ភ្នំពេញៈ ប្រធាននៃសមាគមភ័ស្តុភារកម្មកម្ពុជា លោក ស៊ិន ចន្ធី មានសុទិដ្ឋិនិយមថា ការបោះជំហានចូលរបស់ក្រុមហ៊ុនជប៉ុន NIPPON KOEI មកលើ ការអភិវឌ្ឍវិស័យផ្លូវដែកកម្ពុជានឹងក្លាយជាកត្តាជំរុញមួយដ៏សំខាន់ក្នុងការលើកកម្ពស់ការដឹកជញ្ជូនទំនិញ និងអ្នកដំណើរ ដោយសារជប៉ុនគឺជាប្រទេសដែលមានបទពិសោធន៍ខ្ពស់លើវិស័យនេះ ស្របពេលរដ្ឋាភិបាលបានដាក់ផែនការធ្វើទំនើបកម្មផ្លូវដែកទៅជាល្បឿនលឿន។
ការលើកឡើងរបស់លោក ស៊ិន ចន្ធី បន្ទាប់ពីតំណាងក្រុមហ៊ុន NIPPON KOEI ដែលដឹកនាំដោយលោក Hirotoshi SUZIKI បានជួបប្រជុំជាមួយតូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូននៅទីស្តីការក្រសួងកាលពីថ្ងៃទី ៩ ខែមករា។
យោងតាមសេចក្តីប្រកាសព័ត៌មានរបស់ក្រសួង ក្រុមហ៊ុន NIPPON KOEI បានបង្ហាញចំណាប់អារម្មណ៍ទាក់ទងនឹងគម្រោងកែលម្អប្រព័ន្ធដឹកជញ្ជូនអ្នកដំណើរតាមរថភ្លើងនៅតាមតំបន់ចំនួន ៣ នៃផ្លូវដែកភាគខាងជើងរួមមានបាត់ដំបង សិរីសោភ័ណ និងប៉ោយប៉ែត ដើម្បីរួមចំណែកក្នុងការប្រើប្រាស់ផ្លូវរថភ្លើងដែលមានស្រាប់សម្រាប់ការដឹកជញ្ជូនឱ្យកាន់តែល្អ។
លោក ស៊ិន ចន្ធី លើកឡើងថា ក្នុងវិស័យដឹកជញ្ជូន និងឡូជីស្ទិក អ្វីដែលមានសក្តានុពលខ្ពស់នោះ គឺការដឹកជញ្ជូនតាមផ្លូវដែកដែលមានតម្លៃទាបបើប្រៀបធៀបតាមការដឹកជញ្ជូនតាមផ្លូវថ្នល់ និងផ្លូវអាកាស។
លោកនិយាយថា៖ «បើតាមខ្ញុំដឹងសម្រាប់ការអភិវឌ្ឍប្រព័ន្ធផ្លូវដែកនេះ គឺរដ្ឋាភិបាលយើងបានរៀបចំផែនការមេរួចរាល់ហើយសំដៅធ្វើយ៉ាងណាឱ្យតម្លៃដឹកជញ្ជូនរបស់យើងកាន់តែមានជម្រើស មានតម្លៃទាប និងកាន់តែមានការប្រកួតប្រជែងដោយនឹងរួមចំណែកធ្វើឱ្យថ្លៃដើមផលិតកម្មធ្លាក់ចុះ ដែលជាកត្តាដ៏សំខាន់ក្នុងការជំរុញការនាំចេញនិងអាចបង្កើតឧត្តមភាពប្រកួតប្រជែងផងដែរ។
លោកបន្ថែមថា៖ «ឥឡូវនេះយើងឃើញមានការចាប់អារម្មណ៍ពីក្រុមហ៊ុនជប៉ុនមកលើការវិនិយោគផ្លូវរថភ្លើងនៅកម្ពុជា។ នេះជាការបោះជំហានថ្មីមួយដែលប្រទេសដែលមានបទពិសោធន៍ខ្ពស់មួយនេះចង់មកវិនិយោគនៅប្រទេសយើង។ ខ្ញុំសាទរចំពោះក្រុមហ៊ុនដែលមានផែនការវិនិយោគ ដោយសារតែវាពិតជាមានសារៈសំខាន់ខ្លាំងសម្រាប់ប្រទេសកម្ពុជាយើងក្នុងការអភិវឌ្ឍប្រព័ន្ធផ្លូវដែកដែលវានឹងចូលរួមចំណែកក្នុងការរីកចម្រើនសេដ្ឋកិច្ចកម្ពុជាបានមួយកម្រិត។
ប្រទេសកម្ពុជាគ្រោងធ្វើទំនើបកម្មផ្លូវដែកទៅជាល្បឿនលឿននៅឆ្នាំ ២០២៣ នេះ ក្នុងគោលបំណងជំរុញការដឹកជញ្ជូនទាំងទំនិញ និងអ្នកធ្វើដំណើរតាមផ្លូវដែក ជាពិសេសគឺការតភ្ជាប់ជាមួយប្រទេសជិតខាង។
កាលពីចុងខែធ្នូ ឆ្នាំ ២០២២ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ដើម្បីទាក់ទាញអ្នកវិនិយោគឱ្យមកបណ្តាក់ទុនរកស៊ីនៅកម្ពុជា គឺទាមទារឱ្យមានប្រព័ន្ធហេដ្ឋារចនាសម្ព័ន្ធប្រទាក់ក្រឡាគ្នាដើម្បីធ្វើឱ្យប្រព័ន្ធដឹកជញ្ជូន និងឡូជីស្ទិកមានតម្លៃថោក។
លោកបានបន្តថា ផ្លូវរថភ្លើងប៉ោយប៉ែតមកភ្នំពេញ និងទៅក្រុងព្រះសីហនុ ក៏កំពុងសិក្សាជិតចប់ហើយ និងផ្លូវរថភ្លើងល្បឿនលឿន ១ ខ្សែទៀត ពីប៉ោយប៉ែត-សៀមរាប-កំពង់ធំ-កំពង់ឆ្នាំង-ភ្នំពេញ និងបាវិត-ម៉ុកប៉ៃតភ្ជាប់ក្រុងហូជីមិញប្រទេសវៀតណាមកំពុងសិក្សា។
នៅក្នុងកិច្ចប្រជុំកាលពីថ្ងៃទី ៩ ខែមករានោះដែរ លោក តូច ចាន់កុសល ក៏បានស្នើឱ្យក្រុមហ៊ុន Nippon ធ្វើការពិចារណាទៅលើការសិក្សាគម្រោងផ្លូវរថភ្លើងក្នុងទីក្រុងភ្នំពេញ ពិសេសការសិក្សាលទ្ធភាពសាងសង់ផ្លូវរថភ្លើងនៅក្នុងក្រុង (Tramway) ដែលជាប្រភេទដឹកជញ្ជូនមួយបែបមានការនិយមចូលចិត្តប្រើប្រាស់ មានតម្លៃថោក និងការវិនិយោគក៏ងាយស្រួល និងមានថ្លៃថោកបើធៀបនឹងប្រព័ន្ធប្រតិបត្តិការរថភ្លើងស្វ័យប្រវត្តិ (AGT) ដែល JICA បានសិក្សារួចរាល់មកហើយ៕