ភ្នំពេញៈ ប្រទេសកូវ៉ែត បានចាប់អារម្មណ៍លើវិស័យប្រេង ការសាងសង់ផ្លូវល្បឿនលឿន និងវិស័យហិរញ្ញវត្ថុលើការផ្តល់ហិរញ្ញប្បទានដល់ប្រទេសកម្ពុជា សំដៅបង្កើនទំនាក់ទំនងសេដ្ឋកិច្ចតាមរយៈការបង្កើតការដោះដូរពាណិជ្ជកម្ម និងការវិនិយោគ។
ការបង្ហាញចំណាប់អារម្មណ៍នេះត្រូវបានធ្វើឡើងក្នុងជំនួបរវាងលោកកឹម ស៊ីថន រដ្ឋលេខាធិការនៃក្រសួងពាណិជ្ជកម្ម និង លោក Mohamad S SH S Alhajri ឯកអគ្គរាជទូតតែងតាំងថ្មីនៃរដ្ឋកូវ៉ែតប្រចាំព្រះរាជាណាចក្រកម្ពុជា។
លោក Mohamad បានបញ្ជាក់ពីឆន្ទៈក្នុងការលើកកម្ពស់កិច្ចសហប្រតិបត្តិការក្នុងវិស័យពាណិជ្ជកម្ម វិនិយោគ ជាពិសេសវិស័យពាក់ព័ន្ធការផ្គត់ផ្គង់ថាមពល(ប្រេងឥន្ធនៈ) ការសាងសង់ផ្លូវល្បឿនលឿន និងវិស័យហិរញ្ញវត្ថុ(Soft Loans)។
លោកបានថ្លែងថា៖«ប្រទេសទាំង២ត្រូវបន្តអនុវត្ត និងប្រើប្រាស់ក្របខ័ណ្ឌគតិយុត្តនានាឱ្យអស់ពីលទ្ធភាព រួមមាន កិច្ចព្រមព្រៀង និងអនុស្សរណៈនៃការយោគយល់គ្នាដែលមានស្រាប់ ដើម្បីជំរុញកិច្ចសហប្រតិបត្តិការគ្រប់វិស័យឱ្យកាន់តែស៊ីជម្រៅបន្ថែមទៀត»។
លោកក៏បានស្នើឱ្យពិនិត្យលទ្ធភាពរៀបចំពិព័រណ៍ពាណិជ្ជកម្ម និងវេទិកាធុរកិច្ចរួមគ្នា ដែលអាចជួយបង្កើនទំហំពាណិជ្ជកម្ម និងវិនិយោគទ្វេភាគីឱ្យកាន់តែល្អប្រសើរ។
លោក កឹម ស៊ីថន បានថ្លែងថា រដ្ឋាភិបាលកម្ពុជាបានដាក់ចេញនូវគោលនយោបាយសំខាន់ៗ និងហេដ្ឋារចនាសម្ព័ន្ធរូបវន្តថ្មីៗ ដែលបម្រើដល់សកម្មភាពធុរកិច្ច និងវិនិយោគនៅកម្ពុជា រួមមាន ការធ្វើពិពិធកម្មទីផ្សារនាំចេញតាមរយៈកិច្ចព្រមព្រៀងពាណិជ្ជកម្មសេរីក្នុងក្របខ័ណ្ឌទ្វេភាគី និងអាស៊ាន តំបន់សេដ្ឋកិច្ចពិសេស និងគម្រោងហេដ្ឋារចនាសម្ព័ន្ធរូបវន្តសំខាន់ៗរួមមានព្រលានយន្តហោះ និងកំពង់ផែទឹកជ្រៅ។
លោកបានថ្លែងថា៖« [យើង] លើកទឹកចិត្តវិនិយោគិនកូវ៉ែតឱ្យចាប់យកឱកាសសេដ្ឋកិច្ចនៅកម្ពុជា តាមរយៈការបង្កើតផលិតកម្ម ការចូលរួមក្នុងខ្សែចង្វាក់ផ្គត់ផ្គង់តំបន់ ជាពិសេសបានស្នើជំរុញការនាំចូលនូវផលិតផលកម្ពុជាដែលមានគុណភាព និងភាពប្រកួតប្រជែង រួមមាន ផលិតផលកសិកម្ម និងកសិ-ឧស្សាហកម្ម»។
បច្ចុប្បន្នប្រទេសកម្ពុជា- អេមីរ៉ាតអារ៉ាប់រួម កំពុងបើកផ្លូវចរចាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម (Cambodia-United Arab Emirates Comprehensive Economic Partnership Agreement) ដែលកម្ពុជា នឹងធ្វើជាម្ចាស់ផ្ទះនៃកិច្ចចរចាលើកិច្ចព្រមព្រៀងភាពជាដៃគូនេះលើកទី២ ចាប់ពីថ្ងៃទី១៩-២១ ខែធ្នូ ខាងមុខ សំដៅពង្រីកការធ្វើពាណិជ្ជកម្មអន្តរជាតិរបស់កម្ពុជាទៅកាន់តំបន់មជ្ឈិមបូព៌ា។
យោងតាមរបាយការណ៍របស់ក្រសួងពាណិជ្ជកម្មកម្ពុជា ទំហំពាណិជ្ជកម្មទ្វេភាគីកម្ពុជា-កូវ៉ែត សម្រេចបានប្រមាណ ៦៤ម៉ឺនដុល្លារ គិតពីខែមករា ដល់ខែតុលា ឆ្នាំ២០២២ លើមុខទំនិញសំខាន់ៗ ដូចជា សម្លៀកបំពាក់ និងវាយនភណ្ឌ ថ្នាំជក់ ផលិតផលធ្វើដំណើរ, ម៉ាស៊ីននិងឧបករណ៍អគ្គិសនី, ប៉ូលីមែរនៃអេទីឡែន កែវនិងវត្ថុធ្វើពីកែវជាដើម៕