ភ្នំពេញៈ អ្នកនៅក្នុងឧស្សាហកម្មទេសចរណ៍កម្ពុជាបានស្វាគមន៍ចំពោះក្រុមហ៊ុនអាកាសចរណ៍តម្លៃទាបដែលទើបបង្កើតថ្មីគឺ AirAsia នៅកម្ពុជា ដើម្បីបម្រើការត្រឡប់មកវិញរបស់ភ្ញៀវទេសចរអន្តរជាតិ។
ការស្វាគមន៍នេះបានធ្វើឡើងបន្ទាប់ពីពេលថ្មីៗនេះ ក្រុមហ៊ុនអាកាសចរណ៍ AirAsia Aviation Group Limited (AAAGL) ដែលជាក្រុមហ៊ុនអាកាសចរណ៍របស់ Capital A Berhad កាលពីថ្ងៃទី ៩ ខែធ្នូ បានចុះហត្ថលេខាលើកិច្ចព្រមព្រៀងចូលហ៊ុនគ្នា (JV) ជាមួយក្រុមហ៊ុន Sivilai Asia ដើម្បីបង្កើតក្រុមហ៊ុន AirAsia Cambodia ដែលជាក្រុមហ៊ុនអាកាសចរណ៍តម្លៃទាបថ្មីនៅកម្ពុជា។ ការវិនិយោគរួមគ្នានេះត្រូវបានរំពឹងថានឹងចាប់ផ្តើមប្រតិបត្តិការនៅចុងឆ្នាំ ២០២៣។
ក្រុមហ៊ុនអាកាសចរណ៍ថ្មីនឹងអនុញ្ញាតឱ្យក្រុមហ៊ុន AAAGL ដំណើរការទៅកាន់ទីផ្សារដែលមានស្រាប់ផ្សេងៗទៀត។ ក្រុមហ៊ុន AirAsia Cambodia មានគោលបំណងជំរុញបន្ថែមទៀតនូវឧស្សាហកម្មអាកាសចរណ៍ និងទេសចរណ៍នៅកម្ពុជា។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ភ្នំពេញប៉ុស្តិ៍នៅថ្ងៃទី ១១ ខែធ្នូ ថា ខណៈសេដ្ឋកិច្ចពិភពលោក និងតំបន់កំពុងខិតខំស្តារឡើងវិញពីផលប៉ះពាល់នៃកូវីដ ១៩ និងការឈានទៅមុខនៃការប្រកួតប្រជែងភូមិសាស្ត្រនយោបាយ ការដែលមានក្រុមហ៊ុនដឹកជញ្ជូនក្នុងស្រុកបន្ថែម គឺនឹងដើរតួនាទីដ៏សំខាន់ដើម្បីទាក់ទាញភ្ញៀវទេសចរឱ្យបានច្រើនសម្រាប់ការងើបឡើងវិញនៃឧស្សាហកម្មទេសចរណ៍។
លោក ស៊ីណាន និយាយថា៖ «ខ្ញុំអាចនិយាយបានថា ហេតុអ្វីបានជាប្រទេសជិតខាងរបស់យើងដូចជា វៀតណាមគេតែងតែទទួលបានជោគជ័យក្នុងការទាក់ទាញភ្ញៀវទេសចរច្រើន គឺដោយសារពួកគេមានក្រុមហ៊ុនដឹកជញ្ជូនតម្លៃទាបច្រើនសម្រាប់បម្រើភ្ញៀវទេសចរ។ ដូច្នេះ នៅពេលយើងមានក្រុមហ៊ុន AirAsia ដែលជាក្រុមហ៊ុនមួយមានកេរ្តិ៍ឈ្មោះខ្លាំងនៅក្នុងតំបន់ វានឹងល្អខ្លាំងសម្រាប់ឧស្សាហកម្មទេសចរណ៍របស់យើង»។
លោក Tony Fernandes នាយកប្រតិបត្តិនៃក្រុមហ៊ុន Capital A បានឱ្យដឹងក្នុងពិធីចុះហត្ថលេខាថា Capital A នឹងបន្តផ្តោតលើអាស៊ានហើយកម្ពុជាជាប្រទេសអាស៊ានទី ៥ ដែលឈានមុខគេទាំងការដឹកភ្ញៀវ និងទំនិញ ក្នុងតំបន់ និងផ្តល់ជាចំណុចស្នូលនៃកំណើនសេដ្ឋកិច្ចសម្រាប់ប្រទេសក្នុងតំបន់អាស៊ាន។
លោកថ្លែងថា៖ «ឆ្នាំ ២០២២ គឺជាការចាប់ផ្ដើមក្រុមហ៊ុនអាកាសចរណ៍របស់យើងឡើងវិញទៅកាន់កម្រិតដូចមុនពេលមានកូវីដ ១៩។ ដោយសារកម្ពុជាជាទីផ្សារដែលយើងដឹងច្បាស់ និងជាកន្លែងដែលយើងមានហេដ្ឋារចនាសម្ព័ន្ធស៊ីជម្រៅ រួចហើយ ដូច្នេះយើងនឹងតភ្ជាប់បណ្តាញដ៏ធំរបស់យើងទៅកាន់គោលដៅសំខាន់ៗរបស់កម្ពុជា គឺរាជធានីភ្នំពេញ សៀមរាប និងខេត្តព្រះសីហនុ»។
នាយកនៃក្រុមហ៊ុន Sivilai Asia លោក Vissoth Nam ឱ្យដឹងថា កម្ពុជាជាប្រទេសក្នុងចំណោមប្រទេសដំបូងគេដែលបើកការធ្វើដំណើរជាអន្តរជាតិដោយមិនតម្រូវឱ្យធ្វើចត្តាឡីស័កតាំងពីខែវិច្ឆិកា ឆ្នាំ ២០២១ មកម្ល៉េះ ដោយកម្ពុជាបានដឹកនាំផ្លូវក្នុងការធ្វើដំណើរឡើងវិញតាមអាកាសរបស់អាស៊ានក្រោយជំងឺកូវីដ។
AAAGL ដំណើរការផ្លូវចំនួន ៥ មកកម្ពុជា ពីគូឡាឡាំពួរទៅកាន់ខេត្តសៀមរាប និងរាជធានីភ្នំពេញ, ពីទីក្រុងប៉េណាំងទៅភ្នំពេញ (ចាប់ផ្តើមថ្ងៃទី ៣ ខែមករា ឆ្នាំ ២០២៣) ព្រមទាំងពីបាងកក (ដុនមឿង) ទៅខេត្តសៀមរាប និងភ្នំពេញ។ ក្រុមហ៊ុនបានចាប់ផ្តើមចូលទីផ្សារកម្ពុជាក្នុងឆ្នាំ ២០០៥ ហើយក្រុមហ៊ុន AirAsia បានដឹកភ្ញៀវចូលមកកម្ពុជាជាង ១០ លាននាក់មកហើយ៕