៀតណាម ថៃ ចិន ជប៉ុន កូរ៉េខាងត្បូង ហ្វីលីពីន អ៊ីស្រា​អែល បារាំង អេ​ស្ប៉ា​ញ ព័រ​ទុយ​ហ្គា​ល់ កាណាដា ប្រេ​ស៊ី​ល ម៉ា​រ៉ុ​ក កូត​ឌី​វ័រ ម៉ូ​សំ​ប៊ិក សេ​ណេ​ហ្កា​ល់ អង់​ហ្គោ​ឡា និង​ប្រទេស​ក្នុង​តំបន់​សមុទ្រ​ការី​បង់ (Caribbean Sea)​។​

​យោងតាម​របាយការណ៍​ពី​ក្រសួង​ទេសចរណ៍​ក្នុង​រយៈពេល ​៩ ​ខែ ដើមឆ្នាំ​ ២០២២ នេះ ប្រទេស​កម្ពុជា​ទទួលបាន​ភ្ញៀវទេសចរ​អន្តរជាតិ​សរុប ១ ២៦៥ ៧៧២​ នាក់ កើនឡើង ៨៦១,៣​ ភាគ​រយ​បើ​ធៀប​រយៈពេល​ដូចគ្នា​ឆ្នាំ​ ២០២១ និង​ថយចុះ ៨៩,៤ ​ភាគរយ​បើ​ធៀប​រយៈពេល​ដូចគ្នា​ឆ្នាំ ​២០២០​។ ក្នុងនោះ​ភ្ញៀវ​តាមផ្លូវ​អាកាស ចំនួន ៤៦៨ ៨៨៩ នាក់ កើន ឡើង ៦៤៣,៧​ ភាគរយ និង​ផ្លូវគោក​​ទឹក ៧៩៦ ៨៨៣ ​នាក់ កើន​​ឡើង​ចំនួន ១ ០៦១,២​ភាគរយ​៕