.jpg)
ផលិតផលខ្មែរនៅក្នុងពិធីតាំងពិព័រណ៍មួយកាលពីថ្ងៃ១៥ ធ្នូ ឆ្នាំ២០២២ ។ រូបថត CSDS
ភ្នំពេញៈ ពី ១ឆ្នាំ ទៅ ១ ឆ្នាំ ពិភពលោកកាន់តែដើរទៅជិតនឹងមហន្តរាយដែលបង្កឡើងដោយមនុស្សខ្លួនឯងដូចជា ការកាប់ព្រៃឈើ ការចោលកាកសំណល់ ការបរបាញ់ ឬនេសាទហួសព្រំដែន ការបំពុលចេញពីរោងចក្រសហគ្រាស និងសកម្មភាពជាច្រើនទៀតដែលបានញ៉ាំងឱ្យការរស់នៅរបស់មនុស្សសត្វមានការប្រែប្រួលយ៉ាងលឿន។
ជារៀងរាល់ឆ្នាំ គ្រោះទឹកជំនន់ គ្រោះរញ្ជួយដី បាក់ស្រុតច្រាំងទន្លេ ខ្យល់ព្យុះ បានឆក់យកជីវិតមនុស្ស ជាច្រើននាក់ រីឯការរស់នៅក៏ផ្លាស់ប្ដូរទៅតាមនោះដែរ។ ផ្ទៃដីដែលធ្លាប់តែមានជីជាតិ បច្ចុប្បន្ន ដីពោរពេញទៅដោយការបំពុល ហើយដែលច្បាស់ណាស់ថា វានឹងជះផលបន្តដល់ការដាំដុះដំណាំ។បើកាលណាការដាំដុះត្រូវបានបំពុលហើយនោះ កសិផលដែលមនុស្សជាតិទទួលទាន ក៏នឹងបង្កការប៉ះពាល់ដល់សុខភាពពួកគេផងដែរ។
ក្នុងនាមជាប្រទេសដែលអំណោយផលលើវិស័យកសិកម្មដែរនោះ កម្ពុជាកំពុងគិតគូរយ៉ាងយកចិត្តទុកដាក់ចំពោះបច្ចេកវិទ្យាថ្មីៗនានាដែលអាចជំរុញទិន្នផលការដាំដុះកាន់តែប្រសើរ ដើម្បីផ្គត់ផ្គង់តម្រូវការទីផ្សារក្នុងនិងក្រៅស្រុក។ មិនត្រឹមតែទិន្នផល បញ្ហាសុវត្ថិភាពក៏ត្រូវបានគេគិតគូរយ៉ាងល្អិតល្អន់ផងដែរដើម្បីបម្រើឱ្យសុខុមាលភាពរបស់អ្នកបរិភោគ។
ដោយឃើញពីភាពចាំបាច់នៃវិស័យនេះ សហគ្រិនស្ត្រី១រូបបានសម្រេចចិត្តធ្វើការលើវិស័យនេះដើម្បីធ្វើយ៉ាងណា បង្កើតនូវកសិកម្មបែបថ្មី ដែលជាកសិកម្មគំរូ និងត្រូវតាមស្តង់ដាចំណីអាហារ។ បង្កើតឡើងបានជាង១០ឆ្នាំ ក្រុមហ៊ុន Cambodian Standard Development and Supply (CSDS)បានខិតខំជំរុញឱ្យវិស័យកសិកម្មមានភាពទូលំទូលាយ និងត្រូវស្តង់ដា។
អ្នកស្រី ចៅ លន់មូលីកា ដែលជាស្ថាបនិកក្រុមហ៊ុននេះបានឱ្យដឹងថា អ្នកស្រីជ្រើសរើសយកមុខរបរ ដាំបន្លែផ្លែឈើសុវត្ថិភាព ក៏ដោយសារតែមើលឃើញពីបញ្ហាសុខភាពដែលប្រជាជនកំពុងជួបប្រទះ ដែលភាគច្រើនត្រូវបានបង្កឡើងដោយចំណីអាហារ។
អ្នកស្រី បានថ្លែងថា ៖ «ក្រុមហ៊ុនយើងបានយកចិត្តទុកដាក់យ៉ាងសំខាន់ទៅលើបញ្ហាសុវត្ថិភាពចំណីអាហារជាចម្បង ដោយយើងបានគិតគូរពីគុណភាពរបស់ផលិតផលចាប់តាំងពីការដាំដុះរបស់កសិករជាមួយនឹងស្តង់ដាបច្ចេកទេស Good Agriculture Practice»។
អ្នកស្រី ចៅ លន់មូលីកា បានបន្តថា៖ «យើងក៏មានការគិតគូរពីការវេចខ្ចប់ ការលាងសម្អាត ការដឹកជញ្ជូន និងការរក្សា ទុកនៅក្នុងសីតុណ្ហភាពត្រជាក់ ដើម្បីធានាគុណភាពកសិផលដែលប្រមូលមកបាន»។
មិនត្រឹមតែប៉ុណ្ណោះក្រុមហ៊ុនរបស់អ្នកស្រីបានចុះទៅដល់មូលដ្ឋាន ពោលគឺជួបជាមួយអ្នកដាំដុះផ្ទាល់ដើម្បីបង្រៀនពួកគេពីបច្ចេកទេសដាំដុះថ្មីៗ ទំនើបៗមួយចំនួន។ មិនត្រឹមតែជួបជាមួយកសិករ អ្នកស្រីថែមទាំងបានបង្កើតវេទិកាជួបជុំជាមួយអតិថិជន ដើម្បីបង្រៀនពួកគេឱ្យយល់អំពីស្តង់ដាសុវត្ថិភាពចំណីអាហារផងដែរ។
ដោយឡែក បច្ចុប្បន្ននេះក្រុមហ៊ុនអ្នកស្រី ក៏បានសហកាជាមួយសហភាពក៏ដូចជាសមាគមចំនួន១៣នៅកម្ពុជាក្នុងការប្រមូលនូវកសិផលក្នុងស្រុក រួមមាន បន្លែ និងផ្លែឈើ សម្រាប់យកមកផ្គត់ផ្គង់នៅតាមសាលារៀន មន្ទីរពេទ្យ សណ្ឋាគារ ភោជនីយដ្ឋាន ក៏ដូចជាកប៉ាល់ទេសចរណ៍ជាដើម។
យ៉ាងណាមិញ វាហាក់នៅមិនទាន់គ្រប់គ្រាន់ទេសម្រាប់អ្នកស្រី ដោយក្រុមហ៊ុនខាងលើមានចក្ខុវិស័យ វែងឆ្ងាយទៅមុខទៀត។បើតាមស្ថាបនិកក្រុមហ៊ុនដដែលនេះបានឱ្យដឹងថា៖«ចក្ខុវិស័យយើងគឺធ្វើយ៉ាងណារក្សាស្តង់ដាសុវត្ថិភាពចំណីអាហារព្រមទាំងផ្ដល់ទៅឱ្យស្ថិរភាពចំណូលរបស់កសិករ ឬក៏ក្រុមកសិករជាប់កិច្ចសន្យារបស់យើង និងពង្រីកបន្ថែមនៅទូទាំងប្រទេស ក៏ដូចជាផ្ដល់នូវការងារដល់បុគ្គលិកកម្មករបន្ថែមទៀត»។
ប៉ុន្តែយ៉ាងណា បើទោះបីជាក្រុមហ៊ុនអ្នកស្រីមានបទពិសោធន៍លើវិស័យកសិកម្មយូរឆ្នាំ ក៏អ្នកស្រីនៅតែជួបប្រទះបញ្ហាជារឿយៗ។ បញ្ហាចម្បងដែលអ្នកស្រីអះអាងថា ខ្លួនត្រូវដោះស្រាយនោះគឺការប្រឈមជាមួយការប្រែប្រួលអាកាសធាតុ ដែលនាំឱ្យរាំងស្ទះដល់ការដាំដុះរបស់កសិករ និងមានបញ្ហាផ្គត់ផ្គង់ តម្រូវការទីផ្សារមិនគ្រប់គ្រាន់ជាដើម។
កន្លងមក អ្នកស្រីបានផ្ដល់ជាផ្ទះសំណាញ់ដើម្បីទប់ទល់ជាមួយកម្ដៅទៅដល់កសិករដែលមានចុះកុងត្រាជាមួយក្រុមហ៊ុនអ្នកស្រី ព្រមទាំងផ្ដល់ជាផ្ទាំងសូឡាសម្រាប់បូមទឹក ដែលវាមិនត្រឹមតែចំណេញថវិកា តែក៏បានរួមចំណែកជួយដល់បរិស្ថានផងដែរ។
ដោយឡែក ការខិតខំរបស់អ្នកស្រី ចៅ លន់មូលីកា ជាង១០ឆ្នាំមកនេះ ក៏បានហុចផលទៅដល់អ្នកស្រីផ្ទាល់ផងដែរ ដោយថ្មីៗនេះអ្នកស្រី ទទួលបានពានរង្វាន់សហគ្រិនវ័យក្មេងកម្ពុជា(CYEA)ផ្នែកធុរកិច្ចបរិយាប័ន្ន ហើយកាលពីខែតុលា ឆ្នាំ២០២២កន្លងទៅ អ្នកស្រីក៏ជាប់ជាជយលាភីសហគ្រិនស្ត្រីអាស៊ានផងដែរដែលប្រព្រឹត្តទៅនាឱកាសកិច្ចប្រជុំកំពូលស្ត្រីអាស៊ានលើកទី២៕
