.jpg)
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ បានដាក់ឲ្យដំណើរការស្តង់ដាគណនេយ្យសាធារណៈមូលដ្ឋានបង្គរនៅកម្ពុជា ទៅដល់ក្រសួង-ស្ថាប័នពាក់ព័ន្ធសម្រាប់ការប្រើប្រាស់ និងត្រួតពិនិត្យនូវរបាយការណ៍អំពីលំហូរសាច់ប្រាក់ ដែលរាជរដ្ឋាភិបាលទម្លាក់ថវិកាដាក់ជូនលើផ្នែកចំណូល ឬការចំណាយផ្សេងៗរបស់ក្រសួង-ស្ថាប័ននីមួយៗ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក ងី តាយី បានថ្លែងនៅក្នុងពិធីប្រកាសដាក់ឲ្យអនុវត្តជាផ្លូវការយុទ្ធសាស្ត្រ ស្តីពីការអនុវត្តស្តង់ដាគណនេយ្យសាធារណៈមូលដ្ឋានបង្គរនៅកម្ពុជា ២០២១-២០៣១ នៅថ្ងៃទី៣០ ខែវិច្ឆិកា ឆ្នាំ២០២២ ថា ស្តង់ដាគណនេយ្យសាធារណៈមូលដ្ឋានសាច់ប្រាក់ មានចំណុចខ្សោយមួយចំនួនពាក់ព័ន្ធនឹងតម្រូវការព័ត៌មានហិរញ្ញវត្ថុចាំបាច់នានា។
លោកបានបន្តថា ដោយហេតុថា ប្រតិបត្តិការគណនេយ្យមូលដ្ឋានសាច់ប្រាក់ ត្រូវបានទទួលស្គាល់តែទៅពេលដែលស្ថាប័នបានទទួលសាច់ប្រាក់ ឬបានទូទាត់សាច់ប្រាក់ប៉ុណ្ណោះ ដោយមិនបានគិតអំពីពេលវេលានៃប្រតិបត្តិការសេដ្ឋកិច្ចដែលបានកើតឡើង ឬអត្ថប្រយោជន៍សេដ្ឋកិច្ចនៃប្រតិបត្តិការទាំងនោះទេ។
លោក ងី តាយី បានមានប្រសាសន៍ថា ៖ «វឌ្ឍនភាពទាំងនេះបានចូលរួមចំណែកដល់រាជរដ្ឋាភិបាល ក្នុងការងារគ្រប់គ្រងហិរញ្ញវត្ថុសាធារណៈរបស់ខ្លួនប្រកបដោយប្រសិទ្ធភាព និងស័ក្ដិសិទ្ធិភាព ហើយជាលទ្ធផលគុណភាព និងភាពស៊ីជម្រៅនៃទិន្នន័យព្រមទាំងព័ត៌មានហិរញ្ញវត្ថុ ដែលរាជរដ្ឋាភិបាលកំពុងមាននាពេលបច្ចុប្បន្ន បានធ្វើឱ្យគុណភាពនៃរបាយការណ៏ហិរញ្ញវត្ថុ និងរបាយការណ៍ពាក់ព័ន្ធផ្សេងៗកាន់តែមានភាពល្អប្រសើរឡើង សម្រាប់អ្នកប្រើប្រាស់របាយការណ៍ហិរញ្ញវត្ថុ»។
បើតាមលោក ងី តាយី រដ្ឋាភិបាលនៃបណ្តាប្រទេសនានាទូទាំងសកលលោក រួមទាំងកម្ពុជាផង បាននិងកំពុងផ្ដោតការយកចិត្តទុកដាក់ខ្ពស់លើគណនេយ្យភាព និងតម្លាភាពហិរញ្ញវត្ថុ ក្នុងការចែករំលែកទិន្នន័យដល់ប្រជាពលរដ្ឋ និងភាគីពាក់ព័ន្ធនានា ព្រមទាំងយកចិត្តទុកដាក់លើប្រសិទ្ធភាព និងស័ក្តិសិទ្ធិភាពនៃការប្រើប្រាស់ធនធានរបស់ប្រទេស ក្នុងការផ្តល់សេវាសាធារណៈ។
លោកបានសង្កត់ធ្ងន់ថា ៖ «ស្តង់ដាគណនេយ្យនេះ ប្រទេសមួយចំនួនដែលជាសមាជិកនៃអង្គការសហប្រជាជាតិ ពីព្រោះយើងបានបង្កើតស្តង់ដានេះឡើងមិនមែនសម្រាប់តែប្រទេសយើងតែមួយទេ គឺសម្រាប់ប្រទេសសឹងតែមួយសកលលោក នៃការវិវត្តនិងការរីកចម្រើនគណនេយ្យសាធារណៈនេះ ដែលវាបាននាំមកនូវតម្លាភាពចំពោះការប្រើប្រាស់ថវិកាជាតិផងដែរ»។
ជាមួយគ្នានេះដែរ លោក គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា ថ្លែងថា ស្តង់ដាគណនេយ្យដែល ក្រសួងសេដ្ឋកិច្ចបានដាក់ឱ្យដំណើរការនេះ នឹងមានប្រសិទ្ធភាពពីព្រោះ បើក្រសួងស្ថាប័នមិនអនុវត្តតាមការកំណត់ស្តង់ដាគណនេយ្យមូលដ្ឋានសាច់ប្រាក់ នេះទេ និងហិរញ្ញប្បទានសម្រាប់ប្រើប្រាស់នៅតាមក្រសួងស្ថាប័នមិនត្រូវបានផ្តល់ជូននោះទេ។
លោកបានបញ្ជាក់ថា៖ «ដូច្នេះ ចង់មិនចង់ស្តង់ដានេះ នឹងអនុវត្តប្រកបដោយជោគជ័យ»។
សូមបញ្ជាក់ថា គណនេយ្យមូលដ្ឋានសាច់ប្រាក់ និងគណនយ្យមូលដ្ឋានបង្គរ ត្រូវបានធ្វើឡើងដោយ ផ្អែកលើគោលការណ៍ថា ចំណូល ចំណាយ និងគណនេយ្យ សម្រាប់ទ្រព្យសកម្មនិងបំណុលពាក់ព័ន្ធ ឆ្លុះបញ្ចាំងពិប្រតិបត្តិការ ឬព្រឹត្តិការណ៍សេដ្ឋកិច្ចសំខាន់ៗ ជាជាងប្រតិបត្តិការ ឬព្រឹត្តិការណ៍ដែលត្រូវបានកត់ត្រានៅពេលដែលស្ថាប័នបានទទួលសាច់ប្រាក់ ឬបានទូទាត់សាច់ប្រាក់។ ការប្រើប្រាស់ និងការដាក់បង្ហាញរបាយការណ៍ហិរញ្ញវត្ថុសំខាន់ៗទាំង ៣ រួមមាន របាយការណ៍លទ្ធផលហិរញ្ញវត្ថុ របាយការណ៍ស្ថានភាពហិរញ្ញវត្ថុ និងរបាយការណ៍លំហូរសាច់ប្រាក់៕
