ភ្នំពេញៈ គម្រោង​វិនិយោគ​ចំ​​នួន ៧ ដែលមាន​ទឹកប្រាក់​សរុប ៨១,៤​ លាន​ដុល្លារ និង​បង្កើត​ការងារ ២១ ១៧៣​ កន្លែង​ត្រូវបាន​ក្រុមប្រឹក្សា​អភិវឌ្ឍន៍​កម្ពុជា ​(CDC) អនុម័ត​ឱ្យ​វិនិយោគ​នា​រយៈពេល​ជាង​ ២​ សប្តាហ៍​ដើមខែ​មករា នេះ ដែល​ក្នុងនោះ ៥ ស្ថិតក្នុង​វិស័យ​វាយ​ន​ភណ្ឌ​។​

​បណ្តាញ​សង្គម​ហ្វេ​ស​ប៊ុ​ក​ផ្លូវ​ការ​របស់ CDC ឱ្យដឹងថា គិតពី​ដើមខែ​មករា​ដល់​ថ្ងៃទី ​១៦ ខែមករា ឆ្នាំ​ ២០២៣ ក្រុមប្រឹក្សា​អភិវឌ្ឍន៍​កម្ពុជា បានចេញ​វិ​ញ្ញា​ប​នប​ត្រ​ចុះបញ្ជី​ឱ្យ​គម្រោង​វិ​និ​​យោគ​ចំនួន ៧ ដែល​រួមមាន ៥ ជា​ប្រភេទ​វាយ​ន​ភណ្ឌ និង​ចំនួន ២ ស្ថិតនៅក្នុង​ផលិតកម្ម​អំពូល​ភ្លើងអគ្គិសនី​។​

​បើ​យោងតាម CDC គម្រោង​វិនិយោគ​ទាំង​ ៥ ក្នុង​វិស័យ​វាយ​ន​ភណ្ឌ រួមមាន គម្រោង​បង្កើត​រោងចក្រ​កាត់ដេរ​សម្លៀកបំពាក់រ​បស់ Aroma Success Garment Co., Ltd មាន​ទុនវិនិយោគ ៣៦,៦​ លាន​ដុល្លារ​, គម្រោង​បង្កើត​រោងចក្រ​ផលិត​ស្បែកជើង និង​កាបូប​របស់ Qi Heng Xin Factory Co., Ltd នៅ​ផ្លូវជាតិ​​លេខ​ ២១ ខេត្តកណ្តាល មាន​ទុនវិនិយោគ ៨,៨ លាន​ដុល្លារ​, គម្រោង​បង្កើត​រោងចក្រ​ផលិត​កាបូបស្ពាយ​ពីក្រោយ កាបូប​ដំណេក តង់ កាត់ដេរ​សម្លៀក​បំពាក់ និង​កម្រាល​ក្រាល​ដេក របស់ Windara International Co., Ltd នៅ​ស្រុក​គងពិសី ខេត្តកំពង់ស្ពឺ ទុនវិនិយោគ​ ៥,៤​ លាន​ដុល្លារ​, គម្រោង​បង្កើត​រោងចក្រ​ផលិត​កាបូប​របស់ Yue Wing Cheong Manufactory Co., Ltd នៅ​ស្រុក​គងពិសី ខេត្តកំពង់ស្ពឺ ទុន​វិ​និ​យោគ ៥,៤ ​លាន​ដុល្លារ​, និង​គម្រោង​បង្កើត​រោងចក្រ​ផលិត​កាបូប​គ្រប់​ប្រភេទ និង​កាត់ដេរ​សម្លៀកបំពាក់រ​បស់ Xin Shun Jie (Cambodia) Leather Co., Ltd នៅ​ស្រុក​គងពិសី ខេត្តកំពង់ស្ពឺ មាន​ទុនវិនិយោគ ៥,២ ​លាន​ដុល្លារ​។​

​ចំណែក ២ គម្រោង​ដែល​ស្ថិតក្នុង​ផលិតកម្ម​អំពូល​ភ្លើង​អគ្គិ​ស​នី គឺ​រួមមាន គម្រោង​បង្កើត​រោងចក្រ​ផលិត​អំពូល​ភ្លើង​ចល័ត អំពូល​ភ្លើង​សូ​ឡា សម្ភារ​ប្លា​ស្ទិ​ក និង​សម្ភារ​បរិក្ខារ​ជួសជុល ​(​ដែក​ស្វាន វី​ស​...) របស់​ក្រុមហ៊ុន Technomate (Cambodia) Technology Co., Ltd. មាន​ទុនវិនិយោគ ១០​ លាន​ដុល្លារ និង​គម្រោង​បង្កើត​រោងចក្រ​ផលិត​អំពូល អំពូល​ភ្លើង​សូ​ឡា និង​បរិក្ខារ​អគ្គិសនី របស់​ក្រុម​ហ៊ុន Technomate (Cambodia) Precision Metal Co., Ltd. មាន​ទុនវិនិយោគ ១០​ លាន​ដុល្លារ ដែល​គម្រោង​ទាំង​ ២ ស្ថិតក្នុង​តំបន់​សេដ្ឋកិច្ច​​ពិសេស​ស្វាយរៀង ហ្គី​ហ្គា រី​សស៍ ខេត្តស្វាយរៀង​។​

​អ្នកសេដ្ឋកិច្ច​នៅ​រាជបណ្ឌិត្យ​សភា​កម្ពុជា លោក ហុង វណ្ណៈ បាន​ប្រាប់ ​ភ្នំពេញ ​ប៉ុស្តិ៍​ នៅ​ថ្ងៃទី​ ១៧ ខែមករា​ថា កំណើន​នៃ​ការ​ចូលមក​បណ្តាក់ទុន​កើតចេញពី​ហេតុផល​ចម្បង​ចំនួន​ ២ គឺ​ទី​ ១ ការខិតខំ​របស់​រដ្ឋា​ភិ​បាល​តាមរយៈ​ការកែសម្រួល​ច្បាប់​វិនិយោគ​ឱ្យ​កាន់តែ​ទាក់ទាញ​, ការបង្កើន​កិច្ចសហការ​ជាមួយ​ប្រទេស​នៅក្នុង​តំបន់ និង​ពិភព​លោក​ដើម្បី​ជំរុញ​ការនាំចេញ​ទំនិញ​, ការចូល​ជាធរ​មាននៃ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី និង​ពហុភាគី​, ព្រម​ទាំង​ការកសាង​ហេដ្ឋារចនាសម្ព័ន្ធ​ផ្លូវថ្នល់ កំពង់ផែ និង​ព្រលានយន្តហោះ​សម្រាប់​ការ​ធ្វើដំណើរ និង​ដឹកជញ្ជូន​ទំនិញ និង​ទី​ ២ ការខិតខំ​របស់​ផ្នែក​ឯក​ជន​ក្នុងការ​ធ្វើឱ្យ​កេរ្តិ៍ឈ្មោះ និង​គុណភាព​ផលិតផល​កម្ពុជា ត្រូវបាន​ទទួលស្គាល់​កាន់តែច្រើន​លើ​ពិភពលោក​។​

​លោក​ថ្លែងថា​៖ «​ក្រៅពី​ចំណុច​ទាំង​ ២​ ខាងលើ កត្តា​ស្ថិរភាព​នយោបាយ និង​កម្លាំង​ពលកម្ម​សម្បូរបែប និង​តម្លៃ​សមរម្យ ក៏​ជា​មូលហេតុ​សំខាន់​ដែល​បាន​ទាក់ទាញ​ចំណាប់អារម្មណ៍​អ្នក​វិនិយោគ​ឱ្យ​ចូលមក​បណ្តាក់​ទុន​នៅ​កម្ពុជា​កាន់តែច្រើន​ផង​ដែរ​»​។

លោក​បន្តថា​៖«​កំណើន​នៃ​ការបណ្តាក់ទុន គឺ​មានន័យថា អ្នកវិនិយោគ​គេ​មើលឃើញ​ពី​ឱកាស និង​សក្តានុពល​ដែល​កម្ពុជា​កំពុងមាន​»​។​

​អនុប្រធាន​សភាពាណិជ្ជកម្ម​កម្ពុជា លោក លឹម ហេង ថ្មីៗ នេះ​និយាយថា សភា​ពាណិជ្ជ​កម្ម​កម្ពុជា​កំពុង​ធ្វើ​កិច្ចការ​ជា​ច្រើន​ទាំង​ក្នុង និង​ក្រៅប្រទេស​ដើម្បី​ពន្យល់ ក៏ដូចជា​បង្ហាញ​ពី​សក្តានុពល​ដែល​កម្ពុ​ជាមាន​ទៅ​អ្នកវិនិយោគ ខណៈ​ស្ថាន​ភាព​ផលិតកម្ម និង​ទីផ្សារ​នាំ​ចេញ​សម្រាប់​ផលិតផល​កម្ពុជា​ក៏មាន​កាន់តែច្រើន​ដែរ​។ កិច្ច​ព្រមព្រៀង​ពាណិជ្ជកម្ម​ជាមួយ​ចិន និង​កូរ៉េ ព្រមទាំង RCEP នឹង​ជួយ​ទាក់ទាញ​អ្នកវិនិយោគ​ឱ្យ​បណ្តាក់ទុន​កាន់តែច្រើន​។​

​លោក​ប្រាប់ថា​៖ «​ក្រៅពី​ការ​ជួប​ផ្ទាល់​ជាមួយ​អ្នកវិនិយោគ សភាពាណិជ្ជកម្ម​កម្ពុជា​ក៏បាន​បើក​ការិយាល័យ​តំណាង​នៅ​ប្រទេស​មួយចំនួន​ដូចជា កា​​ណា​ដា និង​ជប៉ុន ដើម្បី​បង្កើន​ប្រសិទ្ធភាព​ក្នុងការ​ទាក់ទាញ​អ្នកវិនិយោគ​ឱ្យមក​បណ្តាក់ទុន​នៅ​កម្ពុជា​ផងដែរ​»៕