.jpg)
កសិករក្នុងខេត្តបន្ទាយមានជ័យ ដឹកពោតក្រហមទៅលក់ឱ្យឈ្មួញ។ ហេង ជីវ័ន
ភ្នំពេញៈ គ្រាប់ពោតប្រមាណជាង ១៦ ម៉ឺនតោនត្រូវបាននាំចេញទៅទីផ្សារអន្តរជាតិក្នុងរយៈពេល ១១ ខែ ឆ្នាំ ២០២២ ធ្លាក់ចុះជាង ៨ ភាគរយបើធៀបនឹងរយៈពេលដូចគ្នាឆ្នាំ ២០២១ ដែលភាគច្រើនត្រូវបាននាំទៅប្រទេសជិតខាងទាំង ២ គឺ ថៃ និងវៀតណាម។
របាយការណ៍នាំចេញផលិតផលកសិកម្មរយៈពេល ១១ ខែ ឆ្នាំ ២០២២ ពីក្រសួងកសិកម្ម ឱ្យដឹងថា ចាប់ពីខែមករាវិច្ឆិកា ឆ្នាំ ២០២២ ការនាំចេញគ្រាប់ពោតសម្រេចបានក្នុងបរិមាណ ១៦៣ ៦៧៣,៩៦ តោន ធ្លាក់ចុះ ៨,០៨ ភាគរយបើធៀបរយៈពេល ១១ ខែ ឆ្នាំ ២០២១ ដែលមាន ១៧៨ ០៦៩,៣៤ តោន។ ទីផ្សារសំខាន់ៗដែលទទួលទិញគ្រាប់ពោតពីកម្ពុជា គឺប្រទេសជិតខាង (វៀតណាម និងថៃ) មានបរិមាណ ១៦២ ៧៥២,៣០តោន និងប្រទេសចិន ៩២១,៦៦ តោន។
យោងតាមក្រសួងកសិកម្ម សម្រាប់រយៈពេល ១១ ខែ ឆ្នាំ ២០២២ ការនាំចេញកសិផលទៅក្រៅប្រទេស មានសរុប ៥ ២២២ ០៥៦,១៩ តោន។
ប្រធានមន្ទីរពាណិជ្ជកម្មខេត្តបាត់ដំបង លោក គឹម ហួត បានប្រាប់ ភ្នំពេញ ប៉ុស្តិ៍ នាចុងសប្តាហ៍មុនថា សម្រាប់បរិមាណគ្រាប់ពោត (ក្រហម) ដែលនាំចេញទៅប្រទេសថៃ តាមបណ្តាស្រុកនៅខេត្តបាត់ដំបង កាលពីឆ្នាំ ២០២២ គឺធ្លាក់ចុះបន្តិចបន្តួចបើធៀបនឹងឆ្នាំ ២០២១ ប៉ុន្តែតម្លៃ គឺកើនឡើងប្រហែល ២០ ភាគរយ ដោយសារមានតម្រូវការខ្ពស់នៅប្រទេសថៃ។ លោកបានបន្តថា សម្រាប់ឆ្នាំ ២០២២ កន្លងមក ដំណាំពោត គឺមានផ្តល់ផលចំណេញច្រើនទៅដល់ប្រជាកសិករ។
លោកអះអាងថា៖ «ដោយមិននិយាយទាក់ទងនឹងកត្តាអាកាសធាតុ និងគ្រោះធម្មជាតិផ្សេងៗ ខ្ញុំគិតថា ដំណាំពោតនឹងមានសក្តានុពលកាន់តែខ្លាំងសម្រាប់ការនាំចេញចាប់ពីពេលនេះតទៅ»។
យោងតាមលោក គឹម ហួត ជាធម្មតាពោតក្រហមនៅខេត្តបាត់ដំបង និងបណ្តាខេត្តជាប់ព្រំដែនថៃប្រហែល ៨០ ភាគរយត្រូវបានឈ្មួញប្រមូលទិញទៅលក់បន្តនៅប្រទេសថៃ ខណៈសល់តិចតួចសម្រាប់ប្រើប្រាស់ក្នុងស្រុក (ធ្វើចំណីសត្វ)។
ទាក់ទងនឹងការដាំដុះ លោក គឹម ហួត ប្រាប់ថា ការដាំដុះគឺមិនមានភាពច្បាស់លាស់ទេ ដោយសារកសិករតែងតែដាំពោត ឆ្លាស់គ្នាជាមួយដំឡូងមី ពោលគឺឆ្នាំខ្លះដាំពោតច្រើន និងឆ្នាំខ្លះដាំដំឡូងមីច្រើន។
ម្ចាស់សៃឡូមួយកន្លែងនៅក្នុងស្រុកសំពៅលូន ខេត្តបាត់ដំបង លោកស្រី ចាន់ មួយ បានប្រាប់ ភ្នំពេញ ប៉ុស្តិ៍ យ៉ាងខ្លីថា ពេលនេះកន្លែងរបស់លោកស្រីមិនមានពោតក្រហមនៅសល់ទេដោយលក់អស់ប្រហែល ១ ខែមកហើយ។
សម្រាប់តម្លៃពោតក្រហមក្នុងឆ្នាំ ២០២២ កន្លងមកគឺកើនឡើងច្រើនបើធៀបនឹងឆ្នាំ ២០២១។
ទិន្នន័យពីមន្ទីរកសិកម្មខេត្តបាត់ដំបង ឱ្យដឹងថា នៅក្នុងឆ្នាំ ២០២២ ខេត្តបាត់ដំបង មានផ្ទៃដីដាំដុះពោត ១១៦ ៦៩៩ ហិកតា ក្នុងនោះខូចខាតចំនួន ៥ ៣៣១ ហិកតា និងប្រមូលផលសរុបបាន ៦៤៩ ៣២៨ តោន ខណៈកាលពីឆ្នាំ ២០២១ ផ្ទៃដីដាំពោត មាន ៥៣ ៣៥២ ហិកតា ខូចខាត ៣ ៣៨៨ ហិកតា និងប្រមូលផលបាន ២៨៥ ៤១៤ តោន៕
