ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា រដ្ឋាភិបាលកម្ពុជាតែងយកចិត្តទុកដាក់យ៉ាងខ្លាំងទៅលើការទប់ស្កាត់ការកើនឡើងនៃតម្លៃអគ្គិសនី ព្រោះការកើនឡើងនៃតម្លៃអគ្គិសនីនឹងជះឥទ្ធិពលអវិជ្ជមានទៅដល់កម្រិតជីវភាពរបស់ប្រជាជន និងគ្រប់ចង្វាក់ផលិតកម្មរបស់រោងចក្រ/សហគ្រាសនៅកម្ពុជា។
នៅក្នុងដំណើរអញ្ជើញទៅធ្វើជាសហប្រធានក្នុងកិច្ចប្រជុំខួបអនុស្សាវរីយ៍អាស៊ាន-សហភាពអឺរ៉ុប ដែលត្រូវធ្វើឡើងនៅទីក្រុងប្រ៊ុចសែល នៅថ្ងៃទី១៤ ធ្នូ ខាងមុខ លោក ហ៊ុន សែន ដែលបានឆ្លៀតឱកាសជួបជាមួយនឹងប្រជាពលរដ្ឋខ្មែរមកពីបណ្ដាប្រទេសផ្សេងៗ នៅទីក្រុងប្រ៊ុចសែល ប្រទេសបែលហ្ស៊ិក កាលពីថ្ងៃទី១២ ខែធ្នូ បានលើកឡើងថា ទោះបីកម្ពុជាអនុវត្ដយន្ដការសេដ្ឋកិច្ចទីផ្សារសេរី ប៉ុន្ដែរាជរដ្ឋាភិបាលកំពុងចូលរួមយ៉ាងសកម្មក្នុងការទប់ស្កាត់ការកើនឡើងនៃតម្លៃអគ្គិសនី ដើម្បីបញ្ចៀសការឆ្លៀតឱកាសលួចដំឡើងតម្លៃអគ្គិសនី ខណៈការដំឡើងនេះ នឹងបង្កផលប៉ះពាល់យ៉ាងច្រើនដល់អ្នកប្រើប្រាស់នៅទូទាំងប្រទេស។ លោកបន្ថែមថា ទោះបីការកើនឡើងនៃតម្លៃប្រេង និងទីផ្សារធ្យូងថ្មីពិភពលោកធ្វើឱ្យអគ្គិសនីកម្ពុជាប្រឈមនឹងការខាតបង់ ប៉ុន្តែរដ្ឋាភិបាលមិនបានអនុញ្ញាតឱ្យមានការដំឡើងតម្លៃអគ្គិសនីនោះទេ។
លោកបានបញ្ជាក់ថា៖ «ខ្ញុំបាននិយាយហើយនិយាយទៀតជាមួយឹងអគ្គិសនីកម្ពុជា ជាមួយក្រសួងរ៉ែ និងថាមពល សុំឱ្យរក្សាតម្លៃអគ្គិសនី ហើយឱ្យក្រសួងពាណិជ្ជកម្មធ្វើការសម្របសម្រួល អត់មានឱ្យអ្នកឯងដំឡើងថ្លៃប្រេងតាមអំពើចិត្តទេ។ លើកនេះរាជរដ្ឋាភិបាលបើទោះបីសេដ្ឋកិច្ចទីផ្សារ ក៏ប៉ុន្ដែត្រូវតែមានការណែនាំមួយ បើមិនអ៊ីចឹងឆ្លៀតឱកាសប្រេងឡើងថ្លៃ ប្រេងចុះថ្លៃ គឺនាំគ្នាដំឡើង (តម្លៃអគ្គិសនី)»។
សេចក្តីជូនដំណឹងរបស់ក្រសួងពាណិជ្ជកម្ម បានកំណត់តម្លៃលក់រាយប្រេងឥន្ធនៈនៅតាមស្ថានីយនានា ពីថ្ងៃទី១១-២០ ខែធ្នូ ឆ្នាំ២០២២ ដោយប្រេងសាំងធម្មតា មានតម្លៃ ៤ ១០០រៀលក្នុង១លីត្រ(ចុះ ១០០រៀលធៀបនឹង១០ថ្ងៃមុន) និងម៉ាស៊ូត មានតម្លៃ ៤ ៤៥០រៀល ក្នុង១លីត្រ(ថយចុះ ២០០រៀល)។
លោកស្រី កែវ មុំ អគ្គនាយិកាក្រុមហ៊ុនផលិតនំស្រួយ លីលី បានប្រាប់ភ្នំពេញប៉ុស្តិ៍កាលពីថ្ងៃទី១៣ ខែធ្នូថា គ្រប់មុខជំនួញសុទ្ធតែត្រូវការប្រើប្រាស់ថាមពលអគ្គិសនីជាចាំបាច់ ហើយបើកាលណានិយាយពីអ្នកវិនិយោគបរទេសមុននឹងទៅបណ្តាក់ទុននៅប្រទេសណា សំណួរមុនគេ គឺអគ្គិសនីនៅទីនោះមានគ្រប់គ្រាន់ដែរ ឬទេ? តើអគ្គិសនីមានតម្លៃខ្ពស់ ឬទាប? លោកស្រីបញ្ជាក់ថា ការលើកឡើងរបស់លោកនាយករដ្ឋមន្ត្រី គឺពិតជាផ្តល់នូវទំនុកចិត្តយ៉ាងច្រើនសម្រាប់អ្នកវិនិយោគ ក៏ដូចជាអ្នកប្រើប្រាស់អគ្គិសនីនៅកម្ពុជាផងដែរ។
លោកស្រី៖ «អគ្គិសនីកាន់តែទាប ធ្វើឱ្យថ្លៃដើមផលិតកាន់តែទាប ដែលនឹងជួយធ្វើឱ្យសមត្ថភាពប្រកួតប្រជែងកាន់តែខ្ពស់ជាមួយនឹងទំនិញរបស់ប្រទេសនានាលើពិភពលោក»។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ការតាំងចិត្តរបស់ថ្នាក់ដឹកនាំរដ្ឋាភិបាលក្នុងការទប់ស្កាត់ការកើនឡើងតម្លៃថាមពល គឺពិតជាមានសារៈណាស់ក្នុងការរក្សានិរន្តរភាពសម្រាប់ប្រាក់ចំណូលគ្រួសារ កំណើនសេដ្ឋកិច្ច និងការទាក់ទាញអ្នកវិនិយោគថ្មីបន្ថែមទៀតឱ្យចូលមកបណ្តាក់ទុននៅកម្ពុជា។ ប្រសិនបើតម្លៃអគ្គិសនីអាចចុះបន្ថែមទៀតបើធៀបនឹងពេលបច្ចុប្បន្ន វាក៏ជាឱកាសមួយធ្វើឱ្យសមត្ថភាពប្រកួតប្រជែងរបស់ទំនិញកម្ពុជាលើទីផ្សារអន្តរជាតិមានកាន់តែខ្លាំងផងដែរ។
លោកបានបញ្ជាក់ថា៖«សម្រាប់អ្នកវិនិយោគ តម្លៃថាមពលពិតមានឥទ្ធិពលខ្លាំងទៅលើការសម្រេចចិត្តរបស់ពួកគេ ព្រោះវាកត្តាកំណត់សម្រាប់ថ្លៃដើមផលិតទាំងអស់»។
អគ្គនាយកអគ្គិសនីកម្ពុជា លោក កែវ រតនៈ កាលពីខែវិច្ឆិកា បានឱ្យដឹងថា បច្ចុប្បន្នរាជរដ្ឋាភិបាលកម្ពុជាមានបញ្ចេញប្រាក់ប្រមាណ ១២០លានដុល្លារក្នុង១ឆ្នាំ ឧបត្ថម្ភធនដល់វិស័យអគ្គិសនីដើម្បីធ្វើឱ្យមានតម្លៃទាប និងធានាការផ្គត់ផ្គង់ក្នុងប្រទេសបានពេញលេញ។ ការធ្វើឱ្យតម្លៃអគ្គិសនីមានតម្លៃទាប នឹងរួមចំណែកយ៉ាងច្រើនក្នុងការធ្វើឱ្យកម្រិតជីវភាពរបស់ប្រជាជនកាន់តែប្រសើរ៕
វីដេអូ៖