.jpg)
លំនៅឋានតម្លៃសមរម្យសម្រាប់ក្រុមគ្រួសារដែលមានចំណូលទាប និងមធ្យម។ រូបថត Worldbridge Home Page
ភ្នំពេញៈ First Finance ជាស្ថាប័នដំបូងគេនៅកម្ពុជាដែលទទួលបានឥណទានចំនួន ៧ លានដុល្លារពីស្ថាប័នអន្តរជាតិ ២ គឺ GuarantCo និងស្ថាប័ន Cargill Financial Services International ដើម្បីផ្តល់ហិរញ្ញប្បទានលំនៅឋានតម្លៃសមរម្យដល់ក្រុមគ្រួសារដែលមានចំណូលទាប និងមធ្យម។
យោងតាមសេចក្តីប្រកាសព័ត៌មានរបស់ GuarantCo កាលពីថ្ងៃទី ១៤ ខែធ្នូ ការផ្តល់ហិរញ្ញប្បទាននេះ គឺជាប្រតិបត្តិការដំបូងរបស់ខ្លួននៅកម្ពុជា និងជាការផ្តល់ប្រាក់កម្ចីសង្គមលើកដំបូងនៅប្រទេសកម្ពុជា ដោយសារតែក្រុមហ៊ុន First Finance បានប្តេជ្ញាចិត្តថា នឹងប្រើប្រាស់ប្រាក់នេះស្របតាមក្របខ័ណ្ឌហិរញ្ញប្បទានសង្គមរបស់ខ្លួនដោយផ្អែកលើគោលការណ៍កម្ចីសង្គមរបស់សមាគមទីផ្សារប្រាក់កម្ចីរបស់ស្ថាប័នវាយតម្លៃឥណទាន Moody។
លោក Layth AlFalaki អគ្គនាយកក្រុមហ៊ុន GuarantCo បានឱ្យដឹងថា ការផ្តល់ហិរញ្ញប្បទាននេះ នឹងរួមចំណែកក្នុងការផ្តល់ហិរញ្ញប្បទានលំនៅឋានតម្លៃសមរម្យដល់គ្រួសារ ដែលមានចំណូលទាប និងមធ្យមក្នុងប្រទេសកម្ពុជា។ ស្ថាប័ននេះនឹងពង្រីកទៅកាន់ស្ថាប័នដទៃទៀតនាពេលអនាគត។
លោកថ្លែងថា៖ «យើងមានក្តីសោមនស្សរីករាយចំពោះប្រតិបត្តិការដំបូងនៅប្រទេសកម្ពុជា និងដើម្បីគាំទ្រដល់ការផ្តល់ហិរញ្ញប្បទានលំនៅឋានតម្លៃសមរម្យរបស់ First Finance ដល់គ្រួសារដែលមានចំណូលទាប និងមធ្យមនៅកម្ពុជា។ យើងសង្ឃឹមថា ប្រតិបត្តិការប្រកបដោយនវានុវត្តន៍នេះ នឹងបង្កើនការយល់ដឹងជាមួយនឹងការធានាប្រាក់កម្ចី និងដំណោះស្រាយបំណុលរយៈពេលវែងសម្រាប់កម្ពុជា ហើយជាចុងក្រោយនាំឱ្យមានឆន្ទៈកាន់តែខ្លាំងក្នុងការពង្រីកការផ្តល់ហិរញ្ញប្បទានដល់ស្ថាប័នស្រដៀងគ្នានេះផងដែរ ដើម្បីរួមចំណែកអភិវឌ្ឍទីផ្សារមូលធននៅកម្ពុជា»។
លោក ស៊ីម សេនាជាតិ អគ្គនាយក First Finance បានឱ្យដឹងថា ការទទួលបានប្រាក់កម្ចីនេះ គឺមិនត្រឹមតែបង្ហាញពីសមត្ថភាពរបស់ First Finance ក្នុងការពង្រីកប្រតិបត្តិការរបស់ខ្លួនឆ្លើយតបទៅនឹងតម្រូវការទីផ្សារប៉ុណ្ណោះទេ ប៉ុន្តែថែមទាំងបង្ហាញទំនុកចិត្ត និងភាពជឿជាក់ដែលស្ថាប័នរបស់លោកបានបង្កើតឡើងជាមួយសមាជិក និងវិនិយោគិនក្នុងស្រុក និងអន្តរជាតិទៀតផង។
លោកលើកឡើងថា៖ «First Finance ប្តេជ្ញាប្រើប្រាស់កម្ចីរបស់ GuarantCo ដើម្បីផ្តល់ហិរញ្ញប្បទានលំនៅឋាន ដែលមានតម្លៃសមរម្យដល់ក្រុមគ្រួសារដែលមានចំណូលទាប និងមធ្យមឱ្យបានប្រមាណ ៤៧០ គ្រួសារនៅក្នុងប្រទេសកម្ពុជា ដើម្បីបង្កើនគុណភាពនៃជីវភាពរស់នៅរបស់ពួកគេ។ ស្ថិរភាពនៃភាពជាម្ចាស់ផ្ទះអនុញ្ញាតឱ្យគ្រួសាររស់នៅក្នុងស្ថានភាពមានអនាម័យ និងមានសុខភាពកាន់តែល្អជាងមុន ដូច្នេះពួកគេអាចចំណាយពេលវេលា និងថាមពលទៅលើទិដ្ឋភាពផ្សេងទៀតនៃជីវិតរបស់ពួកគេ។ វាអនុញ្ញាតឱ្យកុមារមានទឹកស្អាត និងអនាម័យ ដើម្បីរក្សាសុខភាព និងអាចសិក្សាបាន ខណៈស្ត្រីអាចចាប់ផ្តើមអាជីវកម្ម ឬការងារផ្ទាល់ខ្លួនផងដែរ»។
GuarantCo នឹងពង្រីកទំហំកម្ចីរបស់ខ្លួនឱ្យដល់ ២២ លានដុល្លារក្នុងរយៈពេល ២ ឆ្នាំ។ក្រសួងរៀបចំដែនដី បានប៉ាន់ប្រមាណថា ប្រជាជនកម្ពុជា ៧,៩ លាននាក់ នឹងរស់នៅក្នុងទីក្រុងត្រឹមឆ្នាំ ២០៣០ កើនពី ៤,៥ លាននាក់បើធៀបនឹងឆ្នាំ ២០១៤។ រដ្ឋាភិបាលមានផែនការប្រកបដោយមហិច្ឆតាដើម្បីបំពេញតម្រូវការផ្ទះថ្មី ដែលមានតម្លៃសមរម្យប្រមាណ ៥៥ ០០០ ក្នុង ១ ឆ្នាំ៕
