ប្រជាពលរដ្ឋទៅលេងខេត្តសៀមរាប ក្នុងឳកាសឆ្លងឆ្នាំ កាលពីឆ្នាំមុន។ ហុង មិនា
ភ្នំពេញៈ ស្របពេលឱកាសបុណ្យចូលឆ្នាំសកល ២០២៣ នឹងឈានចូលមកដល់នាពេលខាងមុខ បណ្តាខេត្តគោលដៅទេសចរណ៍សំខាន់ៗកំពុងរៀបចំកម្មវិធីនានាដើម្បីទាក់ទាញទេសចរជាតិនិងអន្តរជាតិឱ្យទៅកម្សាន្ត និងទស្សនារមណីយដ្ឋាននានាក្នុងខេត្តរៀងៗខ្លួន។
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់ភ្នំពេញប៉ុស្តិ៍នៅថ្ងៃទី ១៨ ខែធ្នូថា នៅក្នុងឱកាសបុណ្យចូលឆ្នាំសកលនាពេលខាងមុខ ក្នុងក្រុងកំពតក្រៅពីមានតាំងលម្អភ្លើងតាមផ្លូវសាធារណៈ អាជ្ញាធរក៏នឹងរៀបចំឱ្យមានការប្រគំតន្ត្រីនៅតាមគោលដៅធំៗចំនួន ៣ ទីតាំង, ការប្រណាំងទូកនេសាទ, ការសម្តែងដោយប្រើម៉ាស៊ីនហោះលើអាកាស (អ្នកបញ្ជាជិះ), ការបាញ់កាំជ្រួច និងបង្ហោះគោមនៅព្រែកកំពតផងដែរ។
លោកបន្តថា ដោយសារឆ្នាំនេះរដ្ឋាភិបាលបើកទូលាយឱ្យប្រជាជនក្នុងស្រុក និងភ្ញៀវទេសចរអន្តរជាតិអាចធ្វើដំណើរកម្សាន្តដោយសេរី ដូច្នេះចំនួនភ្ញៀវធ្វើដំណើរមកកម្សាន្តខេត្តកំពត រួមទាំងរមណីយដ្ឋាននានាប្រាកដជាមានចំនួនច្រើនបើធៀបនឹងអំឡុងឆ្លងឆ្នាំ ២០២១-២០២២ កន្លងមក។
លោកបញ្ជាក់ថា៖ «តាមរយៈអ្វីដែលកម្ពុជាកំពុងសម្រេចបាននៅពេលនេះ ខ្ញុំគិតថា ក្នុងអំឡុងបុណ្យឆ្លងឆ្នាំខាងមុខនឹងមានភ្ញៀវទេសចរជាច្រើនធ្វើដំណើរមកកម្សាន្តក្នុងខេត្តកំពត»។
លោកបន្ថែមថា នៅពេលនេះរដ្ឋបាលខេត្ត និងមន្ត្រីជំនាញក្នុងខេត្តកំពុងខិតខំជំរុញការងាររៀបចំបុណ្យឆ្លងឆ្នាំពេលខាងមុខឱ្យទទួលជោគជ័យ។ សម្រាប់កន្លែងស្នាក់នៅ លោកគិតថា នឹងមិនមានបញ្ហាទេ ព្រោះបច្ចុប្បន្នក្រៅពីមានបន្ទប់ស្នាក់នៅ (សណ្ឋាគារ ផ្ទះសំណាក់ និងបាងហ្គាឡូ) ប្រមាណ ៤ ៧០០ បន្ទប់ ក៏មានកន្លែងសម្រាប់បោះតង់ផងដែរ។
លោក ស៊ីណុល ប្រាប់ទៀតថា ក្រៅពីការងាររៀបចំនៅតាមទីតាំងសាធារណៈក្នុងខេត្ត មន្ត្រីមន្ទីរទេសចរណ៍របស់ខេត្តក៏បានចុះជាប្រចាំទៅតាមទីតាំងកម្សាន្ត កន្លែងស្នាក់នៅ និងរមណីយដ្ឋាន ដើម្បីណែនាំម្ចាស់ទីតាំងឱ្យចូលរួមអនុវត្តវិធានការមួយចំនួនដូចជា ការប្រយុទ្ធប្រឆាំងនឹងជំងឺកូវីដ ១៩ ការថែក្សាបរិស្ថាន ការធ្វើបដិសណ្ឋារកិច្ច សុវត្ថិភាពចំណីអាហារ និងកុំឱ្យដំឡើងថ្លៃខ្ពស់ ជាដើម។
ចំណែកប្រធានមន្ទីរទេសចរណ៍ខេត្តសៀមរាប លោក ងូវ សេងកាក់ បានឱ្យដឹងថា បច្ចុប្បន្នអាជ្ញាធរខេត្តកំពុងរៀបចំតាំងលម្អភ្លើងនៅតាមកន្លែងកម្សាន្តក្នុងខេត្តជាច្រើនដើម្បីបង្កលក្ខណៈឱ្យការដើរកម្សាន្តនាពេលខាងមុខមានភាពរីករាយ និងមានសុវត្ថិភាព។ សម្រាប់បុណ្យឆ្លងនាំ ២០២៣ ខាងមុខ ក្រុងសៀមរាបនឹងរៀបចំការប្រគំតន្ត្រីនៅទីតាំងសំខាន់ៗមួយចំនួនដូចជា តំបន់មាត់ស្ទឹងសៀមរាប អង្គរឃ្យុងយូ និងតំបន់ផាប់ស្ទ្រីត ជាដើម។ ភ្ញៀវមកកម្សាន្តក្នុងខេត្តសៀមរាបឆ្នាំនេះអាចនឹងមានចំនួនច្រើនជាងឆ្នាំមុន ព្រោះបច្ចុប្បន្នចំនួនភ្ញៀវទេសចរបរទេស និងភ្ញៀវក្នុងស្រុក ដែលមកកម្សាន្តនៅខេត្តក៏កើនឡើងច្រើនផងដែរ។
លោកថ្លែងថា៖ «យើងត្រៀមរួចស្រេចសម្រាប់ទទួលភ្ញៀវមកកម្សាន្តនៅក្នុងឱកាសបុណ្យចូលឆ្នាំសកល ដែលនៅសល់ ២ សប្តាហ៍ទៀត។ ក្រុងសៀមរាបពេលនេះ ក៏មានហេដ្ឋារចនាសម្ព័ន្ធផ្លូវថ្នល់ល្អ និងមានច្រើនខ្សែផងដែរ»។
ប្រធានមន្ទីរទេសចរណ៍ខេត្តរតនគិរី លោក ង៉ែត ពិទូ បានប្រាប់ថា ការអភិវឌ្ឍហេដ្ឋារចនាសម្ព័ន្ធរបស់រដ្ឋាភិបាល បានជួយធ្វើឱ្យខេត្តនៅភូមិភាគឦសានទទួលបានកំណើនភ្ញៀវទេសចរជាបន្តបន្ទាប់ ដោយគិតរហូតមកដល់ពេលនេះក្នុងខេត្តរតនគិរី មានសណ្ឋាគារ ១៤ និងផ្ទះសំណាក់ ៣៥ ដែលមានបន្ទប់ស្នាក់នៅជិត ១ ៤០០ បន្ទប់។ លោកបន្តថា នៅថ្ងៃឆ្លងឆ្នាំ ២០២២ ខាងមុខ នៅខេត្តរតនគិរី ក៏នឹងមានរៀបចំការប្រគំតន្ត្រី បង្ហោះគោម និងបាញ់កាំជ្រួច។
លោកថ្លែងថា៖ «យើងរំពឹងថានឹងមានភ្ញៀវច្រើនមកកម្សាន្តនៅខេត្តរតនគិរីនាថ្ងៃចុងឆ្នាំនេះ ប៉ុន្តែសម្រាប់ការស្នាក់នៅ គឺមិនហ៊ាននិយាយទេ ព្រោះដោយសារហេដ្ឋារចនាសម្ព័ន្ធផ្លូវថ្នល់ល្អប្រសើរ គឺភ្ញៀវអាចធ្វើការចល័តពីខេត្ត ១ ទៅខេត្ត ១ ដោយឆាប់រហ័ស»។
លោកប្រាប់ទៀតថា ដើម្បីបរិស្ថាន និងភាពទាក់ទាញ អាជ្ញាធរខេត្តបានកំណត់យករសៀលថ្ងៃសុក្រនៃសប្តាហ៍នីមួយៗសម្រាប់មន្ទីរ/អង្គភាពនានាក្នុងខេត្តសម្អាតទីសាធារណៈ ដែលធ្វើឱ្យរតនគិរីនៅពេលនេះមានសម្រស់ធម្មជាតិកាន់តែស្រស់បំព្រង៕
