.jpg)
អ្នកដំណើរទើបមកដល់ព្រលានយន្តហោះអន្តរជាតិភ្នំពេញនាពេលកន្លងមក។ ហេង ជីវ័ន
ភ្នំពេញៈ មន្ត្រីអាកាសចរណ៍ស៊ីវិល និងវិស័យឯកជនស្វាគមន៍គម្រោងបង្កើតគម្រោង ផ្លូវសូត្រអាកាស «China''s Air Silk Road» ដែលនឹងរៀបចំដោយក្រុមហ៊ុនអាកាសចរណ៍ជាតិ Cambodia Angkor Air ដើម្បីកំណត់យកភ្នំពេញ-សៀមរាប ជាមជ្ឈមណ្ឌលដើម្បីទាក់ទាញភ្ញៀវទេសចរចិន និងក្នុងតំបន់អាស៊ានឱ្យបានកាន់តែ ច្រើនបន្ថែមទៀត។
គម្រោងផ្លូវសូត្រអាកាសនេះត្រូវបានលើកឡើងដោយលោក តឹករ៉េត សំរេច ប្រធានក្រុមប្រឹក្សាភិបាលក្រុមហ៊ុន Cambodia Angkor Air នៅក្នុងកម្មវិធីមួយកាលពីថ្ងៃទី ១៦ ធ្នូ។ លោកបានថ្លែងបញ្ជាក់ថាដោយមានការគាំទ្រពីរដ្ឋាភិបាលចិន ក្រុមហ៊ុននឹងរៀបចំបង្កើតគម្រោងមួយនេះដែលចង់ឱ្យភ្នំពេញ-សៀមរាប ជាមជ្ឈមណ្ឌល ក្នុងការទទួលភ្ញៀវទេសចរពីអាស៊ាន ហើយភ្ជាប់ពីអាស៊ាន ទៅកាន់ប្រទេសចិន ហើយភ្ជាប់ពីចិនមកភ្នំពេញ-សៀមរាប និងទៅកាន់ប្រទេសគោលដៅនៅក្នុងអាស៊ាន។
លោក ស៊ិន ចាន់សិរីវុត្ថា អ្នកនាំពាក្យលេខាធិការដ្ឋានអាកាសចរណ៍ស៊ីវិលកម្ពុជាបានសាទរចំពោះផែនការរបស់ក្រុមហ៊ុនអាកាសចរណ៍ជាតិមួយនេះលើផែនការទាក់ទាញភ្ញៀវទេសចរចិន និងពីក្នុងតំបន់ ខណៈដែលស្ថានភាពការរីករាលដាលនៃជំងឺកូវីដ ១៩ បានកំពុងថមថយ ឬគ្រប់គ្រងបាន។
លោកបានថ្លែងថា៖ «យើងចង់ទាក់ទាញភ្ញៀវទេសចរចិនឱ្យមកទស្សនាប្រទេសយើងឡើងវិញ ដោយសារតែឥឡូវរដ្ឋាភិបាលចិនបានបន្ធូរបន្ថយវិធានការរឹតត្បិតរឿងជំងឺកូវីដសឹងតែដូចប្រទេសនានាហើយ។ ហេតុដូច្នេះវាជារឿងចាំបាច់របស់យើងគឺត្រូវផ្សព្វផ្សាយទាក់ទាញភ្ញៀវទេសចរចិនឡើងវិញ»។
លោកថ្លែងថា៖ «យើងរៀបចំគម្រោងនេះឡើង ព្រោះភាគហ៊ុនិកថ្មីដែលកាន់កាប់ភាគហ៊ុនច្រើននៅក្នុងក្រុមហ៊ុនអាកាសចរណ៍ជាតិយើង គឺគាត់មានបទពិសោធ និងទីផ្សារនៅស្រុកចិនស្រាប់»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាថ្លែងថា ផែនការនេះនឹងជួយតភ្ជាប់កម្ពុជាទៅកាន់ទីផ្សារក្នុងតំបន់កាន់តែទូលំទូលាយ ជាពិសេសទីផ្សារចិន។
លោកបានថ្លែងថា៖ «ខ្ញុំគាំទ្រសម្រាប់គម្រោងនេះ ព្រោះថា វាជារឿងមួយដ៏សំខាន់សម្រាប់កម្ពុជាយើងក្នុងការតភ្ជាប់បណ្តាប្រទេសនានានៅក្នុងតំបន់អាស៊ាន ជាពិសេសប្រទេសធំៗដូចជាឥណ្ឌូនេស៊ី ជាដើម។ ខ្ញុំសង្ឃឹមថា ប្រសិនបើយើងអនុវត្តទៅតាមផែនការនេះ យើងនឹងអាចទាក់ទាញបានភ្ញៀវទេសចរច្រើនទាំងពីក្នុងតំបន់ និងប្រទេសចិន»។
លោក សំរេច ថា សម្រាប់ឆ្នាំ ២០២៣ ក្រុមហ៊ុននឹងពង្រីកបន្ថែមនូវការហោះហើរជាច្រើនទៀត ទៅកាន់ទីក្រុងហៃគូ ហាំងចូវ សៀងហៃ ប៉េកាំង នៃប្រទេសចិន និងសិង្ហបុរី ដែលអាចមានអ្នកដំណើរកើនឡើង ចំនួន ៦៥០ ០០០នាក់ ប្រមាណជាជិត ១០ ០០០ ជើង និងបាននាំយកយន្តហោះថ្មី ATR72 ១គ្រឿង និង Airbus A320 ១ គ្រឿង៕
