ភ្នំពេញៈ ប្រតិបត្តិការរបស់ធនាគារ និងគ្រឹះស្ថានមីក្រូហិរញ្ញវត្ថុកម្ពុជា បានបង្ហាញពីដំណើរការអាជីវកម្មដ៏រឹងមាំក្នុងត្រីមាសទី២ នៃឆ្នាំនេះ ដោយសារការស្ទុះងើបឡើងវិញយ៉ាងឆាប់រហ័សនៃសកម្មភាពអាជីវកម្មចាប់តាំងពីរាជរដ្ឋាភិបាលបានប្រកាសបើកដំណើរការសេដ្ឋកិច្ចសង្គមឡើងវិញពេញលេញនៅក្នុងខែវិច្ឆិកា ឆ្នាំមុន។
ធនាគារជាតិនៃកម្ពុជា (NBC) បានចេញផ្សាយរបាយការណ៍នាថ្ងៃទី ១១ ខែធ្នូ ឆ្នាំ ២០២២ បង្ហាញថា គិតត្រឹមដំណាច់ត្រីមាសទី២ ឆ្នាំ ២០២២ គ្រឹះស្ថានធនាគារ និងហិរញ្ញវត្ថុបានបង្កើនប្រាក់កម្ចីចំនួន ២១៦ ពាន់ពាន់លានរៀល (៥៣,១ ពាន់លានដុល្លារ) ដល់វិស័យឯកជន កើន ២៣,៦ ភាគរយធៀបចុងត្រីមាសទី ២ ឆ្នាំមុន។
ឥណទានដល់វិស័យឯកជនគ្របដណ្តប់លើសំណង់ចំនួន ៥៨,៤ ពាន់ពាន់លានរៀល (១៤,៦ ពាន់លានដុល្លារ)កើនឡើង ៣០ ភាគរយធៀបនឹងឆ្នាំមុនដែលមានចំនួន ៥៣,៥ ពាន់ពាន់លានរៀល (១៣,៣៧ ពាន់លានដុល្លារ) ចំពោះការជួញដូរដុំ និងរាយ កើនឡើង ២៥,៦ ភាគរយ សេវាកម្ម ២១,៣ ពាន់ពាន់លានរៀល (៥,៣២ ពាន់លានដុល្លារ) កើន ១៤,៥ ភាគរយ កសិកម្ម ២០,៣ ពាន់ពាន់លានរៀលកើន ២៤,៦ ភាគរយ, អង្គភាពគ្រួសារមានចំនួន ១១,៧ ពាន់ពាន់លានរៀល (២,៩២ ពាន់លានដុល្លារ) កើន ១២,១ ភាគរយ និងកម្មន្តសាលចំនួន ៧,២ ពាន់ពាន់លានរៀល (១,៨ ពាន់លានដុល្លារ) កើន ២៤,៣ ភាគរយ និងផ្សេងៗចំនួន ៤៣,៦ ពាន់លានរៀល (១០,៩ លានដុល្លារអាមេរិក) កើនឡើង ២០,៧ ភាគរយ។
NBC បានឱ្យដឹងថា៖ «ឥណទានគឺជាប្រភពទុនដ៏សំខាន់សម្រាប់គាំទ្រសកម្មភាពសេដ្ឋកិច្ច និងរួមចំណែកដល់វិស័យសំខាន់ៗដូចជា សំណង់ ការជួញដូរដុំ និងរាយ សេវាកម្ម កសិកម្មអង្គភាពគ្រួសារ និងកម្មន្តសាល»។
លោក តូច ចៅចេក អគ្គនាយកធនាគារប្រៃសណីយ៍ បានប្រាប់ភ្នំពេញប៉ុស្តិ៍នៅថ្ងៃទី ១៣ ខែធ្នូថា ដំណើរការទូទៅនៃឧស្សាហកម្មមួយនេះមានភាពល្អប្រសើរ ក្នុងត្រីមាសទី ១ ប៉ុន្តែធ្លាក់ចុះបន្តិចនៅក្នុងត្រីមាសទី ២។ ទោះជាយ៉ាងណាក៏ដោយជារួម សកម្មភាពសេដ្ឋកិច្ចរបស់កម្ពុជាកំពុងដំណើរការយ៉ាងល្អ បើទោះបីជាសេដ្ឋកិច្ចពិភពលោកមានភាពមិនច្បាស់លាស់ក៏ដោយ។
លោកថ្លែងថា៖ «ខ្ញុំសង្កេតឃើញថា ដំណើរការនៃឧស្សាហកម្មទាំងមូលមានភាពល្អ ដោយសារមានតម្រូវការសម្រាប់អាជីវកម្ម និងការវិនិយោគកាន់តែច្រើន ប៉ុន្តែគ្រាន់តែការសងត្រឡប់មានការយឺតយ៉ាវបន្តិច ប៉ុន្តែមិនមានហានិភ័យដល់ឧស្សាហកម្មនោះទេ»។
លោក ចៅចេក នៅតែមានសុទិដ្ឋិនិយមថា សកម្មភាពធុរកិច្ចរបស់កម្ពុជាមានភាពរឹងមាំនៅក្នុងត្រីមាសទី៤ នេះ។
លោកបន្ថែមថា៖ «យើងនឹងឃើញមានកំណើនបន្ថែមទៀតសម្រាប់ត្រីមាសចុងក្រោយទាំង ២ នេះ ដោយសារមានតម្រូវការដើមទុនកាន់តែច្រើនពីភាគីអាជីវកម្ម ជាពិសេសវិស័យឧស្សាហកម្មការជួញដូររាយ និងសេវាកម្ម»។
បច្ចុប្បន្នកម្ពុជាមានធនាគារពាណិជ្ជចំនួន ៥៦ (ធនាគាររួមបញ្ចូលគ្នាក្នុងស្រុកចំនួន ២៥ ធនាគារបុត្រសម្ព័ន្ធ ១៨ និងធនាគារសាខាបរទេស ១៣) ធនាគារឯកទេស ១០ (សហគ្រាសក្នុងស្រុកចំនួន ៤ និងធនាគារបរទេសចំនួន ៦) គ្រឹះស្ថានមីក្រូហិរញ្ញវត្ថុ ចំនួន ៨៤ (គ្រឹះស្ថានទទួលប្រាក់បញ្ញើ ចំនួន ៥ និងគ្រឹះស្ថានមីក្រូហិរញ្ញវត្ថុ ៧៩) ក្រុមហ៊ុនភតិសន្យា ចំនួន ១៧ ការិយាល័យតំណាងធនាគារបរទេស ៦ នៅកម្ពុជា ក្រុមហ៊ុនផ្តល់សេវាទូទាត់ចំនួន ៣០ និងប្រតិបត្តិករឥណទានជនបទចំនួន ២៣២៕