ភ្នំពេញៈ ប្រមុខនៃរដ្ឋាភិបាលកម្ពុជាមានផែនការបើកទីផ្សារនាំចេញអង្ករទៅម៉ាល់ឌីវ ដែលជាប្រទេសដែនកោះសំដៅពង្រីកនូវកិត្យានុភាពអង្ករកម្ពុជាទៅទីផ្សារអន្តរជាតិបន្ថែមទៀត ស្របពេលដែលអង្ករកម្ពុជាទើបត្រូវបាន ចាត់ថ្នាក់ជា «អង្ករគុណភាពល្អផ្តាច់គេ លើពិភពលោក» ៥ លើកកន្លងមក។
ថ្លែងក្នុងពិធីបើកការដ្ឋានសាងសង់លើកកម្រិតគុណភាពផ្លូវជាតិលេខ ៤១ នាថ្ងៃទី ២៦ ខែធ្នូ លោកនាយករដ្ឋមន្ត្រី ហ៊ុន សែន ឱ្យដឹងថា លោកនឹងដឹកនាំគណៈប្រតិភូទៅទស្សនកិច្ចនៅប្រទេសម៉ាល់ឌីវ ក្នុងខែមករា ខាងមុខ ដើម្បីពិភាក្សាក្នុងការផ្សារភ្ជាប់ប្រទេសដែនកោះដែលទាក់ទាញបានភ្ញៀវទេសចរ យ៉ាងច្រើនក្នុង ១ ឆ្នាំៗ ព្រមទាំងបើកទីផ្សារអង្ករ និងទំនាក់ទំនងទេសចរណ៍រវាងប្រទេសទាំង ២។
លោកថ្លែងថា៖ «នៅខែមករា ខ្ញុំនឹងដឹកនាំគណៈប្រតិភូទៅកោះម៉ាល់ឌីវដើម្បីបើកទំនាក់ទំនង ព្រោះម៉ាល់ឌីវក៏ជាប្រទេសដែលខ្វះអង្ករដែរ អ៊ីចឹងខ្ញុំចង់ឱ្យមានការផ្សារភ្ជាប់ទេសចរណ៍និងពាក់ព័ន្ធជាមួយការនាំចេញអង្ករ។ ម៉ាល់ឌីវ ជាប្រទេសតូចមែនប៉ុន្តែគាត់ក៏មានតម្រូវការ (អង្ករ) ដែរ ដោយសារទេសចរគាត់ច្រើន។ អង្ករយើងល្អដូច្នេះគាត់អាចនាំអង្ករពីស្រុកយើងទៅ»។
លោក ឡាយ ឈុនហួ អគ្គនាយកក្រុមហ៊ុន City Rice Import Export ដែលជាក្រុមហ៊ុនបាននាំអង្ករផ្ការំដួលកម្ពុជាទៅចូលរួមប្រកួតក្នុងវេទិកាអង្ករពិភពលោក ដែលរៀបចំឡើងនៅទីក្រុងភូកេត ប្រទេសថៃ ហើយទទួលបានពានរង្វាន់លេខ ១ ជា «អង្ករល្អដាច់គេ» បានប្រាប់ភ្នំពេញប៉ុស្តិ៍កាលពីដើមខែធ្នូថា លោកសូមសាទរចំពោះការព្យាយាមរបស់រដ្ឋាភិបាលក្នុងការបន្តបើកទីផ្សារថ្មីៗសម្រាប់វិស័យឯកជនក្នុងការជំរុញការនាំចេញទំនិញនានាពិសេសផលិតផលអង្ករដែលកម្ពុជាមានសក្តានុពល ស្របពេលដែលអង្ករកម្ពុជាទើបទទួលបាននូវចំណាត់ថ្នាក់ជា «អង្ករគុណភាពល្អផ្តាច់គេលើពិភពលោក»។
លោកបានបញ្ជាក់ថា៖ «ពិតណាស់យើងស្វាគមន៍នូវកិច្ចខិតខំប្រឹងប្រែងរបស់ប្រមុខរាជរដ្ឋាភិបាលយើងដែលតែងតែព្យាយាមពង្រីក និងស្វែងរកទីផ្សារថ្មីៗសម្រាប់ផលិតផលកសិកម្មរបស់យើង។ ទោះបីទីផ្សារតូច ឬធំក្តី ក៏ផលិតផលអង្កររបស់យើងត្រូវបានគេស្គាល់កាន់តែច្រើនបន្ថែមទៀត»។
អ្នកនាំពាក្យសហព័ន្ធស្រូវអង្ករកម្ពុជា (CRF) លោក លន់ យ៉េង បានប្រាប់ថា រហូតមកដល់ពេលនេះកម្ពុជានៅពុំទាន់បាននាំចេញអង្កររបស់ខ្លួនទៅកាន់ទីផ្សារប្រទេសដែនកោះនេះនៅឡើយទេ។ ក្នុងនាមអ្នកនៅក្នុងវិស័យស្រូវអង្ករកម្ពុជា លោកស្វាគមន៍ចំពោះផែនការរបស់រាជរដ្ឋាភិបាលដែលមានគម្រោងបើកទីផ្សារអង្ករនៅទីនោះ។
លោកបានបន្ថែមថា៖ «វាជារឿងដ៏ល្អមួយសម្រាប់វិស័យស្រូវអង្កររបស់កម្ពុជាយើង នៅពេលដែលយើងមានទីផ្សារកាន់តែច្រើន ទោះបីជាទីផ្សារនោះតូច ឬធំក្តី ព្រោះវាជាការពង្រីកកេរ្តិ៍ឈ្មោះអង្កររបស់កម្ពុជាយើងកាន់តែច្រើនទៅកាន់ទីផ្សារក្នុងតំបន់ និងអន្តរជាតិផងដែរ»។
ម៉ាល់ឌីវ គឺជាប្រទេសដែនកោះមួយនៅក្នុងមហាសមុទ្រឥណ្ឌា ដែលលាតសន្ធឹងលើខ្សែអេក្វាទ័រ និងមានប្រជាជន ៥៤៣ ៦២០ នាក់ (២០២១)។ ប្រទេសនេះមានកោះចំនួន ១ ១៩២ ដែលលាតសន្ធឹងនៅតាមបណ្តោយប្រវែង ៨៧១ គីឡូម៉ែត្រ ខណៈប្រទេសនេះគ្របដណ្តប់លើផ្ទៃដីប្រហែល ៩០ ០០០ គីឡូម៉ែត្រការ៉េ ប៉ុន្តែក្នុងនោះគឺមានតែ ២៩៨ គីឡូម៉ែត្រការ៉េប៉ុណ្ណោះជាដីស្ងួត។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ក្នុងរយៈពេល ១០ ខែនៃឆ្នាំ ២០២២ កម្ពុជា បាននាំចេញអង្ករសរុប ៥០៩ ២៤៩ តោន កើនឡើង ៤៩ ០៨០ តោន ស្មើនឹង ១០,៦៧ ភាគរយបើធៀបនឹងរយៈពេល ១០ ខែក្នុងឆ្នាំ ២០២១ ដែលមានចំនួន ៤៦០ ១៦៩ តោន។
ក្នុងចំណោមការនាំចេញនោះ គឺអង្ករក្រអូបគ្រប់ប្រភេទមានចំនួន ៣៤៨ ៥០១ តោន ស្មើនឹង ៦៨,៤៤ ភាគរយ អង្ករសគ្រប់ប្រភេទមានចំនួន ១៤៨ ៩៣៣ តោន ស្មើនឹង ២៩,២៤ ភាគរយ និងអង្ករចំហុយគ្រប់ប្រភេទមានចំនួន ១១ ៨១៥ តោន ដែលស្មើនឹង ២,៣២ ភាគរយ។
បរិមាណអង្ករដែលបាននាំចេញទៅទិសដៅសហភាពអឺរ៉ុប ( ២៣ ប្រទេស) មានចំនួន ១៦៥ ៦៣០ តោន កើនឡើង ៤៣,៤៣ ភាគរយ, ប្រទេសចិន ចំនួន ២៣១ ៨៧៣ តោន កើនឡើង ១,១៨ ភាគរយ, ទិសដៅអាស៊ានចំនួន ៤៨ ២៥៣ តោន កើនឡើង ១០,១៩ ភាគរយ, និងទិសដៅដទៃទៀត មានបរិមាណ ៦៣ ៤៩៣ តោន ថយចុះ ១១,៤៨ ភាគរយ៕
វីដេអូ៖