ភ្នំពេញៈ ក្រសួងពាណិជ្ជកម្មអាមេរិក បានបដិសេធក្រុមហ៊ុនចំនួន ៤ ដែលព្យាយាមគេចបង់ពន្ធនាំចូលបន្ទះសូឡា និងម៉ូឌុលផលិតនៅក្នុងប្រទេសចិន ដោយបញ្ជូនទៅប្រទេសអាស៊ានចំនួន ៤ រួមមាន កម្ពុជា ម៉ាឡេស៊ី ថៃ និងវៀតណាម។
ក្រសួងពាណិជ្ជកម្មកាលពីថ្ងៃទី ២ ខែធ្នូ បានចេញសេចក្ដីសម្រេចបឋមរបស់ខ្លួនក្នុងការស៊ើបអង្កេតការគេចពន្ធលើបន្ទះសូឡា និងម៉ូឌុល មកពីសាធារណរដ្ឋប្រជាមានិតចិន។ ក្រសួងពាណិជ្ជកម្មបានពិនិត្យលើពាក្យបណ្តឹងដែលចោទប្រកាន់ថា ក្រុមហ៊ុនផលិតបន្ទះសូឡាចំនួន ៨ បានផលិតបន្ទះសូឡា និងម៉ូឌុល នៅប្រទេសចិន បន្ទាប់មកបញ្ជូនផលិតផលទាំងនោះទៅប្រទេសកម្ពុជា ម៉ាឡេស៊ី ថៃ និង/ឬវៀតណាមសម្រាប់ការកែច្នៃតិចតួច មុនពេលនាំចេញទៅអាមេរិក។
ក្រសួងពាណិជ្ជកម្មបញ្ជាក់ថា៖ «សកម្មភាពបែបនេះគឺស្មើនឹងកិច្ចខិតខំដើម្បីគេចវេះលើកាតព្វកិច្ចពន្ធប្រឆាំងទៅនឹងការបង្ខូចតម្លៃ ដែលមានស្រាប់ (AD) និងកាតព្វកិច្ចប្រឆាំងការទូទាត់ (CVD) បញ្ជាទិញលើបន្ទះសូឡា និងម៉ូឌុលដែលនាំចូលពីប្រទេសចិន។ សេចក្ដីសម្រេចបឋមនោះបានបញ្ជាក់ពីការប្តេជ្ញាចិត្តរបស់ក្រសួងពាណិជ្ជកម្មក្នុងការគ្រប់គ្រងលើទទួលខុសត្រូវរបស់ប្រទេសចិន រាល់សកម្មភាពបង្ខូចពាណិជ្ជកម្ម ដែលធ្វើឱ្យប៉ះពាល់ដល់ឧស្សាហកម្មអាមេរិក»។
ស្ថិតនៅក្រោមច្បាប់អាមេរិកក្រសួងពាណិជ្ជកម្មអាចធ្វើការស៊ើបអង្កេតការគេចពន្ធនៅពេលដែលភ័ស្តុតាងបង្ហាញថាទំនិញដែលស្ថិតនៅក្រោមការបញ្ជាទិញ AD/CVD ដែលមានស្រាប់ត្រូវបានបញ្ចប់ ឬដំឡើងនៅក្នុងប្រទេសទី ៣ ដោយប្រើប្រាស់គ្រឿងបន្លាស់ និងគ្រឿងបង្គុំនាំចូលពីប្រទេសដែលស្ថិតនៅក្រោមការបញ្ជាទិញ។ ការបញ្ជាទិញ AD/CVD ត្រូវបានបង្កើតឡើងដើម្បីផ្តល់ការអនុគ្រោះដល់ឧស្សាហកម្មក្នុងស្រុករបស់អាមេរិក នៅពេលដែលឧស្សាហកម្មទាំងនេះកំពុងប្រឈមនឹងការប្រកួតប្រជែងមិនស្មើភាព។ ការគេចវេះកាតព្វកិច្ចពន្ធទាំងនេះគំរាមកំហែង ដល់ឧស្សាហកម្ម កម្មករ និងអាជីវកម្មរបស់អាមេរិក។
បន្ទាប់ពីការស៊ើបអង្កេតយ៉ាងហ្មត់ចត់ តម្លាភាព និងផ្អែកលើទិន្នន័យរបស់ក្រុមហ៊ុនចំនួន ៨ នៅប្រទេសទាំង ៤ ក្រសួងពាណិជ្ជកម្មបានរកឃើញថា ក្រុមហ៊ុនចំនួន ៤ ក្នុងចំណោមក្រុមហ៊ុនទាំង ៨ ដែលស៊ើបអង្កេតកំពុងព្យាយាមគេចពន្ធរបស់អាមេរិកដោយធ្វើការកែច្នៃតិចតួចនៅប្រទេសអាស៊ីអាគ្នេយ៍មុនពេលដឹកជញ្ជូនទៅអាមេរិក។
ក្រុមហ៊ុនទាំង ៤ រួមមានក្រុមហ៊ុន BYD Hong Kong, Canadian Solar, Trina និងក្រុមហ៊ុន Vina Solar គួរតែជាកម្មវត្ថុនៃពន្ធនាំចូលបន្ថែមរបស់អាមេរិក។
កាលពីខែមិថុនា ប្រធានាធិបតីអាមេរិក លោក បៃដិន បានចេញសេចក្តីប្រកាសមួយស្តីពីការលើកលែងពន្ធលើការនាំចូលបន្ទះសូឡា និងម៉ូឌុល ពីប្រទេសកម្ពុជា ម៉ាឡេស៊ី ថៃ និងវៀតណាម រយៈពេល ២ ឆ្នាំ។
កាលពីឆ្នាំ ២០២១ កម្ពុជាបាននាំចេញបន្ទះសូឡាចំនួន ៥៤ ៣១៩,៨៣តោន ដែលមានតម្លៃ ២៧៣,៨៧ លានដុល្លារ កើនជាង ២៧ ភាគរយបើធៀបនឹងឆ្នាំ ២០២០។ នេះបើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។
លោក ហេង គុណលាង អ្នកនាំពាក្យក្រសួងរ៉ែ និងថាមពល បានប្រាប់ភ្នំពេញប៉ុស្តិ៍នៅថ្ងៃទី ៨ ខែមិថុនា ថា កម្ពុជាមានគោលនយោបាយលើកទឹកចិត្តដល់ការផលិតបន្ទះសូឡា ក៏ដូចជាគ្រឿងបន្លាស់ និងឧបករណ៍អគ្គិសនីសម្រាប់ទីផ្សារក្នុងស្រុក និងនាំចេញ។
លោកថ្លែងថា៖ «កម្ពុជាក៏ដូចជាប្រទេសដទៃទៀតដែរគឺកំពុងធ្វើការរួមគ្នាដើម្បីកាត់បន្ថយផលប៉ះពាល់នៃការប្រែប្រួលអាកាសធាតុ និងបង្កើនការប្រើប្រាស់ថាមពលកកើតឡើងវិញជាអតិបរមា។ ដូច្នេះហើយ រដ្ឋាភិបាលលើកទឹកចិត្ត និងគាំទ្រការផលិតបន្ទះសូឡា សម្រាប់ប្រើប្រាស់ក្នុងស្រុក និងនាំចេញ»៕