ភ្នំពេញៈ ក្រសួងពាណិជ្ជកម្មអំពាវនាវឱ្យផលិតករក្រុមហ៊ុនផ្តល់សេវា និងសហគ្រិនក្នុងស្រុកចូលរួមក្នុងពិព័រណ៍សិប្បកម្មនិងវត្ថុអនុស្សាវរីយ៍ឥណ្ឌា លើកទី៥៥ (IHGF) ពិព័រណ៍និទាឃរដូវដេល្លី២០២៣ ដើម្បីឆ្លៀតឱកាសបង្ហាញផលិតផល ឬសេវាកម្ម ក៏ដូចជាស្វែងរកដៃគូអាជីវកម្ម ដែលមកពីជុំវិញពិភពលោក។
យោងតាមការប្រកាសរបស់ក្រសួងពាណិជ្ជកម្ម The 55th Indian Handicrafts &Gifts Fair (IHGF) Delhi Fair (Spring) 2023 ដែលនឹងប្រព្រឹត្តទៅចាប់ពីថ្ងៃទី១៥-១៩ ខែមីនា ឆ្នាំ២០២៣ នៅមជ្ឈមណ្ឌលតាំងពិព័រណ៍ និងម៉ាតហ្រ្គីតធ័រណយដា ទីក្រុងញូវដែលី ប្រទេសឥណ្ឌា។
«ពិព័រណ៍ផលិតផលសិប្បកម្ម និងវត្ថុអនុស្សាវរីយ៍ឥណ្ឌាលើកទី៥៥ (IHGF) មិនត្រឹមតែជាវេទិកាសម្រាប់អ្នកទិញ និងការបញ្ជាទិញមកពីជុំវិញពិភពលោកនោះទេ ក៏ត្រូវបានចាត់ទុកជាការផ្តល់ឱកាសទីផ្សារ ការធ្វើជំនួបពាណិជ្ជកម្មសម្រាប់អ្នកតាំងបង្ហាញគ្រប់ប្រទេស លើផលិតផលសិប្បកម្ម និងវត្ថុអនុស្សាវរីយ៍ផងដែរ»។ នេះបើយោងតាមក្រសួងពាណិជ្ជកម្ម។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានឱ្យដឹងថា ផលិតករ វិនិយោគិន និងអ្នកផ្តល់សេវាកម្មក្នុងស្រុកគួរតែចូលរួមក្នុងពិព័រណ៍នេះ ព្រោះថាវាប្រមូលផ្តុំក្រុមហ៊ុនទាំងអស់នៅជុំវិញពិភពលោក ដែលជាឱកាសល្អក្នុងការកសាងការចូលរួម។
លោកថ្លែងថា៖ «ខ្ញុំសូមលើកទឹកចិត្តដល់ផលិតករ វិនិយោគិន និងក្រុមហ៊ុនផ្តល់សេវាកម្មក្នុងស្រុករបស់យើងឱ្យចូលរួមក្នុងការតាំងពិព័រណ៍នេះ ព្រោះវានឹងផ្តល់ឱ្យពួកគេនូវឱកាសដ៏ល្អក្នុងការជួបពិភាក្សាដោយផ្ទាល់ ដើម្បីស្វែងរកកិច្ចសហប្រតិបត្តិការ ឬស្វែងរកដៃគូ។ ទន្ទឹមនឹងនេះ ពួកគេក៏អាចប្រើប្រាស់ឱកាសដើម្បីបង្ហាញផលិតផល ឬសេវាកម្មរបស់ពួកគេទៅកាន់វិនិយោគិនទាំងអស់ដែលមកពីតំបន់ និងពិភពលោកផងដែរ»។
ស្ថិតិរបស់ក្រសួងបង្ហាញថា កម្ពុជា-ឥណ្ឌា ក៏មានគម្រោងបើកកិច្ចពិភាក្សា ដើម្បីធ្វើការលើកិច្ចព្រមព្រៀងពាណិជ្ជកម្មសេរី សំដៅជំរុញពាណិជ្ជកម្ម និងការវិនិយោគ។
យោងតាមក្រសួងពាណិជ្ជកម្ម ក្នុងរយៈពេល១១ខែដំបូង ពាណិជ្ជកម្មទ្វេភាគីរវាងប្រទេសទាំង២មានចំនួនសរុប២៧៤,២០ លានដុល្លារ កើនឡើង៥៧,២៧ ភាគរយពី ១៧៤,៣៥ លានដុល្លារ ធៀបនឹងរយៈពេលដូចគ្នាកាលពីឆ្នាំមុន ខណៈដែលការនាំចូលពីប្រទេសឥណ្ឌាមានតម្លៃ ១៦០,៣២ លានដុល្លារកើនឡើង៣៦,៨២ ភាគរយធៀបនឹងរយៈពេលដូចគ្នាកាលពីឆ្នាំមុន កើនឡើងពី១១៧,១៧លានដុល្លារ។
តួលេខនេះបង្ហាញថា ឱនភាពពាណិជ្ជកម្មរបស់ព្រះរាជាណាចក្រកម្ពុជា ជាមួយប្រទេសឥណ្ឌាបានរួមតូចមកនៅត្រឹម ២២,៦ ភាគរយពី ៦០ លានដុល្លារក្នុងខែមករាដល់ខែវិច្ឆិកាឆ្នាំ២០២០ មកនៅត្រឹមក្រោម៤៦,៥លានដុល្លារក្នុងរយៈពេលដូចគ្នាក្នុងឆ្នាំនេះ៕