ភ្នំពេញៈ ភ្ញៀវទេសចរ​ប្រទេស​នៅជាប់​ព្រំដែន​ទាំង ៣ ដែល​ធ្វើដំណើរ​មក​កម្ពុជា​ក្នុង​រយៈពេល ១០​ ខែ ឆ្នាំ​ ២០២២ មាន​ចំនួន​ជិត ១​ លាន​នាក់ កើនឡើង​ជាង ១ ១៥៧ ​ភាគរយ​បើ​ធៀប​រយៈ​ពេល​ដូចគ្នា​ឆ្នាំ ២០២១ ដែល​ចំនួន​នេះ​គឺ​ស្មើ​ជិត ៦៣ ​ភាគរយ​នៃ​ចំនួន​ភ្ញៀវ​សរុប​ចូលមក​កម្ពុជា​ក្នុង​រយៈពេល​ខាងលើ​។​

​ស្ថិតិ​ក្រសួងទេសចរណ៍ ទើប​ចេញផ្សាយ​កាលពី​ថ្ងៃទី​ ៣០ ខែវិច្ឆិកា ឱ្យដឹងថា ចាប់ពី​ខែមករា ដល់​ខែតុលា ឆ្នាំ ២០២២ កម្ពុជា​ទទួលបាន​ទេស​ចរ​អន្តរជាតិ​សរុប ១ ៥៧៥ ៩៥៤ ​នាក់ កើន​ ៩៩១,១ ​ភាគរយ​បើ​ធៀប​រយៈ​ពេល​ដូចគ្នា​ឆ្នាំ​ ២០២២ ដោយ​ក្នុងនោះ​ភ្ញៀវ​មកពី​ប្រទេស​នៅជាប់​ព្រំដែន​ទាំង ៣ មាន​ចំនួន​សរុប ៩៩២ ៣០៥​ នាក់ កើនឡើង ១ ១៥៧,៥​ ភាគរយ ពី​ចំនួន ៧៨ ៩១១ ​នាក់​។​

​យោងតាម​ស្ថិតិ​ខាងលើ ភ្ញៀវ​ទេសចរ​ថៃ មាន ៥៩០ ៩៨៤​ នាក់ កើន ៧៤៥,៣​ ភាគរយ​, វៀតណាម ៣៤១ ៩៥៣​នាក់ កើន ៣ ៧៤៣ ​ភាគរយ និង​ភ្ញៀវ​ឡាវ ចំនួន ៥៩ ៣៦៨​ នាក់ កើន ៥៧ ៥៣៨,៨​ ភាគរយ​។​

​លោក ធួន ស៊ីណាន ប្រធាន​សមាគម​ទេសច​រណ៍​អាស៊ី​ប៉ា​​ស៊ី​ហ្វិ​ក​កម្ពុជា បាន​ប្រាប់​ភ្នំពេញ​ប៉ុស្តិ៍ នា​ថ្ងៃទី ​១ ខែធ្នូ ថា ក្នុងដំណាក់កាល​ពិភពលោក​កំពុងស្ថិត​ក្នុង​ភាពមិនច្បាស់លាស់​ដែល​បណ្តាលមកពី​បញ្ហា​ផ្សេងៗ​ដូចជា បញ្ហា​ជម្លោះ​ភូមិសាស្ត្រ​នយោបាយ កំណើនសេដ្ឋកិច្ច​មាន​ភា​ព​ផុយស្រួយ និង​វិបត្តិ​ជំងឺ​កូ​វីដ​ ១៩ ជាដើម គឺ​គេ​មិនអាច​ពឹង​លើ​ភ្ញៀវ​បរទេស​មកពី​ប្រទេស​ឆ្ងាយៗ​ដូចជា អាមេរិក និង​អឺរ៉ុប បានទេ​។ ហេតុនេះ​ភ្ញៀវទេសចរ​ពី​ប្រទេសជិតខាង និង​ក្នុង​តំបន់ ពិតជា​ដើរតួនាទី​សំខាន់​ក្នុងការ​ប៉ះប៉ូវ​នូវ​អ្វីដែល​បាន​បាត់បង់​កន្លងមក​។​

​លោក​ថ្លែងថា​៖ «​ក្នុង​ដំណាក់​​កាល​នេះ​គឺ​មានតែ​ភ្ញៀវ​នៅក្នុង​តំបន់​អាស៊ាន ពិសេស​ប្រទេសជិតខាង​ដែល​អាចជួយ​ទ្រទ្រង់​វិស័យ​ទេសចរណ៍​យើង​បាន​។ ភ្ញៀវ​មកពី​ប្រទេស​ឆ្ងាយៗ រួម​ទាំង​ភ្ញៀវ​ចិន ដែល​ពីមុន​ធ្លាប់ធ្វើ​ដំណើរ​មក​កម្ពុជា​ច្រើន​នៅពេលនេះ​ក៏​កំពុង​ជួប​បញ្ហា​នៅក្នុង​ប្រ​ទេស​របស់ខ្លួន​ដូចៗ​គ្នា​»​។​

​លោក​បាន​បន្តថា ទន្ទឹមនឹង​កំណើន​ភ្ញៀវទេសចរ​អន្តរជាតិ​នៅពេលនេះ កម្ពុជា​ក៏ត្រូវ​ពង្រឹង​ការអនុវត្ត​ច្បាប់​នៅក្នុង​ប្រទេស​ឱ្យ​កាន់តែ​ល្អ​ផងដែរ ដើម្បី​ទាក់​ទាញ​ទំនុកចិត្ត​ភ្ញៀវទេសចរ​។​

​ដើម្បី​បង្កើន​នូវ​ភាព​ទាក់ទាញ​សម្រាប់​វិស័យ​ទេសចរណ៍​នៅ​ចន្លោះ​ពីថ្ងៃ​ទី​ ៩-១៤ ខែធ្នូ​នេះ កម្ពុជា​នឹង​រៀបចំ​ «​សន្និបាត​ក្លិប​ឆ្នេរសមុទ្រ​ដែល​ស្អាត​ជាងគេ​នៅលើ​ពិភពលោក និង​បុណ្យ​សមុទ្រ​លើក​ទី​ ៩ ជុំ​ទី​ ៣ នៅ​ខេត្ត​ព្រះសីហនុ​» នៅក្នុង​ខេត្ត​ព្រះសីហនុ ផងដែរ​។​

​ក្នុង​ឆ្នាំ​ ២០២១ កម្ពុជា​ទទួលបាន​ភ្ញៀវ​អន្តរជាតិ ១៩៦ ៤៩៥​ នាក់ ធ្លាក់ចុះ ៨៥ ​ភាគរយ​បើ​ធៀប​ឆ្នាំ​ ២០២០​។ នេះ​បើតាម​ក្រសួងទេសចរណ៍​៕