ភ្នំពេញៈ លោក សុខ ដារ៉ា អគ្គនាយកនៃនិយ័តករបរធនបាលកិច្ច(TR) បានប្រាប់ភ្នំពេញប៉ុស្តិ៍ថា ចំនួនបរធនបាលកិច្ចដែលបានចុះបញ្ជីបានកើនពីចំនួន ១៧ ករណីជាមួយទំហំបរធនប្រមាណ ១៥៦ លានដុល្លារនៅឆ្នាំ ២០២១ ដល់ចំនួន ៣០០ ករណីជាមួយនឹងទំហំបរធនប្រមាណ ៤២៦ លានដុល្លារគិតត្រឹមថ្ងៃទី ១៦ ខែធ្នូ នៅឆ្នាំ ២០២២ នេះដែលឆ្លុះបញ្ជាំងពីទំនុកចិត្តរបស់វិនិយោគិន និងការចាប់ផ្តើមយល់ដឹងរបស់សាធារណៈមកលើវិស័យនេះ។
លោក សុខ ដារ៉ា អគ្គនាយកនិយ័តករបរធនបាលកិច្ច (TR) បានឱ្យ ភ្នំពេញ ប៉ុស្តិ៍ ដឹងនៅថ្ងៃទី ១៩ ខែធ្នូថា ការកើនឡើងនៃបរធុនបាលកិច្ចបានឆ្លុះបញ្ចាំងអំពីការចាប់ផ្តើមយល់ដឹងពីសាធារណជន និងវិនិយោគិន ក្នុងការទទួលបានការគាំពារ និងការអនុលោមទៅតាមច្បាប់ដើម្បីបញ្ចៀសនូវហានិភ័យផ្សេងៗពីការវិនិយោគរបស់ខ្លួន។
លោកបន្ថែមថា កាលពីឆ្នាំ ២០២១ TR មាន ១៧ បរធុនបាលកិច្ច (Trust) ដែលបានចុះបញ្ជីជាមួយទំហំបរធុន ១៥៦ លានដុល្លារ។ ចំនួនចុះបញ្ជីបានបន្តកើនឡើងមកដល់ត្រឹមថ្ងៃទី ១៦ ខែធ្នូនេះមានបរធនបាលកិច្ចកើនឡើងដល់ ៣០០ ករណី (សំដៅទៅលើប្រតិបត្តិការដែលបានកើតឡើង) ជាមួយទំហំបរធនបាលកិច្ច (Trust Fund) កើនដល់ ៤២៦ លានដុល្លារ។
លោកថ្លែងថា៖ «វិស័យនេះកើនឡើងដោយសារយើងមើលទៅលើចំនួនប្រតិបត្តិការ ឬសកម្មភាពដែលគេធ្វើពឹងផ្អែកទៅលើយន្តការនេះ។ កាលពីមុនយើងមានចំនួនតិច ប៉ុន្តែឥឡូវនេះគឺចំនួនបានបង្កើនប្រតិបត្តិការតាមរយៈចំនួនចុះបញ្ជីដែលយើងឃើញនេះ។ ប៉ុន្តែនេះគ្រាន់តែតួលេខបណ្តោះអាសន្ន គឺយើងនៅមានបន្តទៀត»។
យោងតាមលោក ដារ៉ា បរធនបាលកិច្ច គឺសំដៅលើម្ចាស់លុយ (Trust creators) គាត់ផ្ទេរលុយរបស់គាត់ទៅឱ្យបរធុនបាល (Trustee) ដើម្បីធ្វើការគ្រប់គ្រង ឬធ្វើការចាត់ចែង និងធ្វើការថែរក្សាជំនួសដែលបង្កើតទៅជាអត្ថប្រយោជន៍សម្រាប់ភាគីទី ៣ ឬមកម្ចាស់ទ្រព្យវិញដែលនេះហើយហៅថា Trust។ លោកបានលើកឧទាហរណ៍ពន្យល់ថា វិនិយោគិនមួយគាត់ចង់វិនិយោគទៅលើវិស័យអចលនទ្រព្យ ដូច្នេះគាត់អាចផ្ទេរលុយ ១ លានដុល្លារទៅឱ្យអ្នកជំនាញដែលជា Trustee នោះធ្វើការគ្រប់គ្រង ឬចាត់ចែងវិនិយោគជំនួសគាត់ ហើយពេលបានចំណេញគឺឱ្យចំណេញទៅគាត់វិញ ដូច្នេះការងារនេះគេហៅថា Property/Real-estate Trust។
សម្រាប់ឆ្នាំ ២០២៣ TR នឹងផ្តោតឱ្យមានការយល់ដឹងជាសាធារណៈកាន់តែទូលំទូលាយថា យន្តការ ឬប្រតិបត្តិការបរធនបាលកិច្ចនេះវាមានសារៈសំខាន់ណាស់ ដោយសារវាអាចជួយវិនិយោគិន ច្រើនដែលគាត់មិនអាចធ្វើការវិនិយោគដោយខ្លួនឯងផ្ទាល់នៅក្នុងវិស័យណាមួយពាក់ព័ន្ធនោះ គាត់អាចប្រើយន្តការឱ្យនរណាម្នាក់ឈរឈ្មោះជំនួសគាត់ ហើយគាត់នៅតែទទួលបានផលប្រយោជន៍ ជាពិសេសគឺមានការទុកចិត្ត ដោយសារតែពេលចុះបញ្ជីទៅគឺនឹងផ្តល់ទំនុកចិត្ត ដោយសារមានការឃ្លាំមើលពីនិយតករ និងមានអនុលោមភាពតាមច្បាប់ដែលបញ្ចៀសហានិភ័យប្រតិបត្តិការបានច្រើនដែលជាយន្តការមានប្រសិទ្ធភាពខ្ពស់ខ្លាំង។
ជាមួយគ្នានេះដែរ TR នឹងធ្វើការលើកទឹកចិត្តដល់វិនិយោគិន និងតួអង្គពាក់ព័ន្ធនានាដែលមានបំណងធ្វើការវិនិយោគ ឬសុំអាជ្ញាប័ណ្ណត្រូវចុះបញ្ជីនៅ TR ឱ្យបានត្រឹមត្រូវដើម្បីបញ្ចៀសនូវហានិភ័យនៃការវិនិយោគនានា៕