ភ្នំពេញៈ ភ្ញៀវទេសចរអន្តរជាតិប្រមាណជាង ២,២៧លាននាក់បានធ្វើដំណើរមកកម្ពុជាក្នុងឆ្នាំ២០២២ កើនឡើងជាង ១០០០ភាគរយបើធៀបឆ្នាំ២០២១ ជាអំឡុងពេល ដែលវិស័យទេសចរណ៍នៅទូទាំងពិភពលោកទទួលរងផលប៉ះពាល់យ៉ាងខ្លាំងពីវិបត្តិជំងឺកូវីដ១៩។ ទោះយ៉ាងណាភ្ញៀវទេសចរចិនដែលធ្លាប់មានចំនួនច្រើនជាងគេកាលពីអំឡុងឆ្នាំ២០១៩ គឺមានចំណែកត្រឹមតែជិត ៥ភាគរយប៉ុណ្ណោះក្នុងឆ្នាំ២០២២។
ទិន្នន័យក្រសួងទេសចរណ៍ប្រចាំឆ្នាំ២០២២ ដែលទើបចេញផ្សាយបង្ហាញថា ក្នុងឆ្នាំ២០២២ កម្ពុជាបានទទួលភ្ញៀវទេសចរអន្តរជាតិសរុប ២ ២៧៦ ៦២៦នាក់ កើនឡើង ១ ០៥៨,៦ភាគរយបើធៀបនឹងឆ្នាំ២០២១ ដែលមានចំនួនត្រឹមតែ ១៩៦ ៤៩៥នាក់។ ទោះយ៉ាងណាចំនួនភ្ញៀវអន្តរជាតិឆ្នាំ២០២២ បើធៀបនឹងឆ្នាំ២០១៩ ដែលជាឆ្នាំមានកំណត់ត្រាខ្ពស់បំផុត ៦,៦១លាននាក់នោះ គឺនៅតែមានសញ្ញាអវិជ្ជមាន-៦៥,៥៦ភាគរយ។
យោងតាមទិន្នន័យខាងលើ គឺក្នុងឆ្នាំ២០២២ ភ្ញៀវទេសចរជនជាតិចិនដែលធ្វើដំណើរមកកម្ពុជា គឺមានចំនួន ១០៦ ៨៧៥នាក់ ស្ថិតក្នុងចំណាត់ថ្នាក់ទី៣ តាមពីក្រោយប្រទេសថៃ ដែលមានចំនួន ៨៥៣ ៣៧៦នាក់ និងវៀតណាម ៤៦៣ ៩៩៥នាក់។
ចំនួនភ្ញៀវទេសចរចិនក្នុងឆ្នាំ២០២២ បើធៀបនឹងឆ្នាំ២០២១ ដែលមានចំនួនត្រឹមតែ ៤៥ ៧៧៥នាក់ គឺកើនឡើង ១៣៣,៥ភាគរយ ប៉ុន្តែចំនួននេះបើធៀបនឹងឆ្នាំ២០១៩ ដែលមានចំនួន ២ ៣៦១ ៨៤៩នាក់ គឺធ្លាក់ចុះរហូតដល់ ៩៥,៤៧ភាគរយ។
យោងតាមក្រសួងទេសចរណ៍ ភ្ញៀវទេសចរអន្តរជាតិដែលធ្វើដំណើរមកកម្ពុជាក្នុងឆ្នាំ២០២២ គឺតាមផ្លូវគោក មានចំនួន ១ ៤៦៧ ១៥៧នាក់ ស្មើនឹង ៦៤,៤ភាគរយ, ផ្លូវអាកាស ៧៩១ ៦០៣នាក់ ស្មើនឹង ៣៤,៨ភាគរយ និងផ្លូវទឹក ១៧ ៨៦៦នាក់ ស្មើ ០,៨ភាគរយ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ភ្នំពេញប៉ុស្តិ៍ក្នុងថ្ងៃទី១៨ ខែមករាថា បន្ទាប់ពីធ្លាក់ចុះយ៉ាងគំហុកកាលពីឆ្នាំ២០២០ និងឆ្នាំ២០២១ វិស័យទេសចរណ៍កម្ពុជាចាប់ផ្តើមបង្ហាញសញ្ញាវិជ្ជមានវិញហើយ ខណៈតាមការរំពឹងទុក គឺចំនួនភ្ញៀវទេសចរអន្តរជាតិនឹងអាចមានចំនួនដល់ ៤លាននាក់ក្នុងឆ្នាំ២០២៣ នេះ។
លោកស្រីបន្តថា ភ្ញៀវទេសចរចិន នឹងមានអត្រាកំណើនខ្ពស់ជាងគេក្នុងឆ្នាំនេះ ដោយសារកត្តាមួយចំនួនដូចជា ការប្រកាសរបស់រដ្ឋាភិបាលចិនពីការបើកប្រទេសឡើងវិញចាប់ពីថ្ងៃទី៨ ខែមករា ឆ្នាំ២០២៣, ការដាក់ចេញនូវយុទ្ធសាស្ត្រថ្មីរបស់កម្ពុជាក្នុងការទាក់ទាញភ្ញៀវទេសចរចិន, និងការធ្វើជាម្ចាស់ផ្ទះរបស់កម្ពុជានៃព្រឹត្តិការណ៍កីឡាស៊ីហ្គេម។
លោកស្រីបានបញ្ជាក់ថា៖«យើងរំពឹងថា ឆ្នាំ២០២៣ នេះចំនួនភ្ញៀវទេសចរចិននឹងហក់ឡើងមករត់នៅមុខគេវិញ ហើយនឹងដើរនាទីសំខាន់សម្រាប់ការងើបឡើងវិញនៃវិស័យទេសចរណ៍កម្ពុជាបន្ទាប់ពីកូវីដ១៩ មានភាពធូរស្រាល»។
លោកស្រីបន្ថែមទៀតថា វិស័យឯកជនកម្ពុជាក៏បានត្រៀមខ្លួនរួចរាល់សម្រាប់ទទួលភ្ញៀវជនជាតិចិនផងដែរ។
ប្រធានសមាគមមគ្គុទេសក៍ទេសចរណ៍ភាសាចិន(នៅខេត្តសៀមរាប) លោក ធៀម ធឿង បាននិយាយថា ដោយសារប្រទេសចិនទើបប្រកាសបើកឡើងវិញ ដូច្នេះចំនួនភ្ញៀវចិនដែលមកដល់កម្ពុជាគិតត្រឹមពេលនេះ(ថ្ងៃទី១៨) គឺមានចំនួនតិចតួចនៅឡើយ ប៉ុន្តែបើធៀបឆ្នាំ២០២២ គឺពិតជាកើនឡើងច្រើនមែន។
ទោះយ៉ាងណាចំនួននេះអាចនឹងកើនឡើងខ្ពស់បន្ទាប់ពីចូលឆ្នាំចិន(ចុងសប្តាហ៍នេះ) កន្លងផុតទៅ។ លោកបន្តថា នៅមុនពេលមានវិបត្តិជំងឺកូវីដ១៩ ភ្ញៀវទេសចរចិនបាននាំចំណូល និងបង្កើតការងារយ៉ាងច្រើនដល់ប្រជាជនកម្ពុជា។
លោកនិយាយថា៖«នៅពេលនេះភ្ញៀវចិនមិនទាន់មានសម្ទុះកើនខ្ពស់ទេ ប៉ុន្តែចំនួននេះអាចនឹងកើនខ្ពស់នៅពេលឆាប់ៗ ព្រោះនៅលើអនឡាញ គឺកំពុងឃើញមានការសួរនាំព័ត៌មានច្រើនពីការធ្វើដំណើរមកកម្ពុជាពីសំណាក់ជនជាតិ។ យើងកំពុងរង់ចាំស្វាគមន៍ពួកគេដោយក្ដីរីករាយ»។
រដ្ឋមន្ត្រីក្រសួងទេសចរណ៍ លោក ថោង ខុន កាលពីដើមឆ្នាំ២០២៣ នេះធ្លាប់លើកឡើងថា កម្ពុជាត្រៀមខ្លួនរួចរាល់សម្រាប់ទទួលភ្ញៀវទេសចរចិនឡើងវិញ បន្ទាប់ពីធ្លាក់ចុះយ៉ាងច្រើនដោយសារការរីករាលដាលជំងឺកូវីដ១៩។
លំហូរភ្ញៀវទេសចរចិនមកកម្ពុជាក្នុងឆ្នាំនេះនឹងអាចមានចំនួនលើសឆ្នាំ២០២២ ចំនួន ១០ដង ព្រោះក្រៅពីលក្ខខណ្ឌខាងក្រៅ (ចិនជាប្រទេសធំ មានប្រជាជនច្រើន) រដ្ឋាភិបាល និងវិស័យឯកជនកម្ពុជា ក៏បានអភិវឌ្ឍរចនាសម្ព័ន្ធផ្លូវថ្នល់ និងតំបន់កម្សាន្តជាច្រើនផងដែរ។ លោកបន្ថែមថា ក្នុងឆ្នាំ២០២៣ នេះកម្ពុជានឹងអាចទទួលបានទេសចរបរទេសពី ៣,៥-៤លាននាក់។
លោកលើកឡើងថា៖«ការត្រៀមទទួលភ្ញៀវទេសចរចិននេះ គឺយើងមានផែនការ និងកម្មវិធីច្បាស់លាស់»។
លោកបន្តថា៖«ខ្ញុំគិតថាសម្រាប់ឆ្នាំ២០២៣ នេះនឹងបានភ្ញៀវទេសចរចិនប្រហែល ១លាននាក់»៕