.jpg)
រាជរដ្ឋាភិបាល បានលើកឡើងថា កម្ពុជាបាននិងកំពុងធ្វើដំណើរឆ្ពោះទៅមុខជានិច្ចដែលពោរពេញទៅដោយឱកាសមាសយ៉ាងពិតប្រាកដសម្រាប់ធ្វើពាណិជ្ជកម្ម និងវិនិយោគនៅកម្ពុជា។ ហើយក្នុងរយៈពេលប៉ុន្មានទសវត្សរ៍ចុងក្រោយនេះ កម្ពុជាបានឆ្លងកាត់ បានផ្លាស់ប្តូរគួរឱ្យកត់សម្គាល់ ទាំងទិដ្ឋភាព នយោបាយ សន្តិសុខ សង្គម និងសេដ្ឋកិច្ច។
ថ្លែងក្នុងពិធីអបអរសាទរខួប ១១ ឆ្នាំ នៃប្រតិបត្តិការរបស់ក្រុមហ៊ុនមីនីបៀ របស់ជប៉ុន នៅតំបន់សេដ្ឋកិច្ចពិសេសភ្នំពេញ លោកនាយករដ្ឋមន្ត្រី ហ៊ុន សែន បានលើកឡើងថា ខណៈដែលប្រទេសមួយចំនួនកំពុងជួបវិបត្តិកូវីដ ១៩ ធ្វើឱ្យប្រទេសខ្លះបានផ្អាកដំណើរការសកម្មភាពផលិតនានា និងប្រទេសខ្លះទៀតកំពុងជួបវិបត្តិសង្គ្រាម ប៉ុន្តែកម្ពុជានៅតែមានស្ថានភាពល្អ និងមានកំណើនវិនិយោគនៅក្នុងប្រទេសគួរឱ្យកត់សម្គាល់។
លោក ហ៊ុន សែន បានលើកឡើងថា កំណើនក្រុមហ៊ុនវិនិយោគនៅកម្ពុជា គឺកើតឡើងដោយសារកត្តាធំៗ ២ គឺកត្តាសន្តិភាព និងកត្តាស្ថិរភាពនយោបាយកម្ពុជា រួមជាមួយនឹងការលើកទឹកចិត្តមួយចំនួន បានធ្វើឱ្យមានការទាក់ទាញវិនិយោគទុនមកកម្ពុជាជាច្រើន។
លោកបានបញ្ជាក់បន្ថែមដូច្នេះថា៖ «ឥឡូវសូមសម្លឹងមើលទៅប្រទេសអ៊ុយក្រែន តើប្រទេសក្នុងពិភពលោក និងក្រុមហ៊ុនក្នុងស្រុក និងក្រៅស្រុក ចង់ទៅវិនិយោគនៅប្រទេសមានសង្គ្រាមទេ? ចឹងគ្មានអ្នកណាអាចប្រថុយដាក់ទុនវិនិយោគ នៅប្រទេសមានសង្គ្រាម គ្មានសន្តិភាព និងស្ថិរភាពនយោបាយនោះទេ ចឹងសព្វថ្ងៃកម្ពុជាមានកត្តា ២ គឺសន្តិភាព និងស្ថិរភាពនយោបាយ ទើបជំរុញឱ្យបណ្តាក្រុមហ៊ុនឈរជើងវិនិយោគនៅកម្ពុជាបាន»។
ប្រមុខរដ្ឋាភិបាលកម្ពុជា បានអះអាងទៀតថា ដើម្បីជំរុញការវិនិយោគ និងធ្វើឱ្យកំណើនសេដ្ឋកិច្ចជាតិកាន់តែមានភាពរឹងមាំ រាជរដ្ឋាភិបាលកម្ពុជា បាននិងកំពុងខិតខំជំរុញ និងកសាងហេដ្ឋារចនាសម្ព័ន្ធទាំងផ្នែករឹង និងទន់ ដើម្បីសម្រួលដល់ការវិនិយោគ និងពាណិជ្ជកម្ម ដែលកំពុងតែមានការរីកលូតលាស់នេះ។
ប្រទេសកម្ពុជាត្រូវបានធនាគារអភិវឌ្ឍន៍អាស៊ី (ADB) ឱ្យរហ័សនាមថា «ខ្លាសេដ្ឋកិច្ចថ្មីនៃអាស៊ី» ដោយសារប្រទេសអាស៊ីអាគ្នេយ៍មួយនេះ សម្រេចបានកំណើនសេដ្ឋកិច្ចខ្ពស់ ថេរ និងលឿនរហ័ស ក្នុងរយៈពេលជាច្រើនឆ្នាំចុងក្រោយនេះ។
ជាងនេះទៀត អ្នកជំនាញផ្នែកសេដ្ឋកិច្ចកម្ពុជា ធ្លាប់បានលើកឡើងដែរថា កំណើនក្រុមហ៊ុនវិនិយោគនៅកម្ពុជា គឺដោយសារតែក្រុមហ៊ុនទាំងនោះ បានសម្លឹងឃើញសក្តានុពលរបស់កម្ពុជា ដោយផ្អែកទៅលើកំណើនសេដ្ឋកិច្ចរឹងមាំជារៀងរាល់ឆ្នាំ បរិយាកាសវិនិយោគល្អ ទីតាំងវិនិយោគអំណោយផលល្អ នៅចំចំណុចកណ្តាលបេះដូងនៃបណ្តាប្រទេសអាស៊ាន កម្លាំងពលកម្មវ័យក្មេងច្រើន ពិសេសកត្តាស្ថិរភាពនយោបាយ បានប្រែក្លាយកម្ពុជាពោរពេញទៅដោយឱកាសមាសសម្រាប់ការទាក់ទាញវិនិយោគ។
ជាមួយគ្នានេះដែរ អ្នកជំនាញ និងអ្នកជំនួញកម្ពុជា ក៏មានក្តីរំពឹងខ្ពស់ ចំពោះច្បាប់វិនិយោគថ្មី និងកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីក្នុងការធ្វើឱ្យប្រសើរឡើងនូវឱកាសវិនិយោគ និងការធ្វើធុរកិច្ចនៅកម្ពុជា។ តាមរយៈយន្តការសម្របសម្រួល និងលំហូរពាណិជ្ជកម្មសេរីទាំងនេះ វានឹងជួយផ្តល់ទំនុកចិត្តកាន់តែខ្ពស់បន្ថែមទៀតដល់វិនិយោគិនជាតិ និងអន្តរជាតិ ក្នុងការបោះទុនវិនិយោគលើគម្រោងថ្មីៗបន្ថែមទៀតនៅកម្ពុជា។
គួរបញ្ជាក់ផងដែរថា ក្នុងឆ្នាំ ២០១៩ រំហូរទុនវិនិយោគពីបរទេសនៅកម្ពុជា មានចំនួនប្រមាណ ៣,៤ ពាន់លានដុល្លារ ឆ្នាំ ២០២០ បានបន្តកើនឡើងក្នុងទំហំតិចតួចប្រមាណ ៣,៦ ពាន់លានដុល្លារអាមេរិក និងឆ្នាំ ២០២១ កើនដល់ ៤,៥ ពាន់លានដុល្លារអាមេរិក។ ដោយឡែក ក្នុងរយៈពេល ២ ខែដំបូងនៃឆ្នាំ ២០២២ ទុនវិនិយោគផ្ទាល់ពីបរទេសបានកើនឡើងដល់ទំហំជិតពាក់កណ្ដាលនៃឆ្នាំ ២០២១ គឺប្រមាណ ២ ពាន់លានដុល្លារអាមេរិក៕
