.jpg)
ភ្ញៀវទេសចរមកដល់ព្រលានយន្តហោះអន្តរជាតិសៀមរាប នាពេលកន្លងទៅ។ រូបថត ភ្នំពេញ ប៉ុស្តិ៍
ភ្នំពេញៈ វិស័យឯកជនបានបង្ហាញការស្វាគមន៍ផែនការនៃការចាប់ផ្ដើមការហោះហើរត្រង់ឡើងវិញរវាងទីក្រុងដាណាំងរបស់វៀតណាម មកកាន់ខេត្តសៀមរាប បន្ទាប់ពីការផ្អាករយៈពេលជាង ២ ឆ្នាំដោយសារការរីករាលដាលជំងឺកូវីដ ១៩។ នេះបើយោងតាមមន្ត្រីជាន់ខ្ពស់វៀតណាម។
ផែនការនេះត្រូវលើកឡើងដោយ លោក Luong Nguyen Minh Triet អនុប្រធានអចិ ន្រៃតយ៍នៃគណៈកម្មាធិការបក្សទីក្រុងដាណាំង កាលពីថ្ងៃទី ២៦ ខែធ្នូ ដែលត្រូវបានរាយការណ៍ដោយទីភ្នាក់ងារសារព័ត៌មានវៀតណាម បានជួបជាមួយនឹងលោកស្រី មាន សំអាន សមាជិកព្រឹទ្ធសភា និងជាប្រធានគណៈកម្មាធិការទទួលបន្ទុកផ្នែកសុខភាព សង្គមកិច្ចស្តារនីតិសម្បទា យុវជន ពលកម្ម និងបណ្តុះបណ្តាលវិជ្ជាជីវៈនិងកិច្ចការនារីនៅក្នុងទីក្រុងដាណាំង។
លោក Triet បានបន្តថា ផ្លូវអាកាសត្រង់តភ្ជាប់រវាងទីក្រុងដាណាំង និងខេត្តសៀមរាប ដែលបានធ្វើអាជីវកម្មមុនឆ្នាំ ២០២០ និងផ្អាកដោយសារការរីករាលដាលជំងឺកូវីដ ១៩ តាំងពីពេលនោះមក បានរួមចំណែកជំរុញកិច្ចសហប្រតិបត្តិការរវាងទីក្រុងមួយនេះ និងដៃគូកម្ពុជាលើវិស័យជាច្រើន។ មកទល់ពេលនេះ ទីក្រុងដាណាំងចាប់ផ្ដើមដំណើរការជើងហោះហើរអន្តរជាតិចំនួន ៧ ឡើងវិញ។
លោកស្រី មាន សំអាន បានឱ្យដឹងថា ការចាប់ផ្ដើមដំណើរការឡើងវិញជើងហោះហើររវាងតំបន់ទេសចរណ៍សំខាន់ៗទាំង ២ នេះឆ្លើយតបនឹងការកើនឡើងនៃតម្រូវការភ្ញៀវទេសចរបច្ចុប្បន្នរវាងប្រទេសទាំង ២ បន្ទាប់ពីប្រទេសទាំង ២ បើកច្រកព្រំដែនឡើងវិញ។
លោកស្រី សំអាន បានថ្លែងថា៖ «ការបើកដំណើរការឡើងវិញផ្លូវដាណាំងសៀមរាប នឹងចូលរួមជួយលើកកម្ពស់ការអភិវឌ្ឍវិស័យទេសចរណ៍ប្រទេសទាំង ២ ដោយសារតែប្រជាជនកម្ពុជាជាច្រើនចង់ធ្វើដំណើរទៅទីក្រុងឆ្នេរនាភាគកណ្តាលប្រទេសវៀតណាម»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) បានស្វាគមន៍ចំពោះការហោះហើរឡើងវិញ ខណៈចំនួនទេសចរកម្ពុជា និងវៀតណាមកើនឡើង បន្ទាប់ពីប្រទេសទាំង ២ បើកដំណើរការឡើងវិញយ៉ាងពេញលេញនូវសេដ្ឋកិច្ចសង្គម។
លោកបញ្ជាក់ថា៖ «ជាការល្អណាស់ដែលមានការហោះហើរបន្ថែមទៀតរវាងប្រទេសទាំង ២ ព្រោះខ្ញុំឃើញថាបច្ចុប្បន្នចំនួនភ្ញៀវទេសចរមកពីវៀតណាមមកប្រទេសយើងមានការកើនឡើង។ ដាណាំង គឺជាគោលដៅទេសចរណ៍មួយ ដូច្នេះពួកគេក៏អាចស្វាគមន៍ប្រជាជនយើង ក៏ដូចជាភ្ញៀវទេសចរបរទេសផ្សេងទៀត ឱ្យមកទស្សនាពួកគេផងដែរ។ វានឹងមានតម្រូវការជើងហោះហើរត្រង់រវាងទីក្រុងដាណាំង និងខេត្តសៀមរាបរបស់យើងជាមិនខាន»។
ក្រសួងទេសចរណ៍កាលពីថ្ងៃទី ៣១ ខែតុលា បានបង្ហាញគំនិតផ្តួចផ្តើមធំៗចំនួន ២ ដើម្បីផ្តោតជាសំខាន់ «ឆ្នាំទេសចរណ៍កម្ពុជាឆ្នាំ ២០២៣» ដើម្បីពន្លឿនកំណើនទេសចរណ៍អន្តរជាតិ និងបានអំពាវនាវឱ្យភាគីពាក់ព័ន្ធចូលរួមឱ្យសកម្ម និងបន្តជម្រើសនានា ដើម្បីលើកកម្ពស់ភាពទាក់ទាញនៃព្រះរាជា ណាចក្រកម្ពុជា។
កាលពីដើមខែកញ្ញា ក្រសួងបានដាក់ចេញនូវយុទ្ធសាស្ត្រចំនួន ៨ សំដៅបង្កើនចំនួនភ្ញៀវអន្តរជាតិពេញមួយឆ្នាំមកកម្ពុជាឱ្យបានយ៉ាងតិចណាស់ ៧,៥ លាននាក់ និងការធ្វើដំណើរក្នុងស្រុកទូទាំងប្រទេសឱ្យបាន ១៦ លាននាក់ត្រឹមឆ្នាំ ២០២៨៕
