.jpg)
ពិធីប្រកាសបោះផ្សាយសញ្ញាបណ្ណបៃតង នៅទីស្នាក់ការរបស់ CSX។ រូបថត សហការី
ភ្នំពេញៈ ហ្គោលដេនទ្រី (Golden Tree) បានក្លាយជាក្រុមហ៊ុនក្នុងស្រុកដំបូងគេបង្អស់ដែលបានធ្វើការបោះផ្សាយសញ្ញាបណ្ណបៃតងនៅផ្សារមូលបត្រកម្ពុជា (CSX) ដោយកៀរគរមូលធនប្រមាណ ១,៤៦ លានដុល្លារ ដើម្បីយកទៅពង្រីកអាជីវកម្មរបស់ខ្លួន។
ការបោះផ្សាយមូលបត្របៃតងនេះធ្វើឡើងជាផ្លូវការ កាលពីថ្ងៃទី ១៩ ខែមករានៅទីស្នាក់ការនៃផ្សារមូលបត្រកម្ពុជា ដែលនេះក្លាយជាការចុះបញ្ជីជាប្រវត្តិសាស្ត្រថ្មីមួយទៀតនៃការអភិវឌ្ឍផ្សារមូលបត្រកម្ពុជាទៅកាន់មូលបត្របៃតងដំបូងគេ។
លោក អ៊ុំ សេរីរតនៈ អគ្គនាយករងប្រតិបត្តិផ្នែកហិរញ្ញវត្ថុក្រុមហ៊ុន ហ្គោលដេនទ្រី បានឱ្យដឹងក្នុងពិធីបោះផ្សាយមូលបត្រជាផ្លូវការថា សញ្ញាបណ្ណបៃតងនេះ បានទទួលជំនួយបច្ចេកទេសពីធនាគារអភិវឌ្ឍន៍អាស៊ូ (ADB) ដើម្បីបោះផ្សាយឱ្យស្របតាមសញ្ញាបណ្ណបៃតងអាស៊ាន។ ការបោះផ្សាយសញ្ញាបណ្ណបៃតងនេះគឺស្របតាមទស្សនៈ និងចក្ខុវិស័យប្រកបដោយយុទ្ធសាស្ត្រយូរអង្វែង ដើម្បីក្លាយជាក្រុមហ៊ុនអចលនទ្រព្យឈានមុខគេមួយនៅកម្ពុជា។
លោកថ្លែងថា៖ «ការបោះផ្សាយនេះគឺជាជំហានមួយដែលធ្វើឱ្យវិនិយោគិនរបស់យើងយល់ដឹងមួយកម្រិតទៀតលើវិស័យវិនិយោគនិរន្តរភាពដែលពួកគេអាចទទួលបានផលចំណេញ និងគាំពារបរិស្ថានក្នុងពេលតែមួយ។ ការបោះផ្សាយលក់មូលបត្របៃតងនេះ មិនត្រឹមតែអនុញ្ញាតឱ្យក្រុមហ៊ុនហ្គោលដេនទ្រី ទទួលបានទុនសម្រាប់ពង្រីកអាជីវកម្មប៉ុណ្ណោះទេ ប៉ុន្តែថែមទាំងទទួលបានការជឿទុកចិត្តពីសំណាក់វិនិយោគិនជាតិ និងអន្តរជាតិលើធុរកិច្ចរបស់ក្រុមហ៊ុន។ លើសពីនេះទៀត ក្រុមហ៊ុនក៏បានចូលរួមបង្កើនសក្តានុពលនៃវិស័យហិរញ្ញវត្ថុនិរន្តរភាពនៃប្រទេសកម្ពុជាផងដែរ»។
លោក ហុង សុហួរ អគ្គនាយក CSX បាននិយាយថា រលកបៃតង ដែលចាប់ផ្តើមជាមួយនឹងការបោះផ្សាយ និងចុះបញ្ជីលក់សញ្ញាបណ្ណបៃតងរបស់ក្រុមហ៊ុនហ្គោលដេនទ្រី បញ្ជក់ឱ្យឃើញថាវិស័យមូលបត្រក៏កំពុងចូលរួមយ៉ាងសកម្មក្នុងការគាំទ្រ និងលើកកម្ពស់បរិស្ថានជាសកល ដើម្បីសង្គមជាតិ និងពិភពលោកទាំងមូល។
លោកថ្លែងថា៖ «សម្រាប់សមិទ្ធផលបៃតងថ្មីនេះ ខ្ញុំសូមលើកទឹកចិត្តទៅដល់ម្ចាស់អាជីវកម្មនានាពិចារណាក្នុងការធ្វើពិពិធកម្មមូលធនតាមរយៈទីផ្សារមូលបត្រ ពិសេសជាមួយនឹងការកៀរគរទុនដោយបោះផ្សាយ និងចុះបញ្ជីសញ្ញាបណ្ណសាជីវកម្មបីប្រភេទរួមមាន សញ្ញាបណ្ណបៃតង សញ្ញាបណ្ណសង្គម និងសញ្ញាបណ្ណនិរន្តរភាព ដែលទាក់ទាញទៅដល់វិនិយោគិនសាធារណៈ ក៏ដូចជាវិនិយោគិនស្ថាប័ន ថែមទាំងជួយគាំទ្រទៅដល់បរិស្ថាន សង្គម និងសេដ្ឋកិច្ចជាតិផងដែរ»។
អគ្គនាយកនិយ័តករមូលបត្រកម្ពុជា (SERC) លោក ស៊ូ សុជាតិ បានប្រាប់ថា ក្រុមហ៊ុននេះបានកៀរគរមូលធនប្រមាណ ១,៤៦ លានដុល្លារ ជាមួយនឹងអត្រាគូប៉ុង ៧ ភាគរយ ក្នុង ១ ឆ្នាំ មានតម្លៃចារឹកក្នុង ១ ឯកតា ស្មើនឹង ១ សែនរៀល និងមានឥណប្រតិទានរយៈពេល ៥ ឆ្នាំ (២០២២-២០២៧) ដែលនឹងទូទាត់គូប៉ុងជាប្រចាំឆមាស។
លោកថ្លែងថា៖ «ខ្ញុំពិតជាកោតសរសើរដល់ក្រុមហ៊ុន ហ្គោលដេនទ្រី ដែលមានឆន្ទៈក្នុងការបោះផ្សាយលក់សញ្ញាបណ្ណបៃតងជាសាធារណៈដំបូងគេនៅកម្ពុជា បើទោះបីមានឧបសគ្គយ៉ាងណាក្តីនៅអំឡុងពេលបោះផ្សាយក៏ក្រុមហ៊ុននៅតែបន្តឆន្ទៈរបស់ខ្លួនរហូតធ្វើឱ្យមានកម្មវិធីចុះបញ្ជីលក់សញ្ញាបណ្ណបៃតងដំបូងគេជាផ្លូវការនៅថ្ងៃនេះកើតឡើង»។
លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដែលធ្វើជាអធិបតីភាពក្នុងកម្មវិធីខាងលើបានលើកឡើងថា សម្រាប់ការបោះផ្សាយមូលបត្របៃតងនៅថ្ងៃនេះ គឺជាការបោះជំហានថ្មីមួយទៀតនៃការអភិវឌ្ឍវិស័យមូលបត្រកម្ពុជា ដោយក្រុមហ៊ុនហ្គោលដេនទ្រី គឺជាក្រុមហ៊ុនដំបូងបង្អស់ជាប្រវត្តិសាស្ត្រដែលបានបោះផ្សាយមូលបត្របៃតងនេះ។
លោកថ្លែងថា៖ «ខ្ញុំសង្ឃឹមថា លោកអគ្គនាយកនឹងយកក្រុមហ៊ុនដែលជាបុត្រសម្ព័ន្ធរបស់ខ្លួនផ្សេងៗទៀត ដើម្បីធ្វើការបោះផ្សាយមូលបត្របៃតង ឬមូលបត្រកម្មសិទ្ធិ។ ជាការពិត ហ្គោលដេនទ្រី បានកៀរគរទុនពីវិនិយោគិនសាធារណៈ និងវិនិយោគិនស្ថាប័នតាមរយៈផ្សារមូលបត្រកម្ពុជាដើម្បីអភិវឌ្ឍលំនៅឋានបៃតងដើម្បីបំពេញតម្រូវការអតិថិជន និងពង្រីកសក្តានុពលអាជីវកម្មរបស់ក្រុមហ៊ុន»៕
