ភ្នំពេញៈ រដ្ឋាភិបាលបានសម្រេចសហការជាផ្លូវការជាមួយធនាគារក្នុងស្រុកចំនួន ៣ ក្នុងការដាក់ឱ្យដំណើរការជាផ្លូវការនូវអត្តសញ្ញាណប័ណ្ណមន្ត្រីរាជការស៊ីវិលប្រភេទថ្មីជាប្រភេទស្មាតកាត (Smart ID Card) និងអនុញ្ញាតឱ្យពួកគេប្រើប្រាស់ជាបណ្ណសម្គាល់ខ្លួន និងអាចប្រើប្រាស់សេវាហិរញ្ញវត្ថុនានាបានទៀតផង។
ការប្រកាសដាក់ឱ្យដំណើរការជាផ្លូវការនូវអត្តសញ្ញាណប័ណ្ណមន្ត្រីរាជការស៊ីវិលប្រភេទថ្មី នេះត្រូវបានប្រព្រឹត្តទៅ នារសៀលថ្ងៃពុធ ទី២៨ ខែធ្នូ ដែលរដ្ឋាភិបាលបានសម្រេចផ្តល់ដល់គ្រឹះស្ថានហិរញ្ញវត្ថុចំនួន ៣ រួមមាន ធនាគារអេស៊ីលីដា ធនាគារកាណាឌីយ៉ា និងធនាគារវីង បន្ទាប់ពីក្រសួងមុខងារសាធារណៈទទួលបានការអនុញ្ញាតពីរដ្ឋាភិបាលកាលពីថ្ងៃទី ៥ វិច្ឆិកា ឆ្នាំ ២០២១ ក្នុងការបោះពុម្ពនូវ Smart ID Card នេះដល់មន្ត្រីរាជការចំនួន ២២០ ០០០ នាក់។
លោក ព្រុំ សុខា រដ្ឋមន្ត្រីមុខងារសាធារណៈមានប្រសាសន៍ក្នុងពិធីប្រកាសឱ្យប្រើប្រាស់ជាផ្លូវការនោះថា ដើម្បីឆ្លើយតបទៅនឹងដំណើរការនៃបដិវត្តន៍ឧស្សាហកម្មជំនាន់ទី ៤ ស្របពេលជាមួយនឹងការរីករាលដាលនៃជំងឺកូវីដ ១៩ ក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ជាផែនទីចង្អុលផ្លូវ ក្នុងគោលដៅជំរុញដំណើការបរិវត្តកម្មឌីជីថល លើគ្រប់តួអង្គ ក្នុងសេដ្ឋកិច្ច និងសង្គមកម្ពុជាទាំងមូល។
លោកបានថ្លែងថា៖ «សម្រាប់ការផ្តល់ជូននូវស្មាតកាតប្រភេទថ្មីនេះគឺមិនត្រឹមជា ID Card ទេ គឺអាចបើកលុយបានទៀត គឺមន្ត្រីរាជការអាចប្រើប្រាស់ជាបណ្ណសម្គាល់ខ្លួនដើម្បីបម្រើក្នុងកិច្ចការនានាបានផងដែរ។កិច្ចសហការនេះគឺជាពន្លក និងជាចំណែកមួយនៃគោលនយោបាយរដ្ឋាភិបាល និងសង្គមឌីជីថលដែលក្រសួងមុខងារសាធារណៈបានខិតខំប្រឹងប្រែងក្នុងការធ្វើទំនើបកម្មនៃប្រព័ន្ធឌីជីថល»។
បើយោងតាមលោក ព្រុំ សុខា អត្តសញ្ញាណប័ណ្ណថ្មីសម្រាប់មន្ត្រីរាជការនេះមិនអាចប្រើប្រាស់ជំនួសអត្តសញ្ញាណប័ណ្ណប្រជាពលរដ្ឋបានទេ ព្រោះអត្តសញ្ញាណប័ណ្ណប្រជាពលរដ្ឋគឺប្រើប្រាស់បានច្រើនណាស់។ អត្តសញ្ញាណប័ណ្ណប្រភេទថ្មីនេះគឺមានសុពលភាព ១០ ឆ្នាំ។
លោកស្រី សូផន ណារី អនុប្រធាននាយកប្រតិបត្តិជាន់ខ្ពស់នៃធនាគារ អេស៊ីលីដា បានមានប្រសាសន៍ថា អត្តសញ្ញាណប័ណ្ណប្រភេទថ្មីនេះគឺអាចធ្វើការដាក់ប្រាក់ បញ្ចូលទឹកប្រាក់ក្នុងទូរស័ព្ទដៃ និងអាចបង្កើតបណ្ណនិមិត្តតាមអេធីអឹមធនាគារ អេស៊ីលីដា ព្រមទាំងអាចដកប្រាក់ និងផ្ទេរប្រាក់តាមម៉ាស៊ីនអេធីអឹមនៅគ្រប់ធនាគារ ឬស្ថាប័នហិរញ្ញវត្ថុបានគ្រប់ពេលវេលា។
លោកស្រីបានបន្ថែមថា៖ «ការដាក់ឱ្យប្រើប្រាស់អត្តសញ្ញាណប័ណ្ណថ្មីនេះ សបញ្ជាក់ឱ្យឃើញថា វិស័យសាធារណៈ និងវិស័យឯកជនមានទំនាក់ទំនងគ្នាយ៉ាងស្អិតល្មួត គាំទ្រគ្នាទៅវិញទៅមក មិនអាចកាត់ផ្តាច់ពីគ្នាបានឡើយ ជាងនេះទៅទៀត ជាលទ្ធផលបង្ហាញឱ្យឃើញថា វិស័យសាធារណៈ និងវិស័យឯកជន ជាពិសេស ប្រទេសកម្ពុជាទាំងមូល មានការរីកចម្រើន ជឿនលឿន ដោយប្រើប្រាស់បច្ចេកវិទ្យាទាន់សម័យ ដូចប្រទេសជឿនលឿនមួយចំនួន នៅក្នុងតំបន់ និងក្នុងពិភពលោក»។
លោកស្រីបានថ្លែងថា អត្តសញ្ញាណប័ណ្ណមន្ត្រីរាជការស៊ីវិលទម្រង់ថ្មីនេះ មានភ្ជាប់និមិត្តសញ្ញា CSS (Cambodian Shared Switch) ដែលជាបណ្ណអេធីអឹម សម្រាប់បម្រើមន្ត្រីរាជការស៊ីវិល ក្នុងការទូទាត់ទំនិញសេវាកម្មតាមម៉ាស៊ីនឆូតកាត និងតាមអនឡាញ ជាមួយដៃគូអាជីវកម្មប្រើប្រាស់ប្រព័ន្ធទូទាត់ជាមួយធនាគារ អេស៊ីលីដា។
លោក យឺន សម្បត្តិ អគ្គនាយកនៃ អគ្គនាយកដ្ឋាន IT របស់ក្រសួងមុខងារសាធារណៈបានមានប្រសាសន៍ថា កន្លងមករាជរដ្ឋាភិបាលធ្លាប់បានបោះពុម្ព និងផ្តល់ជូនអត្តសញ្ញាណប័ណ្ណជូនមន្ត្រីរាជការ ដើម្បីប្រើប្រាស់ជាផ្លូវការ ប៉ុន្តែការផ្តល់ជូននេះបានអាក់ខានចាប់តាំងពីឆ្នាំ ២០១៥ រហូតដល់សព្វថ្ងៃ។
លោកថា ដោយផ្អែកលើការវិវឌ្ឍជឿនលឿននៃប្រព័ន្ធបច្ចេកវិទ្យា អគ្គនាយកដ្ឋានរបស់លោកចាប់ផ្តើមធ្វើការសិក្សា និងរៀបចំបោះពុម្ព និងផ្តល់ជូនអត្តសញ្ញាណប័ណ្ណជូនមន្ត្រីរាជការស៊ីវិលឡើងវិញដែលបច្ចុប្បន្នមានចំនួនប្រមាណជាង ២២ ម៉ឺននាក់ទាំងនៅតាមក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ក្នុងទម្រង់ថ្មីនេះ។
លោកបញ្ជាក់ថា៖ «ដើម្បីធានាភាពសម្ងាត់នៃទិន្នន័យរបស់មន្ត្រីរាជការស៊ីវិល ដែលត្រូវបញ្ចូលពីប្រព័ន្ធព័ត៌មានវិទ្យារបស់ក្រសួងមុខងារសាធារណៈទៅកាន់ប្រព័ន្ធព័ត៌មានវិទ្យារបស់ធនាគារដៃគូ តាមរយៈប្រព័ន្ធ API ក្រសួងមុខងារសាធារណៈបានសហការជាមួយដៃគូទាំង ៣ រៀបចំជាកិច្ចព្រមព្រៀងរក្សាព័ត៌មានសម្ងាត់មុននឹងឈានទៅចុះអនុស្សរណៈនៃការយោគយល់គ្នាស្តីពីការបោះពុម្ពអត្តសញ្ញាណប័ណ្ណប្រភេទនេះនៅថ្ងៃទី ២៤ ខែមីនា ឆ្នាំ ២០២២»។
លោកថា ក្នុងរយៈពេល ៥ ថ្ងៃដែលបានដាក់ឱ្យដំណើរការ ស្នើសុំផ្តល់អត្តសញ្ញាណប័ណ្ណនេះ គិតដល់ត្រឹមថ្ងៃទី ២៨ ធ្នូ ក្រសួង ស្ថាប័នសរុបចំនួន ១៧ ដែលមានមន្ត្រីសរុបចំនួន ១ ៨៥៩ បានផ្ញើទិន្នន័យដើម្បីស្នើសុំអត្តសញ្ញាណប័ណ្ណ ក្នុងនោះបណ្ណចំនួន ៤៩៧ សន្លឹកសម្រាប់ក្រសួងចំនួន ១១ ត្រូវបានបោះពុម្ពរួចដោយធនាគារដៃគូទាំង ៣ ដែលនឹងត្រូវផ្តល់ជូននៅពេលនេះ៕