.jpg)
ពិធីបុណ្យសមុទ្រលើកទី៩ នៅខេត្តព្រះសីហនុ កាលពីថ្ងៃទី ១០ ខែធ្នូ។ រូបថត សហការី
ភ្នំពេញៈ ភ្ញៀវទេសចរជាតិអន្តរជាតិ និងគណៈប្រតិភូអន្តរជាតិប្រមាណជាង ៧១ ម៉ឺននាក់បានធ្វើដំណើរមកទស្សនាខេត្តព្រះសីហនុក្នុងរយៈពេល ៣ ថ្ងៃ (ថ្ងៃទី ៩-១១ ខែធ្នូ)នៃព្រឹត្តិការណ៍បុណ្យសមុទ្រលើកទី ៩ ជុំទី ៣ ដែលនេះជាសញ្ញាល្អនៃការស្តារវិស័យទេសចរណ៍ឡើងវិញពីវិបត្តិកូវីដ ១៩។ នេះបើតាមលោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ។
ពិធីបុណ្យសមុទ្រលើកទី៩ ត្រូវរៀបចំនៅក្រុងព្រះសីហនុ ពីថ្ងៃទី ៩-១១ ខែធ្នូ ឆ្នាំ ២០២២ អមជាមួយនឹងការធ្វើជាម្ចាស់ផ្ទះរៀបចំមហាសន្និបាតក្លិបឆ្នេរសមុទ្រស្អាតបំផុតលើសកលលោក ចាប់ពីថ្ងៃទី ៩-១៤ ខែធ្នូ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»។
បុណ្យសមុទ្រ ត្រូវបានរៀបចំដោយឈរលើគោលការណ៍នៃការឆ្លាស់វេនគ្នានៅខេត្តតំបន់ឆ្នេរទាំង ៤ (ព្រះសីហនុ កោះកុង កំពត កែប) ក្នុងគោលបំណងផ្សព្វផ្សាយពីសក្តានុពលទេសចរណ៍នៃតំបន់ឆ្នេរសមុទ្រកម្ពុជា ព្រមទាំងជំរុញការយកចិត្តទុកដាក់កាន់តែខ្ពស់ពីភាគីពាក់ព័ន្ធ ផ្នែកឯកជន និងប្រជាពលរដ្ឋមូលដ្ឋានក្នុងការអភិរក្ស និងថែរក្សាធនធានធម្មជាតិ និងវប្បធម៌នៅតំបន់ឆ្នេរសមុទ្រកម្ពុជា។ បុណ្យសមុទ្រត្រូវបានខកខានរយៈពេល ២ ឆ្នាំ គឺឆ្នាំ ២០២០ និង ២០២១ ដោយសារការរាតត្បាតនៃជំងឺកូវីដ ១៩។
របាយការណ៍មន្ទីរទេសចរណ៍ខេត្តព្រះសីហនុ បង្ហាញថា ក្នុងព្រឹត្តិការណ៍បុណ្យសមុទ្រលើកទី ៩ ជុំទី ៣ ពីថ្ងៃទី ៩-១១ ខែធ្នូ គឺមានអ្នកចូលរួមសរុប ៧១២ ៦១៤ នាក់ កើនឡើង ២៩ ភាគរយបើធៀបរយៈពេល ៣ ថ្ងៃនៃពិធីបុណ្យសមុទ្រកាលពីឆ្នាំ ២០១៧ (ពេលក្រុងព្រះសីហនុធ្វើជាម្ចាស់ផ្ទះលើកចុងក្រោយ)។ នៅក្នុងចំណោមភ្ញៀវទាំងអស់ គឺភ្ញៀវជាតិ ៧០៨-៥៣៣នាក់ កើន ៣៣,៨ (៤៥-៥០ ភាគរយជាភ្ញៀវក្នុងខេត្ត) និងភ្ញៀវបរទេស ៤ ០៥៤ នាក់ ថយចុះ ៨០ ភាគរយ។
ដោយឡែកភ្ញៀវទៅកម្សាន្តតាមបណ្តាកោះ មាន ១ ១៧៣ នាក់ ដោយភ្ញៀវជាតិមាន ៦៦៦ នាក់ និងភ្ញៀវបរទេស ៥០៧ នាក់។ ភ្ញៀវទៅកម្សាន្តនៅតាមរមណីយដ្ឋានបណ្តាឆ្នេរ និងតន្ត្រីនានាសរុប ៧១១ ១២៣ នាក់ ក្នុងនោះភ្ញៀវជាតិ ៧០៧-៨៤៩នាក់ និងភ្ញៀវជនបរទេស ៣២៧៤ នាក់។
ថ្លែងប្រាប់ភ្នំពេញប៉ុស្តិ៍នាថ្ងៃទី ១២ ខែធ្នូ លោក តាំង សុចិត្រគ្រឹះស្នា ឱ្យដឹងថា ការគ្រប់គ្រងដោយជោគជ័យនៃការឆ្លងរាលដាលជំងឺកូវីដ ១៩, ការអភិវឌ្ឍហេដ្ឋារចនាសម្ព័ន្ធថ្មីៗ, ភាពស្រស់ស្អាតនៃឆ្នេរ និងបរិស្ថាន, សេវាកម្មប្រកបដោយទំនុកចិត្ត និងគ្រប់គ្រាន់, ព្រមទាំងកត្តាសុខសុវត្ថិភាពបានធ្វើឱ្យខេត្តព្រះសីហនុ ស្រូបទាញបានភ្ញៀវទេសចរផ្ទៃក្នុង និងអន្តរជាតិជាច្រើនក្នុងឱកាសនៃព្រឹត្តិការណ៍បុណ្យសមុទ្រលើកទី ៩ ជុំទី ៣ និងមហាសន្និបាតក្លិបឆ្នេរសមុទ្រដែលស្អាតបំផុតលើសកលលោកនាចុងឆ្នាំនេះ។ តាមរយៈព្រឹត្តិការណ៍ទាំង ២ នេះកម្ពុជារំពឹងថានឹងអាចទាក់ទាញចំណាប់អារម្មណ៍របស់ភ្ញៀវអន្តរជាតិកាន់តែច្រើនឱ្យធ្វើដំណើរមកកម្ពុជា។
ទោះយ៉ាងណា លោក សុចិត្រគ្រឹះស្នា អះអាងថា ដោយសារប្រទេសមួយចំនួននៅមិនទាន់បើកប្រទេសពេញលេញឡើងវិញ (វិធានការសូន្យកូវីដនៅប្រទេសចិន) និងជម្លោះភូមិសាស្ត្រនយោបាយ បានធ្វើឱ្យភ្ញៀវបរទេសមកចូលរួមព្រឹត្តិការណ៍ខាងលើមានចំនួនតិចតួច។
លោកនិយាយថា៖ «ទោះក្នុងព្រឹត្តិការណ៍ខាងលើមិនសូវមានភ្ញៀវអន្តរជាតិ ប៉ុន្តែខ្ញុំមានសុទិដ្ឋិនិយមថា បន្ទាប់ពីនេះខេត្តព្រះសីហនុនឹងទទួលបានភ្ញៀវបរទេស ព្រមទាំងការមកដល់កាន់តែច្រើននៃជើងហោះហើរ និងនាវាទេសចរណ៍ធំៗ»។
បើតាមលោក សុចិត្រគ្រឹះស្នា ក្នុងព្រឹត្តិការណ៍រយៈពេល ៣ ថ្ងៃខាងលើ គឺមានការប្រគំតន្ត្រី នៅតាមឆ្នេរសមុទ្រ ការតាំងពិព័រណ៍ពាណិជ្ជកម្ម ជាដើម។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានប្រាប់ថា ព្រឹត្តិការណ៍ធំៗ ២ ដែលធ្វើឡើងក្នុងពេលតែមួយក្នុងក្រុងព្រះសីហនុ គឺប្រៀបបាននឹងការទូងស្គរដ៏ឮប្រាប់ទៅអ្នកទេសចរលើពិភពលោកឱ្យដឹងពីភាពអស្ចារ្យដែលវិស័យទេសចរណ៍កម្ពុជាកំពុងបោះជំហានទៅមុខ បន្ទាប់ពីវិបត្តិជំងឺកូវីដ ១៩។ ព្រឹត្តិការណ៍នេះកំពុងទាក់ទាញភ្ញៀវអន្តរជាតិឱ្យមកទស្សនាកម្ពុជា។
លោកថ្លែងថា៖ «ព្រឹត្តិការណ៍នេះ គឺជាសញ្ញាបញ្ជាក់ពីពេលវេលាដែលភ្ញៀវបរទេសអាចធ្វើដំណើរមកកម្សាន្តនៅកម្ពុជាដោយសុវត្ថិភាព និងផាសុកភាព ខណៈកម្ពុជាបានត្រៀមរួចរាល់ក្នុងការទទួលភ្ញៀវអន្តរជាតិ»។
ស្ថិតិក្រសួងទេសចរណ៍បានឱ្យដឹងថា ចាប់ពីខែមករាតុលា ឆ្នាំ ២០២២ កម្ពុជាទទួលបានភ្ញៀវអន្តរជាតិសរុប ១៥៧៥-៩៥៤នាក់ កើនឡើង ៩៩១,១ ភាគរយបើធៀបនឹងរយៈពេលដូចគ្នាក្នុងឆ្នាំ ២០២១៕
