ភ្នំពេញៈ កម្ពុជាទទួលបាននូវកញ្ចប់ថវិកាជិត ៦៣ លានដុល្លារ ពីធនាគារអភិវឌ្ឍន៍អាស៊ី (ADB) ដើម្បីលើកកម្ពស់សន្តិសុខស្បៀង និងជំរុញកំណើនសេដ្ឋកិច្ចប្រកបដោយបរិយាប័ន្នក្នុងខេត្តចំនួន ៥ និងទីក្រុង ១ តាមរយៈការកែលម្អសុខភាព និងខ្សែចង្វាក់តម្លៃ ក៏ដូចជាការធ្វើពាណិជ្ជកម្មផ្លូវការ និងផលិតផលបសុសត្វ។
គម្រោងនេះនឹងត្រូវផ្តល់ហិរញ្ញប្បទានដោយប្រាក់កម្ចី ៥០ លានដុល្លារពីធនធានសម្បទានរបស់ ADB, ជំនួយមូលនិធិអភិវឌ្ឍន៍អាស៊ី (ADF) ចំនួន ១២ លានដុល្លារ និងជំនួយឥតសំណង ៩០០ ០០០ ដុល្លារ ពីមូលនិធិបម្រែបម្រួលអាកាសធាតុ (CCF)។ មូលនិធិអភិវឌ្ឍន៍អាស៊ីផ្តល់ជំនួយដល់ប្រទេសសមាជិកកំពុងអភិវឌ្ឍន៍ដែលក្រ និងងាយរងគ្រោះបំផុតរបស់ ADB ហើយមូលនិធិអភិវឌ្ឍន៍អាស៊ីមានគោលបំណងពង្រឹងការគាំទ្រដល់ការអភិវឌ្ឍប្រកបដោយកាបូនទាប និងភាពធន់នឹងអាកាសធាតុក្នុងប្រទេសសមាជិកកំពុងអភិវឌ្ឍន៍។
ធនាគារវិនិយោគហេដ្ឋារចនាសម្ព័ន្ធអាស៊ី (AIIB) នឹងផ្តល់ប្រាក់កម្ចី ៤៣ លានដុល្លារដល់គម្រោងនេះដែលចំនួននេះនឹងត្រូវគ្រប់គ្រងដោយ ADB។
ADB បានអនុម័តកញ្ចប់ថវិកាលានដុល្លារដើម្បីលើកកម្ពស់ផលិតកម្មបសុសត្វបត់បែនតាមអាកាសធាតុដែលជាវិធីសាស្ត្រធ្វើអន្តរកម្ម និងតម្រង់ទិសប្រព័ន្ធបសុសត្វឆ្លើយតបនឹងបម្រែបម្រួលអាកាសធាតុ ព្រមទាំងកាត់បន្ថយការបំភាយឧស្ម័នផ្ទះកញ្ចក់យ៉ាងច្រើន។
កញ្ចប់ថវិកានេះក៏នឹងគាំទ្រដល់ការអនុវត្តវិធីសាស្ត្រ One Health ដែលមានបំណងធ្វើឱ្យមានតុល្យភាពប្រកបដោយនិរន្តរភាព និងធ្វើឱ្យសុខភាពរបស់មនុស្សសត្វ និងប្រព័ន្ធអេកូឡូស៊ីកាន់តែប្រសើរ ពង្រឹងការចូលរួមរបស់វិស័យឯកជន និងជួយធ្វើអន្តរកម្មការគ្រប់គ្រងបសុសត្វឆ្ពោះទៅរកប្រព័ន្ធគ្រប់គ្រងបែបឌីជីថល និងសេវាកម្មព័ត៌មាន។
អ្នកជំនាញជាន់ខ្ពស់នៅផ្នែកបម្រែបម្រួលអាកាសធាតុរបស់ ADB ប្រចាំតំបន់អាស៊ីអាគ្នេយ៍ លោក Srinivasan Ancha បានឱ្យដឹងថា អនុវិស័យបសុសត្វមានសារៈសំខាន់ចំពោះជីវភាពរស់នៅតំបន់ជនបទ និងសន្តិសុខស្បៀងនៅកម្ពុជា។ វាក៏ផ្តល់ឱកាសច្រើនដល់កសិករលក្ខណៈគ្រួសាររួមទាំងស្ត្រី និងកសិអាជីវកម្មខ្នាតតូច-មធ្យម។
លោក Srinivasan Ancha ថ្លែងថា៖ «សត្វពាហនៈ និងក្របីស្ទើរតែទាំងអស់គឺជាកម្មសិទ្ធិរបស់កសិករលក្ខណៈគ្រួសារទោះបីផលិតកម្មជ្រូក និងបសុបក្សីកំពុងមានលក្ខណៈជាពាណិជ្ជកម្មកាន់តែខ្លាំងក៏ដោយ។ជំនួយរបស់ ADB នឹងអនុញ្ញាតឱ្យអនុវិស័យនេះអាចទាញយកសក្តានុពលនៃកំណើនខ្ពស់ នាំមកដោយការកើនឡើងនៃការប្រើប្រាស់សាច់ក្នុងស្រុកដែលកើតឡើងដោយសារកំណើនសេដ្ឋកិច្ចនគរូបនីយកម្ម ចំនួនប្រជាជនកើនឡើងឱកាសពាណិជ្ជកម្ម និងការធ្វើឱ្យប្រសើរក្នុងការគ្រប់គ្រងជំងឺ និងអាហារូបត្ថម្ភសម្រាប់សត្វ»។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម ធ្លាប់បានប្រាប់ភ្នំពេញប៉ុស្តិ៍ថា កម្ពុជាឥឡូវនេះអាចបំពេញតម្រូវការសាច់ជ្រូកក្នុងស្រុកបាន ១០០ ភាគរយ ពោលគឺកើនឡើងពី ៨៧ ភាគរយមុនពេលមានវិបត្តិកូវីដ ១៩ ហើយមិនបាននាំចូលជ្រូករស់ពីប្រទេសជិតខាងនោះទេ។
យោងតាម ADB គម្រោងកែលម្អសុខភាព និងខ្សែចង្វាក់តម្លៃបសុសត្វឆ្លងព្រំដែនក្នុងមហាអនុតំបន់មេគង្គ (GMS) នឹងផ្តល់អត្ថប្រយោជន៍ដោយផ្ទាល់ដល់គ្រួសារយ៉ាងហោច ៤០ ០០០ ក្នុងរាជធានីភ្នំពេញ, ខេត្តកំពង់ចាម, ឧត្តរមានជ័យ, ព្រៃវែង, សៀមរាប, និងតាកែវតាមរយៈការជំរុញការវិនិយោគលើហេដ្ឋារចនាសម្ព័ន្ធសមត្ថភាពស្ថាប័ន និងបច្ចេកទេស និងគោលនយោបាយគាំទ្រសំខាន់ៗ។ វាក៏នឹងអភិវឌ្ឍហេដ្ឋារចនាសម្ព័ន្ធក្នុងខេត្តកណ្តាល, កំពង់ធំ និងពោធិ៍សាត់ដើម្បីបំពេញតម្រូវការទូទាំងប្រទេសសម្រាប់វ៉ាក់សាំងបសុសត្វ និងការបង្កាត់ពូជសិប្បនិម្មិត៕