ភ្នំពេញៈ និយតករមូលបត្រកម្ពុជា (SERC) បានផ្តល់សិទ្ធិឱ្យធនាគារអេស៊ីលីដា ក្នុងការប្រើប្រាស់សេវាទូទាត់ប្រាក់តាមប្រព័ន្ធអេឡិចត្រូនិក សម្រាប់ការបង់ថ្លៃសេវាស្នើសុំលេខអត្តសញ្ញាណវិនិយោគិនតាមអនឡាញ ក្នុងគោលបំណងដើម្បីសម្រួលដល់វិនិយោគិនទាំងអស់ឱ្យកាន់តែមានភាពងាយស្រួលក្នុងការវិនិយោគលើផ្សារមូលបត្រកម្ពុជា។
ការសម្រេចនេះត្រូវធ្វើឡើងតាមរយៈការចុះហត្ថលេខាលើកិច្ចព្រមព្រៀងរវាងលោក ស៊ូ សុជាតិ អគ្គនាយកនៃនិយតករមូលបត្រកម្ពុជា និងលោកស្រី ម៉ារ អមរា ប្រធាននាយកប្រតិបត្តិស្តីទីធនាគារ អេស៊ីលីដា កាលពីថ្ងៃទី ៧ ខែវិច្ឆិកា។
លោក ស៊ូ សុជាតិ បានលើកឡើងថា ថ្វីដ្បិតវិស័យមូលបត្រនៅកម្ពុជា មានដំណើរការរយៈពេលជាង ១ ទសវត្សរ៍ក៏ដោយ SERC នៅតែបន្តស្វែងរកកិច្ចសហការអភិវឌ្ឍន៍ទីផ្សារឱ្យកាន់តែប្រសើរឡើងក្នុងការសម្របខ្លួនឱ្យបានតាមបច្ចុប្បន្នភាពនៃទីផ្សារអន្តរជាតិ រាប់ញ្ចូលទាំងការតាក់តែងបទប្បញ្ញត្តិពាក់ព័ន្ធ ការសិក្សាស្រាវជ្រាវផលិតផលមូលបត្រ ការជំរុញការបោះផ្សាយ ការជំរុញការជួញដូរ និងការបង្កើនការយល់ដឹងដល់វិនិយោគិនជាដើម។
លោកថ្លែងថា៖ «ទីផ្សារមូលបត្រកំពុងវិវឌ្ឍប្រកបដោយវឌ្ឍនភាពជាវិជ្ជមាន ដោយទីផ្សាររបស់យើងមានប្រព័ន្ធទ្រទ្រង់ ឬសសរស្តម្ភគ្រប់គ្រាន់ (វិនិយោគិន, ក្រុមហ៊ុនបោះផ្សាយ, អន្តរការីទីផ្សារ និងហេដ្ឋារចនាសម្ព័ន្ធទីផ្សារ) និងទទួលបានការគាំទ្រ និងការចូលរួមយ៉ាងពេញទំហឹងពីភាគីពាក់ព័ន្ធទាំងអស់នៅក្នុងវិស័យនេះ»។
លោកបានបន្តថា៖ «ខ្ញុំសង្ឃឹមថា ការចុះកិច្ចព្រមព្រៀងនេះនឹងផ្តល់នូវភាពងាយស្រួល ឆាប់រហ័ស និងសុវត្ថិភាពដល់វិនិយោគិនក្នុងការទូទាត់ថ្លៃសេវា ក៏ដូចជា ពន្លឿនដល់ការស្នើសុំលេខអត្តសញ្ញាណវិនិយោគិនតាមអនឡាញផងដែរ»។
លោកស្រី ម៉ារ អមរា បាននិយាយថា ដោយការវិនិយោគវិស័យមូលបត្រក្នុងផ្សារមូលបត្រកម្ពុជា មានកំណើនគួរឱ្យកត់សម្គាល់ ហើយដើម្បីបង្កើនទំនុកចិត្ត និងភាពងាយស្រួលដល់វិនិយោគិនក្នុងការបង់ថ្លៃសេវាស្នើសុំលេខអត្តសញ្ញាណវិនិយោគិន ធនាគារ អេស៊ីលីដា និង SERC បានឯកភាពគ្នាឈានដល់ការចុះហត្ថលេខាលើកិច្ចព្រមព្រៀងមួយនេះ។
លោកស្រីបន្ថែមថា តាមរយៈកិច្ចព្រមព្រៀងនេះវិនិយោគិនដែលមានបំណងចាប់ផ្ដើមការវិនិយោគនៅក្នុងផ្សារមូលបត្រកម្ពុជាអាចបង់ថ្លៃសេវាស្នើសុំលេខអត្តសញ្ញាណវិនិយោគិនតាមរយៈ ACLEDA Mobile និងប្រព័ន្ធ X-Pay និងបណ្ណអន្តរជាតិ ដូចជា VISA, Master Card, Diners, JCB, និង UPI Card។
លោកស្រីថ្លែងថា៖ «ធនាគារ អេស៊ីលីដា តែងតែយកចិត្តទុកដាក់ក្នុងការបម្រើអតិថិជនដោយបានធ្វើពិពិធកម្មផលិតផលសេវាកម្មធនាគារ និងហិរញ្ញវត្ថុយ៉ាងសម្បូរបែប ក៏ដូចជាការអភិវឌ្ឍប្រព័ន្ធធនាគារអេឡិចត្រូនិក និងប្រព័ន្ធបច្ចេកវិទ្យាហិរញ្ញវត្ថុឌីជីថល ដើម្បីបំពេញតម្រូវការរបស់អតិថិជន និងរួមចំណែកអភិវឌ្ឍទីផ្សារមូលបត្រកម្ពុជាឱ្យកាន់តែសកម្ម»។
បើយោងតាមលោក ស៊ូ សុជាតិ កន្លងមកស្ថាប័នរបស់លោកបានចុះកិច្ចព្រមព្រៀងនេះរួចហើយជាមួយធនាគារ ABA ក្នុងការសម្រួលដល់ការ-ទូទាត់ថ្លៃសេវានេះផងដែរ។
បើតាមរបាយការណ៍របស់ SERC នៅចុងត្រីមាសទី ៣ ឆ្នាំ ២០២២ SERC បានផ្តល់លេខអត្តសញ្ញាណវិនិយោគិនសរុបចំនួន ៣៣ ១៨៣ ក្នុងនោះវិនិយោគិនជារូបវន្តបុគ្គលចំនួន ៩៩,៥២ ភាគរយ និងវិនិយោគិនសញ្ជាតិខ្មែរមានចំនួន ៨៦,២៣ ភាគរយ៕