.jpg)
កោះ១ក្នុងចំណោមកោះចំនួន៣៥ នៅខេត្តកោះកុង។ រូបថត រដ្ឋបាលខេត្តកោះកុង
កោះកុងៈ កោះចំនួន ១៧ ក្នុងចំណោមកោះសរុបចំនួន ៣៥ ក្នុងខេត្តកោះកុង បានទទួលគម្រោងវិនិយោគ និងកោះចំនួន ១ ទៀត កំពុងត្រូវបានសិក្សាដើម្បីវិនិយោគឱ្យទៅជាតំបន់ទេសចរណ៍ និងក៏មានគម្រោងអភិវឌ្ឍន៍ព្រលានយន្តហោះផងដែរ។ នេះបើតាមលោកស្រី មិថុនា ភូថង អភិបាលខេត្តកោះកុង។
លោកស្រីបានថ្លែងកាលពីថ្ងៃទី ២៥ ខែមករាថា៖ «កោះទាំងនោះត្រូវបានក្រុមហ៊ុនវិនិយោគថា មានគម្រោងកែច្នៃទៅជាតំបន់រមណីយដ្ឋានទេសចរណ៍ ប៉ុន្តែភាគច្រើនដូចជាទើបតែធ្វើបាន៣ឬ៤កោះទេ ដែលក្រៅពីហ្នឹងគឺកំពុងស្ថិតក្នុងការសិក្សា»។
លោកស្រីអភិបាលខេត្តបន្ថែមថា ក្រៅពីការអភិវឌ្ឍ និងការវិនិយោគទាំងអស់នេះហើយ ខេត្តកោះកុងក៏មានគម្រោងអភិវឌ្ឍន៍ព្រលានយន្តហោះធំមួយ ដែលបាននិងកំពុងលេចរូបរាងឡើងនៅក្នុងស្រុក បទុមសាគរ ដែលជាផ្នែក១រួមចំណែកទាក់ទាញទេសចរ និងវិនិយោគិនមកកាន់ខេត្តនេះកាន់តែច្រើនបន្ថែមទៀត។
លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្តាញយុវជនកម្ពុជា(CYN) បានថ្លែងថា ជុំវិញការវិនិយោគនៅក្នុងខេត្តកោះកុងនេះ លោកឃើញមានកោះជាច្រើនត្រូវបានរាជរដ្ឋាភិបាលប្រគល់ទៅឱ្យក្រុមហ៊ុនឯកជនធ្វើការវិនិយោគ ដោយមិនមានការប្រកាសព័ត៌មាន ដោយតម្លាភាពពីគម្រោងនៃដំណើរការអភិវឌ្ឍនៅលើកោះមួយចំនួននោះឡើយ។
លោកលើកឡើងថា ៖«កោះទាំងអស់នោះ គួរណាស់តែមានការកែច្នៃក្នុងន័យ២ គឺទី១ ប្រសិនជាមានការអភិវឌ្ឍក្នុងទម្រង់អេកូទេសចរណ៍ វាជារឿងល្អ ប៉ុន្តែមិនមែនជាកម្មសិទ្ធិផ្ដាច់មុខទេ គឺត្រូវមានការសហការគ្នាជាមួយសហគមន៍មូលដ្ឋាន ដើម្បីឱ្យសហគមន៍មូលដ្ឋានទទួលបានកំណើនសេដ្ឋកិច្ចខ្លះផងដែរ។ ១ទៀត ប្រសិនបើជាការកាន់កាប់ដោយការលាក់បាំង ឬកាន់កាប់ដោយមិនមានតម្លាភាពហ្នឹង ក៏ត្រូវត្រួតពិនិត្យឡើងវិញដែរ រួមទាំងសកម្មភាពអសកម្មមួយចំនួន រដ្ឋក៏គួរតែត្រួតពិនិត្យដែរ»។
លោក ហេង គឹមហុង បន្ថែមថា៖ «រដ្ឋគួរណាស់តែមានតម្លាភាព ក្នុងការប្រកាសជាសាធារណៈអំពីគម្រោងនៃការអភិវឌ្ឍ ហើយលក្ខខណ្ឌធម្មជាតិនៅក្នុងតំបន់ហ្នឹង ថាតើអភិវឌ្ឍបានអ្វីខ្លះ? ដើម្បីឱ្យមានការដេញថ្លៃជាសាធារណៈសម្រាប់ភាគីពាក់ព័ន្ធ ពីក្រុមហ៊ុនឯកជន ដើម្បីធានាបានថា មិនមានអំពើពុករលួយ។ ក្រៅពីនេះពលរដ្ឋជាម្ចាស់ប្រទេសបានដឹងពីការអភិវឌ្ឍ ឬពលរដ្ឋបានស្វែងយល់ពីសក្ដានុពលនៃតំបន់កោះទាំងអស់នោះ »។
លោកគឹមហុងបន្ថែមថា សម្រាប់គម្រោងទាំងឡាយណា ដែលបង្កផលប៉ះពាល់ទៅដល់សមុទ្រ ឬក៏ធនធានធម្មជាតិនៅក្នុងទឹក រាជរដ្ឋាភិបាលក៏គួរតែមានការពិនិត្យ និងបញ្ឈប់សកម្មភាពទាំងនោះជាបន្ទាន់ ដើម្បីការពារកុំឱ្យបង្ហូរសារធាតុពុល ឬកាកសំណល់ចូលទៅក្នុងទឹកជាដើម។
ទាក់ទងនឹងការលើកឡើងរបស់លោក ហេង គឹមហុង អភិបាលរងខេត្តកោះកុង លោក សុខ សុទ្ធី បានប្រាប់ឱ្យដឹងថា រាល់ការអភិវឌ្ឍ គឺសុទ្ធតែមានច្បាប់ទម្លាប់ត្រឹមត្រូវ ហើយដើម្បីឱ្យចេញបានជាច្បាប់ទម្លាប់ គឺត្រូវតែមានការផ្សព្វផ្សាយ។
លោកបានបន្តថា ចំពោះការវិនិយោគវិញក៏ដូចគ្នាដែរ ទាល់តែមានការទទួលស្គាល់ គឺទើបមានការផ្សព្វផ្សាយ។
លោក សុខ សុទ្ធី បានបញ្ជាក់ថា ៖ «ប្រសិនជាគាត់លើកឡើងអ៊ីចឹង គឺមានន័យថា គាត់អត់ដែលបានចូលរួម តាមដានទេ គ្រាន់តែលើកឡើងចោល ដើម្បីធ្វើសកម្មភាពរបស់ពួកគាត់ប៉ុណ្ណោះ»៕
