.jpg)
ទិដ្ឋភាពការកសាងព្រលានយន្តហោះខេត្តសៀមរាប កាលពីថ្ងៃទី ៩ ខែមករា។ រូបថត សហការី
ភ្នំពេញៈ អ្នកនាំពាក្យនៃលេខាធិការដ្ឋានអាកាសចរស៊ីវិល (SSCA) និងផ្នែកឯកជនបានលើកឡើងថា ការពន្លឿនដើម្បីបញ្ចប់ការសាងសង់ និងដាក់ឱ្យដំណើរការព្រលានយន្តហោះសៀមរាបថ្មី នៅខែតុលា ខាងមុខ គឺនឹងឆ្លើយតបទៅតម្រូវការនៃការមកដល់របស់ភ្ញៀវទេសចរអន្តរជាតិ ជាពិសេសទេសចរចិនដែលរដ្ឋាភិបាលបានដាក់ផែនការក្នុងក្នុងទាក់ទាញឱ្យមកទស្សនាកម្ពុជាបានច្រើន។
យោងតាមរបាយការណ៍បូកសរុបការងារប្រចាំឆ្នាំ ២០២២ និងទិសដៅការងារឆ្នាំ ២០២៣ របស់គណៈកម្មការតម្រង់ទិសសម្រាប់ការសាងសង់អាកាសយានដ្ឋានអន្តរជាតិសៀមរាបអង្គរ ដែលភ្នំពេញប៉ុស្តិ៍ទទួលបានកាលពីថ្ងៃទី ១០ ខែមករា AIAI ដែលជាក្រុមហ៊ុនអនុវត្តគម្រោង ឱ្យដឹងថា គិតត្រឹមថ្ងៃទី ៣១ ខែធ្នូ ឆ្នាំ ២០២២ គម្រោងទាំងមូលសម្រេចបានប្រមាណ ៦៣ ភាគរយយឺតជាងការគ្រោងទុកកាលពីដើមឆ្នាំដែលកំណត់ ៧០ ភាគរយ ដោយសារតែការរាំងស្ទះនៃការនាំចូលឧបករណ៍បរិក្ខារសំណង់ពីប្រទេសចិន (បញ្ហាកូវីដ១៩)។ ជាមួយគ្នានេះក្រុមហ៊ុនបានដាក់ចេញផែនការឆ្នាំ ២០២៣ និងធ្វើការប្តេជ្ញាចិត្តខ្ពស់ នឹងសម្រេចការសាងសង់នេះឱ្យបាន ៩០ ភាគរយ នៅត្រឹមដំណាច់ខែមីនា ឆ្នាំ ២០២៣។
លោក តឹករ៉េត សំរេច ប្រធានគណៈកម្មការតម្រង់ទិសនៃគម្រោងនេះ បានធ្វើការកោតសរសើរ និងវាយតម្លៃខ្ពស់ចំពោះក្រុមហ៊ុន AIAI ដែលបានយកចិត្តទុកដាក់ខ្ពស់ និងផ្តល់ភាពសំខាន់ខ្លាំងចំពោះគម្រោងនេះ ហើយបានអនុវត្តគម្រោងទទួលបានជោគជ័យយ៉ាងខ្លាំងមកដល់ពេលនេះ។
លោកថ្លែងថា៖ «តាមរយៈសមិទ្ធផលឃើញថ្ងៃនេះ យើងអាចវាយតម្លៃបានថា ពេលវេលាលំបាកបំផុតក្នុងការអនុវត្តគម្រោងសាងសង់ឱ្យសម្រេចជោគជ័យនោះ គឺពួកយើងបានឆ្លងផុតហើយ នៅសល់តែការងារតិចតួចប៉ុណ្ណោះដែលត្រូវបន្តអនុវត្តឱ្យបានចប់នៅដំណាច់ខែមីនា ឆ្នាំ ២០២៣ និងការងារបើកឱ្យដំណើរការនៅខែតុលា ឆ្នាំ ២០២៣»។
លោក ស៊ិន ចាន់សិរីវុត្ថា អ្នកនាំពាក្យ SSCA បានប្រាប់ភ្នំពេញប៉ុស្តិ៍នៅថ្ងៃទី ១០ ខែមករាថា ការសម្រេចបាននូវវឌ្ឍនភាពនៃការសាងសង់ព្រលានយន្តហោះសៀមរាបថ្មីនេះ គឺឆ្លុះបញ្ចាំងពីការតាំងចិត្តខ្ពស់របស់ក្រុមហ៊ុនសាងសង់ បើទោះបីខ្លួនជួបឧបសគ្គខ្លះៗដោយសារការរីករាលដាលជំងឺកូវីដ ១៩ ក្នុងរយៈពេលជាង ២ ឆ្នាំមកនេះ ដែលធ្វើឱ្យមានការរំខានដល់ការសាងសង់។
លោកប្រាប់ថា៖ «ក្រុមហ៊ុនមានការប្តេជ្ញាខ្ពស់ក្នុងការសម្រេចឱ្យបានតាមផែនការ។ យើងពិតជាស្វាគមន៍ និងសាទរចំពោះការតាំងចិត្តនេះ និងសង្ឃឹមថា ក្រុមហ៊ុននឹងសម្រេចបានទៅតាមផែនការរបស់ខ្លួន»។
ទិដ្ឋភាពការកសាងព្រលានយន្តហោះខេត្តសៀមរាប កាលពីថ្ងៃទី ៩ ខែមករា។ រូបថត សហការី
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានលើកឡើងថា ការពន្លឿនការបញ្ចប់ការសាងសង់ព្រលានយន្តហោះថ្មីនេះនឹងជួយគាំទ្រដល់វិស័យដឹកជញ្ជូនផ្លូវអាកាសរបស់កម្ពុជា ស្របពេលរដ្ឋាភិបាលកំពុងដាក់វិធានការទាក់ទាញភ្ញៀវទេសចរអន្តរជាតិ ពិសេសភ្ញៀវចិនឱ្យមកទស្សនាប្រទេសកម្ពុជាកាន់តែច្រើនដើម្បីជួយស្រោចស្រង់ការងើបឡើងវិញនៃវិស័យនេះដែលបានញាំញីពីការរីករាលដាលនៃជំងឺកូវីដ ១៩ ជាង ២ ឆ្នាំមកនេះ។
លោកថ្លែងថា៖ «ការណ៍ដែលយើងមានព្រលានយន្តហោះថ្មី គឺជាជម្រើសដ៏ល្អមួយសម្រាប់ប្រទេសកម្ពុជា ព្រោះថាយើងមិនត្រឹមតែផ្តល់ជម្រើស និងមានជើងហោះហើរកាន់តែច្រើនដើម្បីបម្រើដល់វិស័យទេសចរណ៍ប៉ុណ្ណោះទេ ប៉ុន្តែវាក៏ជួយធ្វើឱ្យប្រសើរឡើងនូវប្រព័ន្ធដឹកជញ្ជូនតាមផ្លូវអាកាសទៀតផង»។
អាកាសយានដ្ឋានអន្តរជាតិសៀមរាបអង្គរ បានចាប់ផ្តើមសាងសង់កាលពីថ្ងៃទី ១៥ ខែមីនា ឆ្នាំ ២០២០ ដោយក្រុមហ៊ុន Angkor International Airport Investment (Cambodia) Co., Ltd(AIAI) លើផ្ទៃដី ៧០០,០៦ ហិកតា ក្រោមទុនវិនិយោគ ៨៨០ លានដុល្លារ។ អាកាសយានដ្ឋាននេះមានសមត្ថភាពទទួលអ្នកដំណើរប្រចាំឆ្នាំ (ចាប់ពីឆ្នាំ២០២៣) រយៈពេលខ្លីមធ្យម ៧ លាននាក់ក្នុង ១ ឆ្នាំដែលត្រូវចំណាយទុនជាង ៥០០ លានដុល្លារ និងរយៈពេលវែងទទួលបាន ២០ លាននាក់ក្នុង ១ ឆ្នាំដែលត្រូវចំណាយទុនជាង ៣០០ លានដុល្លារបន្ថែមទៀត។ សម្រាប់សមត្ថភាពទទួលទំនិញប្រចាំឆ្នាំវិញ គឺនៅក្នុងរយៈពេលខ្លីមធ្យមបានចំនួន ១០ ០០០ តោន ក្នុង ១ ឆ្នាំ និងរយៈពេលវែងបានចំនួន ៦០ ០០០ តោន៕
វីដេអូ៖
