ភ្នំពេញៈ នាវាទេសចរណ៍អន្តរជាតិធំៗចំនួន ២ ដែលអាចផ្ទុកភ្ញៀវទេសចរប្រមាណ ១ ០០០ នាក់ នឹងចូលមកចតច្រកផែអន្តរជាតិនៃខេត្តព្រះសីហនុនៅក្នុងខែមករានេះ បន្ទាប់ពីខកខានដឹកភ្ញៀវទេសចរអន្តរជាតិ ២ ឆ្នាំដោយសារតែការរីករាលដាលនៃជំងឺកូវីដ ១៩។
បើយោងតាមលិខិតរបស់ក្រសួងទេសចរណ៍ផ្ញើទៅកាន់អាជ្ញាធរខេត្តព្រះសីហនុស្នើសុំធ្វើការសម្របសម្រួល នាវាទេសចរណ៍អន្តរជាតិចំនួន ២ គ្រឿងដែលមានឈ្មោះថា Seabourn Encore មានលទ្ធភាពផ្ទុកប្រមាណ ៥០០ នាក់ក្នុង ១ គ្រឿងនឹងធ្វើការចូលចតតាមច្រកទ្វារផែអន្តរជាតិខេត្តព្រះសីហនុ។
លោក អ៊ី សមនឿន តំណាងក្រុមហ៊ុនទេសចរណ៍អង្គរធីខេត្រាវែល និងធួរ ដែលជាក្រុមហ៊ុនទទួលខុសត្រូវភ្ញៀវទេសចរលើនាវាទាំងនោះ បានថ្លែងប្រាប់ភ្នំពេញប៉ុស្តិ៍កាលពីថ្ងៃទី ៤ ខែមករាថា នាវាទាំង ២ នឹងចូលមកដល់ខេត្តព្រះសីហនុនៅថ្ងៃខុសគ្នាគឺ នាវាទី១ នឹង ធ្វើការចូលចតនៅថ្ងៃទី ១៤ ខែមករា និងនាវាទី២ នឹងចូលមកដល់នៅថ្ងៃទី ២៨ ខែមករា។
លោកបានថ្លែងថា៖ «ភ្ញៀវទេសចរទាំងអស់គឺសុទ្ធតែមកពីអឺរ៉ុប ដែលពួកគាត់ខ្លះនឹងធ្វើទស្សនកិច្ចនៅខេត្តព្រះសីហនុ អ្នកខ្លះទៀតនឹងត្រឡប់ទៅតាមនាវាទៅកាន់ប្រទេសផ្សេង និងអ្នកខ្លះទៀតនឹងធ្វើដំណើរតាមយន្តហោះទៅកាន់ខេត្តសៀមរាប ស្នាក់នៅ ២ ឬ ៣ ថ្ងៃ បន្ទាប់មកពួកគាត់នឹងធ្វើដំណើរតាមជើងយន្តហោះទៅកាន់ទិសដៅបន្ទាប់»។
លោកបានថ្លែងថា ការមកដល់នៃភ្ញៀវទេសចរអឺរ៉ុបទាំងអស់នេះ បន្ទាប់ពីការធូរស្រាលនៃជំងឺកូវីដ ១៩ ដែលបានយាយីដល់វិស័យទេសចរណ៍អស់រយៈពេលជាង ២ ឆ្នាំមកនេះ។
លោកថា៖ «ប្រទេសកម្ពុជាយើង ថៃ និងវៀតណាមជាប្រទេសដែលបានបើកសេដ្ឋកិច្ច និងសង្គមមុនគេ ដូច្នេះយើងមានឱកាសច្រើននៃការមកដល់នៃភ្ញៀវទេសចរអន្តរជាតិ»។
លោកធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាយល់ឃើញថា ការត្រឡប់មកវិញនៃភ្ញៀវទេសចរអឺរ៉ុបនាវាអន្តរជាតិនេះគឺជាសញ្ញាវិជ្ជមានមួយសម្រាប់វិស័យទេសចរណ៍របស់កម្ពុជា ដោយសារតែពេលបច្ចុប្បន្ន ភ្ញៀវដែលមកទស្សនកិច្ចនៅកម្ពុជាភាគច្រើនគឺមកពីក្នុងតំបន់ ជាពិសេសគឺប្រទេសថៃ និងវៀតណាម។
លោកបានថ្លែងថា៖ «ទោះបីជាភ្ញៀវទេសចរអឺរ៉ុបទាំងអស់ដែលមកទស្សនកិច្ចនៅប្រទេសយើងតាមនាវាក្តី គឺវាឆ្លុះបញ្ចាំងអំពីទំនុកចិត្តរបស់ពួកគេមកលើប្រទេសយើងដែលពួកគេអាចដើរលេងប្រកបដោយសុវត្ថិភាព គ្មានការឆ្លងជំងឺកូវីដ ១៩។ ការមកដល់របស់ភ្ញៀវអឺរ៉ុបគឺពិតជាសញ្ញាវិជ្ជមាននៃការត្រឡប់មកវិញនៃភ្ញៀវទេសចរមកតំបន់ឆ្ងាយៗ»។
កម្ពុជាបានចាប់ផ្តើមបើកដំណើរការពេញលេញសេដ្ឋកិច្ចសង្គមឡើងវិញកាលពីដើមខែវិច្ឆិកា ឆ្នាំ ២០២១ អនុញ្ញាតឱ្យសកម្មភាពសង្គម និងអាជីវកម្មនានាដំណើរការជាប្រក្រតីតាមគន្លងថ្មីដោយប្រកាន់ខ្ជាប់នូវគោលការណ៍សុខាភិបាលដើម្បីបង្ការពីការផ្ទុះឡើងវិញនៃជំងឺកូវីដ ១៩៕