ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឱ្យវិនិយោគិនជប៉ុនចូលមកបណ្តាក់ទុននៅកម្ពុជាកាន់តែច្រើនថែមទៀត ដើម្បីទាញយកប្រយោជន៍ពីការធ្វើផ្លាស់ប្តូរឋានៈនៃទំនាក់ទំនងរវាងប្រទេសទាំង ២ ពីដៃគូយុទ្ធសាស្ត្រទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ដែលនឹងប្រកាសអនុវត្តនៅឆ្នាំក្រោយនេះ ដោយលោកបានលើកយកភាពជោគជ័យរបស់ក្រុមហ៊ុន Minebea (Cambodia) ក្នុងរយៈពេល ១១ ឆ្នាំនៅកម្ពុជាជាគំរូ។
លោកនាយករដ្ឋមន្ត្រី ហ៊ុន សែន និងលោក Fumio Kishida ជាសមភាគីជប៉ុននៅក្រៅកិច្ចប្រជុំកំពូលអាស៊ាន កាលពីថ្ងៃទី ១២ ខែវិច្ឆិកា បានព្រមព្រៀងគ្នាក្នុងការបង្កើនទំនាក់ទំនងទ្វេភាគីទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ដែលនឹងត្រូវចាប់ផ្តើមនៅឆ្នាំ ២០២៣ ខាងមុខ។
ថ្លែងក្នុងពិធីខួបលើកទី ១១ នៃប្រតិបត្តិការ Minebea នៅកម្ពុជា លោក ហ៊ុន សែន បានឱ្ យដឹងថា កម្ពុជា-ជប៉ុន នឹងប្រារព្ធខួបលើកទី ៧០ នៃទំនាក់ទំនងការទូត ហើយនឹងផ្លាស់ប្តូរពីយុទ្ធសាស្ត្រទៅជាភាពជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ ២០២៣។ លោកបន្ថែមថា កម្ពុជាកំពុងទទួលបានជំនួយហិរញ្ញវត្ថុជាច្រើនពីរដ្ឋាភិបាលជប៉ុន ទោះជាយ៉ាងណាខ្លួនចាំបាច់ត្រូវការការវិនិយោគរបស់ជប៉ុនបន្ថែមទៀត។
លោកថ្លែងថា៖ «យើងទាំងអស់គ្នាដឹងថាយើងបានទទួលជំនួយហិរញ្ញវត្ថុជាច្រើនពីប្រទេសជប៉ុន ប៉ុន្តែអ្វីដែលយើងត្រូវការបន្ថែមទៀតគឺការវិនិយោគផ្ទាល់ពីប្រទេសជប៉ុនមកកម្ពុជា ព្រោះយើងដឹងថា ប្រទេសជប៉ុនមិនត្រឹមតែមានតួនាទីជួយកម្ពុជាប៉ុណ្ណោះទេ ប៉ុន្តែថែមទាំងជួយបណ្ដាប្រទេសផ្សេងទៀតផងដែរ។ ដូច្នេះបញ្ហាសំខាន់ដែលយើងចង់បានគឺថា យើងចង់មានការវិនិយោគរបស់ជប៉ុនបន្ថែមទៀត និងការបើកទីផ្សារឱ្យកាន់តែធំសម្រាប់យើង»។
លោកបន្ថែមថា៖ «ខ្ញុំពិតជាសប្បាយចិត្តណាស់ដែលមើលឃើញពាណិជ្ជកម្មទ្វេភាគីរវាងកម្ពុជា-ជប៉ុនមានការកើនឡើង តាមរយៈការវិនិយោគរបស់ជប៉ុនមកកម្ពុជា ហើយបន្ទាប់មកពួកគេបាននាំចេញបន្តទៅកាន់ប្រទេសរបស់ខ្លួនវិញ។ ដូច្នេះ យើងត្រូវតែរក្សាការងារដើម្បីពង្រឹងទំនាក់ទំនងរបស់យើង»។
លោកបញ្ជាក់ថា លោកបានយកចិត្តទុកដាក់យ៉ាងខ្លាំងដល់ក្រុមហ៊ុនមីនេបៀដែលអស់រយៈពេល ១១ ឆ្នាំមកហើយដោយផ្តល់ការគាំទ្រពេញលេញ។
លោកបន្ថែមថា៖ «ខ្ញុំមានមោទនភាពណាស់ដែលបានចូលរួមជាមួយក្រុមហ៊ុន និងបណ្ដាក្រុមហ៊ុនផ្សេងទៀតដើម្បីធ្វើឱ្យការវិនិយោគនេះទទួលជោគជ័យ»។
លោក Yoshihisa Kainuma អគ្គនាយកក្រុមហ៊ុន Minebea Cambodia បានឱ្យដឹងក្នុងពិធីនេះថា ដោយមានការគាំទ្រយ៉ាងពេញទំហឹងពីលោកនាយករដ្ឋមន្ត្រី ហ៊ុន សែន និងរដ្ឋាភិបាលកម្ពុជា ក្រុមហ៊ុនរបស់លោកបានទទួលជោគជ័យយ៉ាងខ្លាំងពីការវិនិយោគដំបូងត្រឹមតែ ២៣ លានដុល្លារ កើនឡើងដល់ជាង ៦០០ លានដុល្លារដូចពេលនេះ។
លោកបន្តថា៖ «ជាមួយនឹងផែនការវិនិយោគដើមរបស់យើង ដែលជា QIP ដំបូងរបស់យើង យើងមានគម្រោងវិនិយោគចំនួន ២៣ លានដុល្លារក្នុងរយៈពេល ៥ ឆ្នាំ ប៉ុន្តែយើងបានបណ្តាក់ទុនជាង ១០០ លានដុល្លាររួចទៅហើយ ហើយនៅក្នុងខួបលើកទី ៥ នេះ ខ្ញុំបាននិយាយថា នៅពេលដែលរោងចក្រទី៣ ដាក់ឱ្យដំណើរការពេញលេញ ផែនការវិនិយោគរបស់យើង ត្រូវរំពឹងថានឹងមានជាង ២៥០ លានដុល្លារ ដែលបច្ចុប្បន្នមានចំនួន ៦១៤ លានដុល្លារនៃទ្រព្យសកម្មថេរ និងការចំណាយលើការពង្រីកផ្សេងទៀត។ ដូច្នេះ អ្វីដែលធ្វើឱ្យយើងមានមោទនភាពនោះគឺការអនុវត្តតាមគោលការណ៍ណែនាំរបស់រដ្ឋាភិបាលកម្ពុជាក្នុងការកសាងធនធានមនុស្ស ពោល គឺបុគ្គលិកវ័យក្មេងកម្ពុជារបស់យើងកំពុងរីកចម្រើនជាមួយនឹងយើង ហើយបានក្លាយជាអ្នកជំនាញដែលមានជំនាញខ្ពស់បន្ទាប់ពីបានធ្វើការជាមួយក្រុមហ៊ុនរបស់យើង»។
បើតាមលោកនាយករដ្ឋមន្ត្រី ហ៊ុនសែន ក្រុមហ៊ុន Minebea មានគម្រោងពង្រីករោងចក្រថ្មីនៅខេត្តពោធិ៍សាត់ ដើម្បីបង្កើនការផលិត៕