ភ្នំពេញៈ កម្ពុជា និងសហភាពអឺរ៉ុប បានសន្យាជាថ្មីថា នឹងពង្រឹងទំនាក់ទំនងពាណិជ្ជកម្ម និងវិនិយោគទ្វេភាគី បើទោះបីសេដ្ឋកិច្ចធ្លាក់ចុះដោយសារតែការរីករាលដាលជំងឺកូវីដ ១៩ ក៏ដោយ។ សហភាពអឺរ៉ុប គឺជាដៃគូពាណិជ្ជកម្មឈានមុខគេរបស់កម្ពុជានៅក្នុងឆ្នាំ ២០១៨ ដែលមានចំនួន ៤៥ ភាគរយនៃការនាំចេញរបស់កម្ពុជាក្នុងឆ្នាំនោះ ហើយ ៩៥,៧ ភាគរយនៃទំនិញទាំងនោះបានចូលក្នុងប្លុកនេះ ក្រោមផែនការទំនិញគ្រប់យ៉ាងលើកលែងតែអាវុធ (EBA)។ ជារួមកម្ពុជា គឺជាប្រទេសប្រើប្រាស់ការអនុគ្រោះពន្ធ EBA ច្រើនជាងគេទី ២ បន្ទាប់ពីប្រទេសបង់ក្លាដែស។
ដោយឡែកសម្រាប់ពាណិជ្ជកម្មទ្វេភាគីរវាងកម្ពុជា-អ៊ីតាលី ដែលជាសមាជិកសហភាពអឺរ៉ុបផងដែរនោះ គឺនៅមានកម្រិតទាបបើធៀបនឹងប្រទេសសមាជិកដទៃទៀត។ លោក Paolo Dionisi ឯកអគ្គរដ្ឋទូតទើបតែងតាំងថ្មីនៃប្រទេសអ៊ីតាលីប្រចាំនៅកម្ពុជា ដែលមាននិវេសនដ្ឋាននៅទីក្រុងបាងកក ក្នុងដំណើរបំពេញទស្សនកិច្ចនៅកម្ពុជាកាលពីថ្ងៃទី ១២ ខែធ្នូ បានជួបសម្ភាសដោយ លោក ម៉ៃ គុណមករា ការីនិពន្ធព័ត៌មានសេដ្ឋកិច្ចនៃកាសែតភ្នំពេញប៉ុស្តិ៍ដើម្បីពិភាក្សាអំពីបេសកកម្មរបស់លោកក្នុងការជំរុញពាណិជ្ជកម្ម និងការវិនិយោគរវាងប្រជាជាតិទាំង ២ ឱ្យកាន់តែរីកចម្រើន ១ កម្រិតទៀត។
តើលោកអាចលើកឡើងដោយសង្ខេបអំពីស្ថានភាពទំនាក់ទំនងការទូតរវាងកម្ពុជានិងអ៊ីតាលីនាពេលបច្ចុប្បន្ន?
រដ្ឋាភិបាលអ៊ីតាលីមានទំនាក់ទំនងល្អ និងមិត្តភាពជាមួយប្រទេសអាស៊ីអាគ្នេយ៍ជាច្រើន រួមទាំងកម្ពុជាដែរ។ ការពង្រឹងទំនាក់ទំនងរបស់យើងកាន់តែស៊ីជម្រៅលើគ្រប់វិស័យ គឺជាគោលបំណងសំខាន់ដែលខ្ញុំបានប្តេជ្ញាចិត្តយ៉ាងពេញលេញក្នុងការសម្រេចឱ្យបាន។ ដើម្បីសម្រេចបានតាមទិសដៅនេះ មិនត្រឹមតែយើងអាចទទួលបានអត្ថប្រយោជន៍ពីសម្ទុះដ៏អស្ចារ្យដែលបង្កើតឡើងដោយកម្ពុជាជាប្រធានអាស៊ានក្នុងឆ្នាំ ២០២២ ប៉ុណ្ណោះទេ ប៉ុន្តែយើងទន្ទឹងចាំឱកាសនាពេលអនាគតសម្រាប់កិច្ចសន្ទនាទ្វេភាគីកាន់តែស៊ីជម្រៅនៅកម្រិតសហភាពអឺរ៉ុប ដោយចាប់ផ្តើមពីកិច្ចប្រជុំកំពូលអាស៊ាន និងសហភាពអឺរ៉ុបនៅទីក្រុងប្រ៊ុចសែល (ប្រទេសបែលហ្ស៊ិក)។
បើយើងក្រឡេកមើលទំនាក់ទំនងសេដ្ឋកិច្ច ខ្ញុំគិតថា ការផ្លាស់ប្តូរពាណិជ្ជកម្មរបស់យើងនៅមានកម្រិតទាបបើធៀបនឹងប្រទេសផ្សេងទៀតនៅអឺរ៉ុប តើលោកនឹងមានគម្រោងអ្វីដើម្បីកែលម្អទំនាក់ទំនងសេដ្ឋកិច្ចរវាងប្រទេសទាំង ២ ឬទេ?
ជាការពិត ទំហំពាណិជ្ជកម្មរវាងប្រទេសទាំង ២ នៅមានកម្រិត ប៉ុន្តែខ្ញុំរីករាយក្នុងការកត់សម្គាល់ថាតម្លៃពាណិជ្ជកម្មសរុបបានកើនឡើងមិនត្រឹមតែនៅក្នុងឆ្នាំ ២០២១ ប៉ុណ្ណោះទេបើធៀបឆ្នាំ ២០២០ (កើនឡើង ១២ ភាគរយ) ដែលនេះគឺបង្ហាញពីនិន្នាការវិជ្ជមានរួចទៅហើយ មុនការរីករាលដាលជំងឺកូវីដ ១៩ កាលពីឆ្នាំ ២០១៩។
ខណៈការណ៍នេះគឺជាមូលដ្ឋានគ្រឹះដ៏ល្អ ដោយខ្ញុំជឿថា ឱកាសសម្រាប់ការកើនឡើងគឺនៅតែមានទំហំធំទាំងនៅក្នុងកម្រិតទ្វេភាគី និងស្ថាប័ន EU។ យើងនឹងប្រឹងប្រែងឱ្យអស់ពីសមត្ថភាពដើម្បីកាត់បន្ថយឧបសគ្គចំពោះបរិយាកាសពាណិជ្ជកម្មសេរី និងចម្រុះឱ្យកាន់តែប្រសើរជាងមុន។
តើលោកគិតថា វិស័យសក្តានុពលអ្វីខ្លះដែលវិនិយោគិន ឬពាណិជ្ជករអ៊ីតាលីអាចសម្លឹងមកកម្ពុជា?
កម្ពុជាគឺជាទីផ្សារដ៏មានឥទ្ធិពលមួយ ហើយកំពុងទាក់ទាញការចាប់អារម្មណ៍កាន់តែខ្លាំងពីសំណាក់វិនិយោគិន និងអាជីវកម្មជាច្រើននៅអ៊ីតាលី។ ក្នុងន័យនេះស្ថានទូតនឹងបន្តគាំទ្រសកម្មភាពរបស់ «សមាគមធុរកិច្ចកម្ពុជាអ៊ីតាលី» ដែលគ្រោងនឹងពង្រីកសមាជិកភាព និងសកម្មភាពជាច្រើននៅក្នុងរយៈពេលប៉ុន្មានខែខាងមុខ។
ខ្ញុំក៏កំពុងធ្វើការលើការច្របាច់បញ្ចូលគ្នាដែលអាចធ្វើទៅបាននៃស្ថាប័ននេះជាមួយសភាពាណិជ្ជកម្មអ៊ីតាលីដែលកំពុងប្រតិបត្តិការរួចហើយនៅប្រទេសថៃ ដើម្បីឱ្យមានមូលដ្ឋានកាន់តែធំនៃក្រុមហ៊ុនអ៊ីតាលីធ្វើប្រតិបត្តិការក្នុងប្រទេសកម្ពុជា។
សេដ្ឋកិច្ចប្រទេសកម្ពុជាអាចផ្តល់ឱកាសវិនិយោគដ៏អស្ចារ្យសម្រាប់អាជីវកម្មរបស់យើងក្នុងវិស័យផ្សេងៗដូចជា សំណង់ អាហារ និងភេសជ្ជៈ គ្រឿងចក្រឧស្សាហកម្ម និងកសិកម្ម ឱសថ ការរចនា និងគ្រឿងសង្ហារិម ម៉ូដទាន់សម័យ ទេសចរណ៍ និងវិស័យដទៃទៀត។
ក្នុងនាមឯកអគ្គរដ្ឋទូតថ្មីនៃប្រទេសអ៊ីតាលី រួមជាមួយនឹងទីភ្នាក់ងារ និងស្ថាប័នអ៊ីតាលីទាំងអស់ដែលកំពុងមានប្រតិបត្តិការនៅទីនេះ ខ្ញុំប្តេជ្ញានឹងជួយសហគ្រិនអ៊ីតាលីក្នុងការស្វែងរកទីផ្សារថ្មីនេះ និងចាប់យកឱកាសដ៏អស្ចារ្យដែលប្រទេសនេះមាន។
កាលពីខែមករា ឆ្នាំ ២០២១ ប្រទេសកម្ពុជាបានចាប់ផ្តើមដំណើរការ ការទូតសេដ្ឋកិច្ចក្នុងគោលបំណងលើកកម្ពស់ពាណិជ្ជកម្ម ការវិនិយោគ វប្បធម៌ និងទេសចរណ៍ជាមួយពិភពខាងក្រៅ។ តើលោកគិតថា គំនិតផ្តួចផ្តើមនេះអាចរួមចំណែកលើកកម្ពស់ទំនាក់ទំនងសេដ្ឋកិច្ចរបស់យើងដែរ ឬទេ?
ខ្ញុំគិតថា វិធីសាស្ត្រដ៏ទូលំទូលាយនៅពីក្រោយគំនិតផ្តួចផ្តើមរបស់កម្ពុជានេះគឺត្រឹមត្រូវ ហើយខ្ញុំសូមអបអរសាទរដល់រាជរដ្ឋាភិបាលកម្ពុជាសម្រាប់សកម្មភាពមួយនេះ។
ប្រទេសអ៊ីតាលីមានចក្ខុវិស័យស្រដៀងគ្នាខ្លាំងណាស់ក្នុងការលើកកម្ពស់ប្រព័ន្ធសេដ្ឋកិច្ចរបស់ខ្លួននៅបរទេស ដែលបានដំណើរការជិត ១ ឆ្នាំកន្លងមក យុទ្ធនាការ «BeIT» មានគោលបំណងលើកកម្ពស់ និងបង្ហាញអំពីទេពកោសល្យដ៏ល្អបំផុតរបស់យើង។ នៅក្នុងក្របខ័ណ្ឌនេះយើងក៏នឹងផ្សព្វផ្សាយព្រឹត្តិការណ៍ និងគំនិតផ្តួចផ្តើមថ្មីៗនៅកម្ពុជា ដែលខ្ញុំប្រាកដថានឹងពង្រឹងទំនាក់ទំនងវប្បធម៌រវាងប្រជាជនទាំង ២ ជាមួយនឹងការផ្តល់ផលជាវិជ្ជមានទាក់ទងនឹងការផ្លាស់ប្តូរទេសចរ និងសេដ្ឋកិច្ចផងដែរ។
ប្រទេសកម្ពុជាបានធ្វើពិពិធកម្មទីផ្សារនាំចេញទំនិញរបស់ខ្លួនទៅបណ្ដាប្រទេសលោកខាងលិច និងតំបន់។ ថ្មីៗនេះ កម្ពុជាទើបតែអនុវត្តកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េខាងត្បូង ព្រមទាំងកិច្ចព្រមព្រៀង RCEP ផងដែរ។ តើលោកមានអ្វីដើម្បីលើកទឹកចិត្តវិនិយោគិនអ៊ីតាលីឱ្យមកវិនិយោគនៅកម្ពុជាដើម្បីបានអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីទាំងនោះ?
ប្រាកដណាស់ថា លទ្ធភាពនៃការប្រើប្រាស់កិច្ចព្រមព្រៀងនេះនឹងបើកទីផ្សារកាន់តែច្រើនឡើងៗលើពិភពលោកដែលធ្វើឱ្យប្រទេសកម្ពុជាកាន់តែមានភាពទាក់ទាញសម្រាប់ក្រុមហ៊ុនអ៊ីតាលីកាន់តែច្រើនឡើង។ ខ្ញុំជឿជាក់ថា ប្រទេសអ៊ីតាលីនឹងមានវត្តមាន និងមានសកម្មភាពកាន់តែខ្លាំងនៅក្នុងប្រទេសកម្ពុជា និងក្នុងប្រទេសអាស៊ានផ្សេងទៀតនាពេលដ៏ខ្លីខាងមុខនេះជាមិនខាន៕