.jpg)
យន្តហោះចុះចតនៅអាកាសយានដ្ឋានខេត្តព្រះសីហនុ កាលពីឆ្នាំ ២០២១។ ហុង មិនា
ភ្នំពេញៈ មន្ត្រីអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិលកម្ពុជា (SSCA) បានស្វាគមន៍ចំពោះផែនការពង្រីកការវិនិយោគរបស់ក្រុមហ៊ុនព្រលានយន្តហោះ Vinci Airports ដែលជាក្រុមហ៊ុនមេក្រុមហ៊ុន Cambodia Airports នៅព្រលានយន្តហោះអន្តរជាតិព្រះសីហនុទៅកម្រិត 4E Full ដែលជាការបើកផ្លូវទទួលយន្តហោះមកពីទិសដៅឆ្ងាយៗមកកាន់ខេត្តនៃតំបន់ឆ្នេរមួយនេះ។
ផែនការនៃការពង្រីកការវិនិយោគលើអាកាសយានដ្ឋានអន្តរជាតិព្រះសីហនុត្រូវបានលើកឡើងដោយលោក Nicolas Notebeart អគ្គនាយកក្រុមហ៊ុន Vinci Airports ជាមួយលោកនាយករដ្ឋមន្ត្រី ហ៊ុន សែន ខណៈលោកនាយករដ្ឋមន្ត្រីទៅធ្វើទស្សនកិច្ចការងារនៅប្រទេសបារាំង កាលពីថ្ងៃទី ១៣ ខែធ្នូ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជាអំពីលទ្ធផលនៃដំណើរទស្សនកិច្ចការងាររបស់លោកនាយករដ្ឋមន្ត្រី ហ៊ុន សែន ទៅប្រទេសបារាំង បានលើកឡើងពីជំនួបរវាងលោកនាយករដ្ឋមន្ត្រី និងលោក Nicolas ដែលបានថ្លែងថា ខ្លួនមានគម្រោងពង្រីកទ្រង់ទ្រាយធំព្រលានយន្តហោះអន្តរជាតិខេត្តព្រះសីហនុដែលនឹងចាប់ផ្តើមនៅដើមឆ្នាំ ២០២៣ ខាងមុខ។
លោក ស៊ិន ចាន់សិរីវុត្ថា អ្នកនាំពាក្យ SSCA បានប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែធ្នូថា សម្រាប់គម្រោងពង្រីកនេះគឺត្រូវបានធ្វើទៅតាមផែនការមេដែលក្រុមហ៊ុនបានគ្រោងទុក ដើម្បីអភិវឌ្ឍព្រលានខេត្តព្រះសីហនុឱ្យមានលទ្ធភាពពេញលេញអាចទទួលប្រភេទយន្តហោះធំៗមកពីគោលដៅឆ្ងាយៗ។
លោកថ្លែងបញ្ជាក់ថា៖ «តាមពិតទៅគម្រោងនៃការពង្រីកព្រលានយន្តហោះខេត្តព្រះសីហនុនេះគឺមានក្នុងផែនការមេទាំងអស់ ប៉ុន្តែដោយសារការផ្ទុះរីករាលដាលជំងឺកូវីដ ១៩ បានធ្វើឱ្យគម្រោងវិនិយោគនានាមានភាពយឺតយ៉ាវ ព្រោះក្រុមហ៊ុនត្រូវពិចារណាឡើងវិញដោយសារតម្រូវការនៃការប្រើប្រាស់អាកាសយានដ្ឋានធ្លាក់ចុះគ្រប់ព្រលានទាំងអស់នៅលើពិភពលោក»។
លោកបន្ថែមទៀតថា៖ «សម្រាប់ជំនួបរបស់ថ្នាក់ដឹកនាំយើងនិងខាងក្រុមហ៊ុនថ្មីៗនេះ ខ្ញុំគិតថា ក្រុមហ៊ុននឹងចាប់ផ្តើមធ្វើការអនុវត្តផែនការមេរបស់ខ្លួនឡើងវិញ ដោយគាត់ត្រូវពង្រីកឱ្យដល់កម្រិត 4E Full ដោយសាររាល់ថ្ងៃ គឺព្រលាននេះត្រឹមកម្រិត 4E ដែរ ប៉ុន្តែអត់ Full។ សម្រាប់ 4E Full គឺមានលទ្ធភាពទទួលប្រភេទយន្តហោះមកពីទិសដៅឆ្ងាយៗដូចនៅព្រលានសៀមរាបថ្មី»។
ប៉ុន្តែទោះយ៉ាងណា លោកពុំទាន់បានទទួលព័ត៌មានលម្អិតអំពីផែនការនៃ ការពង្រីករបស់ក្រុមហ៊ុននៅឡើយទេ។
កាលពីថ្ងៃទី ២៧ ខែមិថុនា ឆ្នាំ ២០១៨ ក្រុមហ៊ុនព្រលានយន្តហោះ Cambodia Airports ដែលកាន់កាប់ភាគហ៊ុនធំដោយក្រុមហ៊ុន Vinci Airports បានបើកដំណើរការសាកល្បងការធ្វើទំនើបកម្មហេដ្ឋារចនាសម្ព័ន្ធនានានៅព្រលានយន្តហោះនេះ ដែលជាការឆ្លើយតបនឹងកំណើននៃភ្ញៀវទេសចរ។
ក្រុមហ៊ុន Cambodia Airports គឺជាការវិនិយោគរួមរវាងក្រុមហ៊ុន Vinci Airports របស់បារាំងកាន់កាប់ភាគហ៊ុន ៧០ ភាគរយ និងក្រុមហ៊ុន Muhibbah Masteron Cambodia កាន់កាប់ភាគហ៊ុន ៣០ ភាគរយ ដែលជាការវិនិយោគរួមរវាងវិនិយោគិនកម្ពុជា-ម៉ាឡេស៊ី។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានឱ្យដឹងថា រយៈពេល ៣ ថ្ងៃ (ថ្ងៃទី ៩-១១ខែធ្នូ) នៃព្រឹត្តិការណ៍បុណ្យសមុទ្រលើកទី៩ ជុំទី៣ មានភ្ញៀវទេសចរជាតិ-អន្តរជាតិ និងគណៈប្រតិភូអន្តរជាតិប្រមាណ ៧០ ម៉ឺននាក់បានធ្វើដំណើរមកទស្សនាខេត្តព្រះសីហនុ៕
