.jpg)
សកម្មភាពសេដ្ឋកិច្ចកម្ពុជាកំពុងដំណើរការល្អនាពេលបច្ចុប្បន្ន។ ហុង មិនា
ភ្នំពេញៈ កម្ពុជាទទួលបានឥណទានចំនួន ២៧៤ លានដុល្លារពីធនាគារពិភពលោក ដើម្បីជំរុញការស្តារឡើងវិញនៃសេដ្ឋកិច្ចពីវិបត្តិនាពេលថ្មីៗនេះដែលបណ្តាលមកពីការរីករាលដាលនៃវិបត្តិជំងឺកូវីដ ១៩ អស់រយៈពេលជាង ២ ឆ្នាំមកនេះ។
ធនាគារដែលមានមូលដ្ឋាននៅទីក្រុងវ៉ាស៊ីនតោនមួយនេះបានឱ្យដឹងថា ក្រុមប្រឹក្សានាយកប្រតិបត្តិរបស់ខ្លួនកាលពីថ្ងៃទី ២០ ខែធ្នូ បានអនុម័តលើការផ្តល់ហិរញ្ញប្បទានសម្រាប់ប្រទេសកម្ពុជាព្រោះវានឹងរួមចំណែកក្នុងការជំរុញកំណើនសេដ្ឋកិច្ច និងពង្រឹងភាពធន់របស់កម្ពុជា។
ធនាគារនេះ បានឱ្យដឹងថា ហិរញ្ញប្បទាននេះ ទ្រទ្រង់ដល់កំណែទម្រង់នឹងសម្រួលដំណើរការចុះបញ្ជីអាជីវកម្ម លើកកម្ពស់ការប្រកួតប្រជែង និងពង្រីកលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម។
កំណែទម្រង់ផ្សេងទៀតនឹងបង្កើនភាពធន់នឹងសារពើពន្ធ រួមទាំងការកែលម្អការ គ្រប់គ្រងភាពជាដៃគូរវាងផ្នែកសាធារណៈ និងឯកជន និងការសម្រួលដល់ការលក់បំណុលរបស់រដ្ឋាភិបាលនៅក្នុងទីផ្សារក្នុងស្រុក។
លោកស្រី ម៉ារៀម សាលីម ប្រធានគ្រប់គ្រងរបស់ធនាគារពិភពលោកប្រចាំកម្ពុជា បាន ឱ្យដឹងថា ខណៈដែលយុទ្ធសាស្ដ្រ«រស់នៅជាមួយកូវីដ១៩» បានជួយស្ដារសេដ្ឋកិច្ចឱ្យរើបឡើង វិញក៏ពិតមែន ប៉ុន្តែកម្ពុជានៅតែងាយរងគ្រោះដោយសារតែចរន្តធ្លាក់ចុះតម្រូវការក្រៅប្រទេស និងការរអាក់រអួលនានានៅក្នុងខ្សែចង្វាក់ផ្គត់ផ្គង់នៅឡើយ។
លោកស្រីថ្លែងថា៖ «ប្រតិបត្តិការរបស់ហិរញ្ញប្បទានមួយនេះ នឹងជួយកម្ពុជាក្នុងការជំរុញភាពប្រកួតប្រជែងរបស់ផ្នែកឯកជន ពង្រឹងស្ថានភាពសារពើពន្ធរបស់កម្ពុជា និងផ្ដល់ ជំនួយដល់ប្រជាជនងាយរងគ្រោះបំផុតរបស់ខ្លួន»។
ធនាគារមួយនេះបានចង្អុលបង្ហាញថា សេដ្ឋកិច្ចរបស់កម្ពុជាបានរងការខូចខាតធ្ងន់ធ្ងរពីជំងឺរាតត្បាតកូវីដ ១៩ ដោយធ្វើឱ្យផលិតផលក្នុងស្រុកសរុបបានធ្លាក់ចុះដក ៣,១ ភាគរយក្នុងឆ្នាំ ២០២០ ដែលជាការធ្លាក់ចុះដ៏ខ្លាំងលើកដំបូងក្នុងរយៈពេល ៣០ ឆ្នាំចុងក្រោយនេះ។ ការវិភាគទិន្នន័យបានបង្ហាញ ថា អត្រានៃភាពក្រីក្របានកើនឡើងចំនួន ២,៨ ភាគរយ រុញមនុស្សប្រហែលជា ៤៦០ ពាន់នាក់ ឱ្យធ្លាក់ក្នុងភាពក្រីក្រវិញ។
រដ្ឋាភិបាលបានឆ្លើយតបយ៉ាងរហ័ស និងប្រកបដោយប្រសិទ្ធភាពទៅនឹងជំងឺរាតត្បាត តាមរយៈអន្តរាគមន៍ជួយដល់អាជីវកម្ម និងគ្រួសារងាយរងគ្រោះ ប៉ុន្តែដោយសារតែចំណាយពាក់ព័ន្ធមានការកើនឡើង រដ្ឋាភិបាលចាំបាច់ត្រូវពង្រឹងមូលដ្ឋានសារពើពន្ធឱ្យបានរឹងមាំ ចាប់ពីពេលនេះទៅមុខទៀត។ «ទោះបីជាសេដ្ឋកិច្ចបានងើបឡើងវិញនៅឆ្នាំ ២០២១ និង ២០២២ មែនក្ដី បរិយាកាសចុះខ្សោយនៅខាងក្រៅ មានន័យថា លទ្ធភាពវិលទៅទទួលបានអត្រាកំណើនដ៏រឹងមាំដែលធ្លាប់មាននៅមុនការផ្ទុះជំងឺរាតត្បាត ពិតជានឹងមិនងាយរកបានទេ។
សង្គ្រាមដែលនៅបន្តមានក្នុងប្រទេសអ៊ុយក្រែន ការធ្លាក់ចុះនៃសេដ្ឋកិច្ចនៅអាមេរិក ដែលជាទីផ្សារនាំចេញដ៏ធំបំផុតរបស់កម្ពុជា និងកំណើននៅក្នុងប្រទេសចិន កត្តាទាំងអស់នេះនឹងជះឥទ្ធិពលមិនល្អមកលើទស្សនវិស័យពាណិជ្ជកម្មរបស់កម្ពុជា។ ប្រទេសនេះក៏ងាយរងគ្រោះខ្លាំងពីផលប៉ះពាល់នៃការប្រែប្រួលអាកាសធាតុផងដែរ ដោយសារត្រូវប្រឈមនឹងទឹកជំនន់ និងគ្រោះរាំងស្ងួតញឹកញាប់»។ នេះបើយោងតាមធនាគារពិភពលោក៕
