ទីផ្សារអចលនទ្រព្យនៅខេត្តព្រះសីហនុ ដែលធ្លាប់ទទួលការប៉ះទង្គិចខ្លាំងដោយសារជំងឺកូវីដ ១៩ នាពេលកន្លងមកនោះ ចាប់ផ្តើមមានចលនាឡើងវិញបន្តិចម្តងៗ។ នេះបើតាមអ្នកជំនាញដែលរកស៊ីខាងអចលនទ្រព្យនៅខេត្តនេះ។
ទាក់ទិននឹងសកម្មភាពអចលនទ្រព្យក្នុងខេត្តនេះលោក ឌិត ចណ្ណា អគ្គនាយកក្រុមហ៊ុន Lucky Real Estate និងជាក្រុមហ៊ុនទីភ្នាក់ងារអចលនទ្រព្យ នៅក្នុងខេត្តព្រះសីហនុ បានលើកឡើងថា បច្ចុប្បន្នស្ថានភាពទីផ្សារអចលនទ្រព្យនៅខេត្តព្រះសីហនុ ហាក់មានសភាពធូរស្បើយនិងល្អប្រសើរបន្តិចឡើងវិញ ពិសេសក្រោយផ្លូវល្បឿនលឿនបើកឱ្យដំណើរការ ដែលនាំឱ្យសកម្មភាពទេសចរក្នុងស្រុកទៅកម្សាន្តខេត្តនេះកាន់តែច្រើនឡើង។
លោកថា បច្ចុប្បន្ននេះវិនិយោគិនចិនមួយចំនួន ក៏បានចាប់ផ្តើមសាងសង់អគារដែលជាប់គាំងពីមុនឡើងវិញគម្រោងខ្លះក៏កំពុងសាងសង់ ខណៈគម្រោងខ្លះក៏សាងសង់បញ្ចប់ បូករួមទាំងក្រសួងស្ថាប័នពាក់ព័ន្ធក៏ចាប់ផ្តើមដោះស្រាយពីបញ្ហាគម្រោងអគារជាប់គាំងក្នុងខេត្តនេះថែមទៀត។
លោកបញ្ជាក់ដូច្នេះថា៖« បើយើងប្រៀបធៀបកាលពីបិទប្រទេសអំឡុងកូវីដ-១៩ ពោលគឺឆ្នាំ២០២០ និងឆ្នាំ២០២១ តម្លៃដីមានតំបន់ខ្លះមិនសូវខ្ពស់និងមានការស្រុតចុះបន្តិចនៅតំបន់មួយចំនួន ប៉ុន្តែនៅតំបន់មួយចំនួនទៀតគឺអត់ស្រុតចុះទេគឺនៅរក្សាតម្លៃដដែល ថ្វីដ្បិតតែការទិញលក់មិនសូវសម្បូរដូចមុន តែតម្លៃវិញមិនចុះប៉ុន្មាននោះទេដូចជាតំបន់ទីប្រជុំជនជាដើម»។
លោកថា តម្លៃដីធ្លីនៅតែមានតម្លៃខ្ពស់ ជាក់ស្តែងនៅតំបន់ល្អៗទីប្រជុំជន ដូចជា តំបន់ឆ្នេរឯករាជ្យទៅរង្វង់មូលតោ តំបន់រង្វង់មូលតោទៅឆ្នេរអូរឈើទាល តំបន់ម្តុំសណ្ឋាគារសុខាជាដើម គឺតម្លៃខ្ពស់បំផុតចាប់ពី៣ ០០០-៣ ៥០០ដុល្លារក្នុង១ម៉ែត្រការ៉េ ទៅតាមទំហំដីតូច ឬដីធំ។ ជាមួយគ្នានេះ តំបន់ជាយក្រុងវិញ មានតម្លៃចាប់ពី២ ០០០-២ ៥០០ដុល្លារ ក្នុង១ម៉ែត្រការ៉េ ហើយតំបន់ចុះពីជាយក្រុងវិញ គឺមានតម្លៃចាប់ពី១ ០០០ដុល្លារ-១ ៥០០ដុល្លារជាដើម។
ទន្ទឹមនឹងការលើកឡើងនេះដែរអ្នកនាង រិទ្ធ ដារីកា ទីភ្នាក់ងារលក់អចលនទ្រព្យក្នុងខេត្តព្រះសីហនុ បានលើកឡើងដែរថា ពេលជំងឺកូវីដស្ថិតក្នុងស្ថានភាពអាចគ្រប់គ្រងបានឃើញថាតម្រូវការជួលផ្ទះ ខុនដូនិងទីតាំងដើម្បីបើកអាជីវកម្មផ្សេងៗនាពេលនេះបានកើនឡើងចន្លោះពី២០ទៅ៣០ភាគរយបើធៀបនឹងកាលពីដើមឆ្នាំ។
កញ្ញាបន្តថ្លែងថា៖«ពាណិជ្ជករចិនបានវិលត្រឡប់មកខេត្តព្រះសីហនុវិញជាបណ្តើរៗហើយអ្វីដែលសំខាន់នោះគឺភាគច្រើននៃអ្នកចូលមកពេលនេះគឺជាវិនិយោគិនដែលមានទាំងអាជីវករខ្នាតតូច និងមធ្យម ដូចជាម្ចាស់ភោជនីយដ្ឋាន អាហារដ្ឋាននិងហាងលក់ទំនិញ»។
ចំណែកឯ លោក ឈុន មករា ជាម្ចាស់ផ្ទះសំណាក់ និងអ្នករកស៊ីក្នុវិស័យអចលនទ្រព្យក្នុងខេត្តព្រះសីហនុ បានលើកឡើងដែរថាថ្វីដ្បិតថា កន្លងមកការងើបឡើងវិញនៃចំនួនភ្ញៀវទេសចរ បានរួមចំណែកដ៍៏សំខាន់ ជួយបង្កើនតម្រូវការជួលទីតាំងធ្វើអាជីវកម្មនិងកន្លែងស្នាក់នៅក្តី ប៉ុន្តែបើក្រឡេកមកមើលទីផ្សារទិញលក់ដីធ្លីនៅមិនទាន់មានសកម្មភាពខ្លាំងដូចទីផ្សារជួលនៅឡើយ។
លោកថា ៖«មានវិនិយោគិនកាន់តែច្រើនឡើងៗចាប់ផ្តើមសាកសួរពីហាងឆេងតម្លៃដីធ្លីដែលនេះអាចជាសញ្ញាល្អសម្រាប់សកម្មភាពទិញលក់នាពេលខ្លីខាងមុខ»។
គួរបញ្ជាក់ដែរថា បើតាមរបាយកាណ៍ពីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា រយៈពេល ៩ខែដើមឆ្នាំ២០២២ ក្រសួងបានផ្ដល់លិខិតអនុញ្ញាតសាងសង់ទូទាំង ប្រទេសចំនួន ៣ ១៧៦ គម្រោងមានទុនវិនិយោគប្រមាណ ១ ៩៦៣ លានដុល្លារសហរដ្ឋអាមេរិក ក្នុងនោះ បានផ្តល់លិខិតអនុញ្ញាតសាងសង់គម្រោងអគារខ្ពស់ៗ ចាប់ពី ៥ជាន់ ឡើង មានចំនួន ៩៨ គម្រោង ស្មើនឹង ១០០ អគារ ដែលក្នុងនោះ ខេត្តព្រះសីហនុមានចំនួន១១គម្រោង។ដោយឡែក វិស័យសំណង់ក្នុងខេត្ដព្រះសីហនុបើគិតចាប់តាំងពីឆ្នាំ២០១៧ រហូតដល់ខែវិច្ឆិកា ឆ្នាំ២០២១ មានសំណង់សរុប ១ ៦៦១ គម្រោង ជាមួយទុនវិនិយោគ មានប្រមាណជាង ៨ ៤០០ លានដុល្លារអាមេរិក។ក្នុងនោះសំណង់អគារខ្ពស់ចាប់ពី ៥ ជាន់ រហូតដល់ ៥៣ ជាន់ គឺមានចំនួន ៦២០ គម្រោង។
ទោះជាបែបណាក្ដី អ្នកជំនាញនៅទទួចឱ្យអាជ្ញាធររដ្ឋាភិបាលដោះស្រាយចំពោះសំណង់អគារដែលសង់មិនទាន់រួចរាប់រយកន្លែង។មន្ត្រីរាជរដ្ឋាភិបាលធ្លាប់បង្កើតក្រុមការងារដោះស្រាយបញ្ហាសំណង់សង់មិនទាន់រួចនេះ ប៉ុន្តែមិនទាន់អាចដោះស្រាយបាននៅឡើយ៕