ភ្នំពេញៈ រាជរដ្ឋាភិបាលកម្ពុជានឹងធ្វើការសិក្សាដើម្បីសាងសង់មជ្ឈមណ្ឌលភ័ស្តុភារកម្មក្រុងព្រះសីហនុមួយទៀត បន្ទាប់ពីការសិក្សាមជ្ឈមណ្ឌលភ័ស្តុភារកម្មក្រុងភ្នំពេញនឹងត្រូវបញ្ចប់និងសាងសង់ឆាប់ៗ ក្នុងគោលបំណងបង្កើនប្រព័ន្ធដឹកជញ្ជូន និងឡូជីស្ទិកកាន់តែល្អប្រសើរឡើង ដើម្បីមានលទ្ធភាពកាន់តែខ្ពស់ក្នុងការប្រកួតប្រជែងជាមួយប្រទេសក្នុងតំបន់ ពិសេសដើម្បីឱ្យកម្ពុជាក្លាយជាច្រកចែកចាយទំនិញដ៏សកម្មមួយក្នុងតំបន់។ នេះបើយោងតាមមន្ត្រីជាន់ខ្ពស់ក្រសួងសាធារណការ និងដឹកជញ្ជូន។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានប្រាប់អ្នកសារព័ត៌មានក្នុងកម្មវិធីបើកសម្ពោធសមិទ្ធផលថ្មី “ផ្លូវលេខ១៤៦បេ” និង “ផ្លូវលេខ១៤៨” នៅព្រឹកថ្ងៃទី ២២ ខែធ្នូថា ក្រសួងបានការគាំទ្រពីធនាគារពិភពលោកដើម្បីធ្វើការសិក្សាលើគម្រោងបង្កើតមជ្ឈមណ្ឌលភ័ស្តុភារកម្មក្រុងព្រះសីហនុសំដៅធ្វើយ៉ាងណាឱ្យវិស័យនេះកាន់តែមានតម្លៃថោក មានឧត្តមភាពប្រកួតប្រជែង និងក្លាយជាច្រកចែកចាយទំនិញដ៏សំខាន់។
លោកថ្លែងថា៖ «យើងបានកំពុងសិក្សាជាមួយក្រុមហ៊ុនសិង្ហបុរី YCH ដើម្បីបង្កើតមជ្ឈមណ្ឌលភ័ស្តុភារកម្មភ្នំពេញចែកចាយទំនិញ។ ឥឡូវយើងបានចុះហត្ថលេខាជាមួយធនាគារពិភពលោកសិក្សាមជ្ឈមណ្ឌលភ័ស្តុភារកម្មក្រុងព្រះសីហនុទៀត ដើម្បីធ្វើឱ្យកាន់តែងាយស្រួល និងមានភាពប្រទាក់ក្រឡាគ្នានៃផ្នែកឡូជីស្ទិក ការចែកចាយទំនិញ និងដឹកជញ្ជូនកាន់តែប្រសើរឡើង»។
លោកបញ្ជាក់ថា៖ «បើយើងមើលទីតាំងប្រទេសជាតិយើង គឺយើងនៅចំកណ្តាលប្រទេសមហាអនុតំបន់មេគង្គដែលមានកម្ពុជា វៀតណាម ថៃ ឡាវ និងមីយ៉ាន់ម៉ា ដែលប្រទេសកម្ពុជាយើងនៅចំកណ្តាលគេ។ ដូច្នេះយើងនឹងទទួលបានអត្ថប្រយោជន៍ច្រើនពីការឆ្លងកាត់ទំនិញ ជាពិសេសគឺពីប្រទេសថៃ និងវៀតណាមគេដឹកទំនិញច្រើនឆ្លងកាត់យើង ដូច្នេះហើយយើងត្រូវរៀបចំប្រព័ន្ធដឹកជញ្ជូន និងភ័ស្តុភារកម្មរបស់យើងឱ្យល្អដើម្បីឱ្យយើងក្លាយជាកន្លែងផលិត និងចែកចាយដ៏មានសក្តានុពលមួយនៅក្នុងតំបន់មេគង្គនេះ»។
លោក ស៊ិន ចន្ធី ប្រធានសមាគមភ័ស្តុភារកម្ពុជាកម្ពុជា បានប្រាប់ភ្នំពេញប៉ុស្តិ៍នៅថ្ងៃទី ២២ ខែធ្នូថា គម្រោងនេះនឹងធ្វើឱ្យកម្ពុជាកាន់តែមានភាពទាក់ទាញវិនិយោគិនបរទេសឱ្យចូលមកបណ្តាក់ទុននៅកម្ពុជាដើម្បីធ្វើការនាំចេញទៅទីផ្សារក្នុងតំបន់ និងអន្តរជាតិ។
លោកនិយាយថា៖ «យើងគាំទ្រ និងអបអរសាទរសម្រាប់ការយកចិត្តទុកដាក់ពីរដ្ឋាភិបាលក្នុងការធ្វើឱ្យប្រសើរឡើងនូវប្រព័ន្ធឡូជីស្ទិក និងដឹកជញ្ជូននៅកម្ពុជាដែលនឹងជួយយើងមានឧត្តមភាពប្រកួតប្រជែងជាមួយប្រទេសនានាក្នុងតំបន់។ ការណ៍នេះក៏នឹងជួយគាំទ្រដល់វិស័យផលិតកម្ម និងជួយជំរុញការនាំចេញរបស់យើង»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញប៉ុស្តិ៍ ថាសម្រាប់ផែនការរៀបចំអភិវឌ្ឍមជ្ឈមណ្ឌលភ័ស្តុភារកម្មនឹងដើរតួនាទីដ៏សំខាន់សម្រាប់ជំរុញកំណើនសេដ្ឋកិច្ចកម្ពុជា។
លោកថ្លែងថា៖ «ប្រព័ន្ធឡូជីស្ទិក និងដឹកជញ្ជូន គឺជាសរសៃឈាមសេដ្ឋកិច្ចដ៏ចម្បងក្នុងការប្រកួតប្រជែងជាមួយប្រទេសក្នុងតំបន់តាមរយៈការធ្លាក់ចុះនៃតម្លៃ និងក៏នឹងធ្វើឱ្យប្រទេសកម្ពុជាអាចទាក់ទាញវិនិយោគិនកាន់តែច្រើនឱ្យចូលមកវិនិយោគក្នុងវិស័យផលិតកម្មដើម្បីនាំចេញ ដែលធ្វើឱ្យច្រវាក់ផលិតកម្មរបស់កម្ពុជាកាន់តែខ្លាំង»៕