ភ្នំពេញៈ ប្រតិបត្តិករកំពង់ផែស្វយ័តភ្នំពេញ (PPAP) ដែលបានចុះបញ្ជីភាគហ៊ុនជាសាធារណៈបានរាយការណ៍អំពីប្រតិបត្តិការអាជីវកម្មកើនឡើងខ្លាំងក្នុងឆ្នាំ ២០២២ ទោះបីជាមានភាពមិនច្បាស់លាស់ពីសេដ្ឋកិច្ចសកល និងក្នុងតំបន់ក្តី។
បើយោងតាមឯកសាររបស់ PPAP ដែលផ្ញើទៅឱ្យក្រុមហ៊ុនផ្សារមូលបត្រកម្ពុជា (CSX) កាលពីថ្ងៃទី ១០ ខែមករា ចំនួននាវាដឹកទំនិញឆ្លងកាត់ផែក្នុងអំឡុងខែមករាខែធ្នូ ឆ្នាំ ២០២២ បានកើន ៦៤,៣៤ ភាគរយបើធៀបនឹងរយៈពេលដូចគ្នាកាលពីឆ្នាំ ២០២១ ដល់ ៣ ៧៨៣ គ្រឿង, ការដឹកប្រេង ឧស្ម័ន និងទំនិញឆ្លងកាត់បានកើនឡើង ៥,១៦ ភាគរយ កើន ៤,០៤៤ លានតោន ហើយការដឹកជញ្ជូនតាមកុងតឺន័រ កើនឡើង ១៩,៧២ ភាគរយទៅដល់ ៤១៧,៦៩៦ TEUs (TEU ២០ ហ្វីត)។
ក្រុមហ៊ុន PPAP ក៏បានកត់សម្គាល់ផងដែរថា នាវាដឹកអ្នកដំណើរចំនួន ១០៩ ដែលផ្ទុកមនុស្សចំនួន ៦ ៩៤៧ នាក់បានចូលចតនៅទីតាំងរបស់ខ្លួនក្នុងអំឡុងពេលខាងលើ ពោលគឺកើនឡើងពីសូន្យក្នុងរយៈពេលដូចគ្នាកាលពីឆ្នាំ ២០២១។
លោក ហ៊ឺ បាវី អគ្គនាយកកំពង់ផែស្វយ័តភ្នំពេញ កាលពីខែមុនបានប្រាប់ភ្នំពេញប៉ុស្តិ៍ថា ភាពប្រសើរឡើងនៃការទប់ស្កាត់ការរីករាលដាលជំងឺកូវីដ ១៩ បានរួមចំណែកដល់ការកែលម្អសកម្មភាពសេដ្ឋកិច្ច ដែលជាលទ្ធផលធ្វើឱ្យសកម្មភាពអាជីវកម្មរបស់កំពង់ផែមានភាពប្រសើរ។
លោកថ្លែងថា៖ «យើងមើលឃើញថា សកម្មភាពសេដ្ឋកិច្ចមានភាពល្អប្រសើរចាប់តាំងពីប្រទេសភាគច្រើនបានបើកព្រំដែនពីការរីករាលដាលជំងឺកូវីដ ១៩។ ការណ៍នេះរួមចំណែកដល់កំណើននៃប្រតិបត្តិការអាជីវកម្មរបស់កំពង់ផែក្នុងអំឡុងពេលនេះ»។
លោកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារ CSX បានប្រាប់ភ្នំពេញប៉ុស្តិ៍នៅថ្ងៃទី ១១ ខែមករា ថា ប្រសិទ្ធភាពនៃការគ្រប់គ្រងការរីករាលដាលជំងឺកូវីដ ១៩ របស់រដ្ឋាភិបាល ដែលជំរុញឱ្យមានការងើបឡើងវិញនៃកំណើនសេដ្ឋកិច្ច និងតម្រូវការ និងសកម្មភាពដឹកជញ្ជូន បានរួមចំណែកសំខាន់ដល់កំណើនរបស់ក្រុមហ៊ុន PPAP ក្នុងឆ្នាំ ២០២២។
លោកស្រីថ្លែងថា៖ «ប្រសិទ្ធភាពនៃការគ្រប់គ្រងការរីករាលដាលជំងឺកូវីដ ១៩ របស់រដ្ឋាភិបាលគឺជាកត្តាសំខាន់ក្នុងការជំរុញសេដ្ឋកិច្ចរបស់កម្ពុជា និងកំណើនសកម្មភាពអាជីវកម្មរបស់កំពង់ផែ ខណៈដែលតម្រូវការកំពុងកើនឡើង។ ខ្ញុំព្យាករថា ឆ្នាំ ២០២៣ នឹងក្លាយជាឆ្នាំដ៏ល្អមួយទៀតសម្រាប់កំពង់ផែនេះ ដោយសារកំណើនសេដ្ឋកិច្ចយើងត្រូវបានព្យាករ នឹងកើនឡើងជាង ៥ ភាគរយ ខណៈប្រទេសចិន បានបើកសេដ្ឋកិច្ចរបស់ខ្លួន»៕