ភ្នំពេញៈ អគ្គនាយកផ្សារមូលបត្រកម្ពុជា (CSX) ស្វាគមន៍ផែនការបោះផ្សាយសញ្ញាបណ្ណបៃតង (Green Bond) របស់ធនាគារអេស៊ីលីដាដែលខ្លួនមានផែនការប្រើប្រាស់មូលនិធិពីការបោះផ្សាយសញ្ញាបណ្ណប្រភេទនេះក្នុងអាជីវកម្មបៃតងទាំងឡាយណាដែលមិនបង្កផលប៉ះពាល់ដល់បរិស្ថាន។
ធនាគារអេស៊ីលីដាបានទទួលការអនុម័តលើការបោះផ្សាយសញ្ញាបណ្ណបៃតងពីធនាគារជាតិនៃកម្ពុជា (NBC) កាលពីថ្ងៃទី២១ ខែវិច្ឆិកា ដែលជាការបោះផ្សាយលើកទី២ របស់ខ្លួន បន្ទាប់ពីបានធ្វើការបោះផ្សាយមូលបត្រកម្មសិទ្ធិកាលពីខែឧសភាឆ្នាំ២០២០ដោយបានធ្វើការប្រមូលមូលនិធិប្រមាណ១៧,៥លានដុល្លារ។
លោក ហុង សុហួរ អគ្គនាយក CSX បានថ្លែងប្រាប់ភ្នំពេញប៉ុស្តិ៍នៅថ្ងៃទី៥ ខែធ្នូថាលោកស្វាគមន៍ចំពោះការសម្រេចចិត្តរបស់ធនាគារអេស៊ីលីដា និងបណ្តាក្រុមហ៊ុនចុះបញ្ជីនានាក្នុងការពិចារណាបោះផ្សាយបន្ថែមជាមូលបត្រកម្មសិទ្ធិ សញ្ញាបណ្ណឬមូលបត្រប្រភេទផ្សេងទៀតដូចជាបណ្ណបៃតងជាដើម។
លោកបានថ្លែងថា៖«យើងតែងតែលើកទឹកចិត្តដល់ក្រុមហ៊ុនដែលចុះបញ្ជីស្រាប់ហើយជាភាគហ៊ុនឬសញ្ញាបណ្ណក៏ដោយ អាចពិចារណាបោះផ្សាយបន្ថែម អាចជាប្រភេទមូលបត្រដែលបានបោះផ្សាយរួចហើយ ឬជាប្រភេទមូលបត្រផ្សេងមួយទៀតអាចមកចុះបញ្ជីនៅផ្សារមូលបត្រ ២ប្រភេទឬ៣ប្រភេទទៅតាមសេចក្តីត្រូវការរបស់ក្រុមហ៊ុននីមួយៗ»។
លោកបានថ្លែងបញ្ជាក់ថា សម្រាប់នីតិវិធីនៃការបោះផ្សាយ ក្រុមហ៊ុនដែលបានចុះបញ្ជីស្រាប់គឺនៅតែអនុវត្តតាមនីតិវិធីបោះផ្សាយ ប៉ុន្តែអាចលឿនជាងមុនដោយសារតែក្រុមហ៊ុនមានព័ត៌មាននានាស្រាប់។ ប៉ុន្តែសម្រាប់ធនាគារអេស៊ីលីដា លោកពុំទាន់ទទួលបានពាក្យស្នើសុំបោះផ្សាយនៅឡើយទេ។
អនុប្រធាននាយកប្រតិបត្តិជាន់ខ្ពស់នៃធនាគារអេស៊ីលីដា លោកស្រី ម៉ារ អមរា បានថ្លែងប្រាប់ភ្នំពេញប៉ុស្តិ៍កាលពីថ្ងៃទី៥ ខែធ្នូថា បន្ទាប់ពីខ្លួនទទួលបានការអនុម័តពីធនាគារជាតិនៃកម្ពុជាមក ធនាគារកំពុងរៀបចំនីតិវិធីបន្តជាមួយក្រុមហ៊ុនធានាទិញមូលបត្រ(Underwriter)ដើម្បីកំណត់អំពីចំនួនទឹកប្រាក់ដែលនឹងត្រូវកៀរគរពីផ្សារហ៊ុន និងបរិមាណនៃហ៊ុនដែលនឹងត្រូវបោះផ្សាយលក់។
លោកស្រីបានមានប្រសាសន៍ថា៖«ធនាគារអេស៊ីលីដាយើងកំពុងធ្វើការជាមួយក្រុមហ៊ុនធានាទិញមូលបត្រដើម្បីដំណើការការបោះផ្សាយទៅលើចំនួនមូលនិធិដែលនឹងត្រូវកៀរគរ និងការកំណត់តម្លៃសញ្ញាបណ្ណក្នុងតម្លៃប្រមាណ១សែនរៀលក្នុង១សញ្ញាបណ្ណ។ សម្រាប់មូលនិធិដែលយើងប្រមូលបាននេះនឹងត្រូវប្រើប្រាស់តែក្នុងគោលបំណងការផ្តល់ឥណទានបៃតងដើម្បីជំរុញបរិស្ថានបៃតង និងធ្វើពិពិធកម្មប្រភពនៃមូលនិធិ។ យើងរំពឹងថានឹងធ្វើការបោះផ្សាយនៅក្នុងឆ្នាំ២០២៣ខាងមុខនេះ»។ ប៉ុន្តែលោកស្រីពុំបានកំណត់ពេលវេលាជាក់លាក់នៃការបោះផ្សាយនៅឡើយទេ។
កាលពីថ្ងៃទី១២ ខែតុលា ក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) បានផ្តល់ការអនុញ្ញាតជាគោលការណ៍លើសំណើសុំបោះផ្សាយលក់មូលបត្របំណុលជាសាធារណៈ ជាប្រភេទសញ្ញាបណ្ណបៃតងដំបូងគេនៅកម្ពុជារបស់ក្រុមហ៊ុន ហ្គោលដេនទ្រីដើម្បីកៀរគរទឹកប្រាក់ប្រមាណ៣លានដុល្លារ សម្រាប់រយៈពេល៥ឆ្នាំជាមួយអត្រាការប្រាក់៧ភាគរយ៕