ភ្នំពេញៈ ក្រុមហ៊ុន Tanncam Investment Pte. Ltd ដែលមានមូលដ្ឋាននៅប្រទេសសិង្ហបុរី បានទិញភាគហ៊ុនក្រុមហ៊ុន realestate.com.kh របស់កម្ពុជា និងក្រុមហ៊ុន Fazwaz ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Digital Classified Group (DCG) មានមូលដ្ឋាននៅប្រទេសអូស្ត្រាលី សម្រាប់ការពង្រីកអាជីវកម្មរបស់ពួកគេទៅតំបន់អាស៊ីអាគ្នេយ៍។
យោងតាមសេចក្តីប្រកាសព័ត៌មានរបស់ក្រុមហ៊ុនកាលពីថ្ងៃទី ១៤ ខែធ្នូ Digital Classified Group (DCG) គឺជាក្រុមហ៊ុនអចលនទ្រព្យឈានមុខគេ មានមូលដ្ឋាននៅប្រទេសអូស្ត្រាលី និងជាប្រតិបត្តិករអចលនទ្រព្យអនឡាញ។ ក្រុមហ៊ុនបុត្រសម្ព័ន្ធរបស់ DCG រួមមានក្រុមហ៊ុន realestate.com.kh និងក្រុមហ៊ុន Fazwaz នៅកម្ពុជា ក្រុមហ៊ុន hausples.com.pg និងក្រុមហ៊ុន marketmeri នៅប្រទេសប៉ាពួអាស៊ីនូវែលហ្គីណេ ក្រុមហ៊ុន yula.la ក្រុមហ៊ុន lanloa.la នៅក្នុងប្រទេសឡាវ និងក្រុមហ៊ុន property.com.fj នៅប្រទេសហ្វីជី។ ក្រុមហ៊ុន Cambodian Investment Management(CIM) បានដើរតួនាទីជាទីប្រឹក្សាផ្នែកហិរញ្ញវត្ថុលើប្រតិបត្តិការសម្រាប់ក្រុមហ៊ុន Tanncam Investment Pte.Ltd។
ក្រុមហ៊ុន DCG ក៏មានកំណត់ត្រាតាមដានការអភិវឌ្ឍការចាត់ថ្នាក់អចលនទ្រព្យឈានមុខគេនៅក្នុងទីផ្សារកំពុងរីកចម្រើនមួយចំនួនចាប់តាំងពីឆ្នាំ ២០១៣ ហើយក្នុងរយៈពេលប៉ុន្មានឆ្នាំថ្មីៗនេះបានផ្លាស់ប្តូរគំរូអាជីវកម្មពីការផ្សាយពាណិជ្ជកម្មទៅជាសេវាកម្មប្រតិបត្តិការដើម្បីបង្កើនល្បឿនកំណើនរបស់ខ្លួន។ ការវិនិយោគនេះនឹងពង្រឹងទីតាំងឈរជើងរបស់ DCG នៅក្នុងទីផ្សារទាំងអស់ក្នុងនាមជាប្រតិបត្តិករឈានមុខគេនៃចំណាត់ថ្នាក់អចលនទ្រព្យនៅក្នុងទីផ្សារជួរមុខអាស៊ី។
លោក Mathew Care អគ្គនាយកក្រុមហ៊ុន DCG Group បានស្វាគមន៍ការចូលរួមរបស់ Tanncam ដើម្បីក្លាយជាម្ចាស់ភាគហ៊ុនដែលនឹងជួយកែលម្អអាជីវកម្មរបស់ក្រុមហ៊ុន។
លោកថ្លែងថា៖ «ទាំងនេះគឺជាពេលវេលាដ៏គួរឱ្យរំភើបសម្រាប់ក្រុមហ៊ុនរបស់យើង ដោយសារអាជីវកម្មទទួលបានភាពទាក់ទាញឡើងវិញក្រោយការរីករាលដាលជំងឺកូវីដ ១៩។ យើងកំពុងទទួលបានកំណើនដ៏រឹងមាំ និងការកើនឡើងច្រើននៅក្នុងមូលដ្ឋានគ្រឹះនៃផលប័ត្ររបស់យើង។ យើងស្វាគមន៍ Tanncam ក្នុងនាមជាម្ចាស់ភាគហ៊ុន ដោយសារពួកគេជាវិនិយោគិនដែលបានបង្កើតឡើងជាមួយនឹងបច្ចេកវិទ្យាដ៏ទំនើប»។
លោក Anthony Galliano នាយកក្រុមហ៊ុន Tanncam Investment Pte. Ltd និងជាអគ្គនាយក CIM បាននិយាយថា DCG បានបង្ហាញពីសមត្ថភាពពិសេសមួយក្នុងការចូលទៅក្នុងទីផ្សារ បង្កើតទីតាំងឈរជើងឈានមុខគេនៅក្នុងលម្ហរបស់ពួកគេ។
លោកលើកឡើងថា៖ «យើងកំពុងវិនិយោគលើអ្វីដែលយើងជឿថា ជាអនាគតដ៏ជោគជ័យ។ យើងមានក្រុមការងារគ្រប់គ្រងដ៏រឹងមាំ និងផលបត្រជោគជ័យដែលត្រៀមរួចរាល់សម្រាប់កំណើនជាបន្ត។ ក្រុមហ៊ុន DCG ស្ថិតលើផ្លូវដ៏អស្ចារ្យ នៃដំណើរដ៏មិនគួរឱ្យជឿរបស់ខ្លួន ហើយយើងរីករាយក្នុងការរួមចំណែកក្នុងបញ្ហានេះ»៕