​ភ្នំពេញៈ កម្ពុជា​រំពឹងថា ការចរចា​ជុំ​ទី​​៣ លើ​ខ្លឹមសារ​នៃ​កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​កម្ពុជា​អេ​មី​រ៉ា​ត​អារ៉ាប់​រួម (CAMUAE CEPA) ដែល​ធ្វើឡើង​នៅ​ទីក្រុង​អា​ប៊ូ​ដា​ប៊ី ប្រទេស​អេ​មី​រ៉ា​ត​អារ៉ាប់​រួម នា​ខែកុម្ភៈ​ខាងមុខ នឹង​ក្លាយជា​កិច្ចប្រជុំ​លក្ខណៈ​បច្ចេកទេស​ចុងក្រោយ មុននឹង​ថ្នាក់ដឹកនាំ​នៃ​ប្រទេស​ទាំង​ ២ ចុះហត្ថលេខា​ដាក់ឱ្យ​ប្រើប្រាស់​ជា​ផ្លូវការ​។​

​ដំណើរការ​ចរចា​លើ​កិច្ចព្រមព្រៀង CAMUAE CEPA ត្រូវបាន​រៀបចំ​លើក​ទី​១ នៅ​ទីក្រុង​អា​ប៊ូ​ដា​ប៊ី ប្រទេស​អេ​មី​រ៉ា​ត​អារ៉ាប់​រួម កាលពី​ថ្ងៃទី ​២៤-២៥ ខែតុលា ឆ្នាំ ​២០២២ និង​លើក​ទី២ នៅក្នុង​ទីក្រុង​ភ្នំពេញ ពីថ្ងៃ​ទី ១៩-២១ ខែធ្នូ ឆ្នាំ​ ២០២២​។​

​រដ្ឋលេខាធិការ​ក្រសួងពាណិជ្ជកម្ម និង​ជា​ប្រធាន​ក្រុម​ចរចា​នៃ​កិច្ចព្រមព្រៀង CAMUAE CEPA លោកស្រី តឹក​រ៉េត កំរង កាលពី​ថ្ងៃទី ​២៥ ខែមករា បាន​ដឹកនាំ​កិច្ចប្រជុំ​ពិគ្រោះ​យោបល់​ជាមួយ​ក្រសួង​ស្ថាប័នរដ្ឋ និង​ឯកជន ដើម្បី​ពិនិត្យ និង​ពិភាក្សា​លើ​បញ្ជី​ផ្តល់ឱ្យ ​(Offer List) និង​បញ្ជី​សំណើ (Request List) ក្នុង​វិស័យ​ពាណិជ្ជកម្ម​សេវា នៅក្រោម​កិច្ចព្រមព្រៀង ​CAMUAE CEPA​។ កិច្ចប្រជុំ​នេះ​ធ្វើឡើង​ក្នុង​គោលបំណង​ប្រមូល​ធាតុ​ចូល​បន្ថែម​ដើម្បី​កំណត់​ជំហរ​រួម និង​ធ្វើយ៉ាងណា​ឱ្យ​កម្ពុជា​អាច​ទាញយក​ផល​វិជ្ជមាន​ឱ្យបាន​អតិបរមា​ពី​កិច្ចព្រមព្រៀង​នេះ តាមរយៈ​ការទាក់ទាញ​វិនិយោគិន​ពី​ប្រទេស​អារ៉ាប់​រួម និង​ការនាំចេញ​។​

​ថ្លែងប្រាប់​ ភ្នំពេញ​ ប៉ុស្តិ៍​ នៅក្នុង​ថ្ងៃទី​ ២៦ ខែមករា លោក ប៉ែន សុ​វិជាតិ អ្នកនាំពាក្យ​ក្រសួងពាណិជ្ជកម្ម និង​ជា​អនុប្រធាន​ក្រុមការងារ​ចរចា CAMUAE CEPA បានឱ្យដឹងថា តាមរយៈ​កិច្ចប្រជុំ​ជាមួយ​ក្រសួង​ស្ថាប័ន និង​វិស័យ​ឯកជន គឺ​បាន​ជួយ​ឱ្យ​ក្រុមការងារ​របស់លោក​ទ​ទួលបាន​ធាតុ​ចូល​កាន់តែច្រើន​ធ្វើជា​មូលដ្ឋាន​នៃ​កិច្ចប្រជុំ​នា​ខែកុម្ភៈ ខាងមុខ ដែល​កិច្ចប្រជុំ​ជុំ​ទី​៣ នេះ​អាច​ក្លាយជា​កិច្ចប្រជុំ​លើកចុងក្រោយ​។​

​លោក​ឱ្យដឹងថា​៖ «​កន្លងមក​យើង​ធ្លាប់បាន​កំណត់​ជាមួយ​ភាគី​អេ​មី​រ៉ា​ត​អារ៉ាប់​រួម​ថា នឹង​ជួបប្រជុំគ្នា​លក្ខណៈ​បច្ចេកទេស​ចំនួន ៣​ ដង ដោយ​ធ្វើការ​ពិភាក្សាគ្នា​ឱ្យ​រួចរាល់ និង​នៅ​ជុំ​ទី​៤ គឺ​ឈានដល់​ការចុះហត្ថលេខា​របស់​ថ្នាក់ដឹកនាំ​ប្រទេស​ទាំង ២​ លើ​កិច្ចព្រមព្រៀង​តែម្តង​»​។​

​លោក​បន្ថែមថា នៅពេល​កិច្ចព្រមព្រៀង​ពាណិជ្ជកម្ម​ទ្វេភាគី​កម្ពុជា​អេ​មី​រ៉ា​ត អារ៉ាប់​រួម ចូល​ជា​ធរមាន វា​នឹង​ក្លាយជា​ការធ្វើ​ពិពិធ​កម្ម​ទីផ្សារ​នាំចេញ​ថ្មី​មួយទៀត​របស់​កម្ពុជា​។​

​លោក​ថ្លែងថា​៖ «​យើង​សង្ឃឹមថា កិច្ចព្រមព្រៀង​នេះ គឺជា​ការបើក​ច្រក​ថ្មី​ទៀត​សម្រាប់​ទីផ្សារ​នាំចេញ​របស់​កម្ពុជា ពិសេស​តាមរយៈ​ប្រទេស​អេ​មី​រ៉ា​ត អារ៉ាប់​រួម កសិផល​កម្ពុជា​មួយចំនួន​ក៏​អាច​បន្តទៅ​តំបន់​មជ្ឈិមបូព៌ា និង​អ្រា​ហ្វិ​ក​ផងដែរ​»​។​

​ទោះយ៉ាងណា អនុប្រធាន​ក្រុមការងារ​ចរចា​ខាងលើ បាន​ជំរុញ​ឱ្យ​ផលិតករ​នៅ​កម្ពុជា​ត្រូវខិតខំ​ពង្រឹងគុណភាព និង​អនាម័យ​ឱ្យ​កាន់តែ​ល្អប្រសើរ​បន្ថែមទៀត ព្រោះ​ដើម្បី​អាច​នាំចេញ​បាន គឺ​តែងតែ​ទាមទារ​ការពិនិត្យ​គុណ​ភាពជា​ចម្បង​។​

​បើតាម​លោក សុ​វិជាតិ មូល​ហេតុដែល​ការចរចា​លើ CAMUAE CEPA អាច​ត្រូវ​ប្រើ​រយៈពេល​ខ្លី​បើ​ធៀប​ទៅនឹង​កិច្ចព្រមព្រៀង​ពាណិជ្ជកម្ម​ដែល​កម្ពុជា​បានធ្វើ​ជាមួយ​ប្រទេស​ចិន និង​កូរ៉េ គឺ​ដោយសារតែ​ប្រទេស​អេ​មី​រ៉ា​ត អារ៉ាប់​រួម​ធ្លាប់​បានធ្វើ​កិច្ចព្រមព្រៀង​ដូចគ្នានេះ​ជាមួយ​ប្រទេសមួយ​ចំនួន​ដូចជា អ៊ីស្រា​អែល​, ឥណ្ឌូនេស៊ី និង​ឥណ្ឌា​។ តាម​គម្រោង​ភាគី​ទាំង​ ២ ចង់ឱ្យ​កិច្ចព្រមព្រៀង​នេះ​អាច​ចុះហត្ថលេខា​បាន​ក្នុង​ឆ្នាំ ២០២៣ នេះ​តែម្តង​។​

​អគ្គនាយិកា​ក្រុមហ៊ុន​ផលិត​នំ​ស្រួយ​លី​លី លោកស្រី កែវ មុំ បាន​ប្រាប់ថា ពេលនេះ​ការធ្វើ​ពាណិជ្ជកម្ម​រវាង​កម្ពុជា​ជាមួយនឹង​អេ​មី​រ៉ា​ត អារ៉ាប់​រួម នៅមានកម្រិត​តិចតួច​ប៉ុណ្ណោះ ហើយ​បើតាម​លោកស្រី​ដឹង គឺ​មិនទាន់មាន​ផលិតផល SME កម្ពុជា​ត្រូវបាន​នាំ​ចេញទៅ​ទីនោះ​ទេ ប៉ុន្តែ​អាចមាន​ផលិតផល​វាយ​ន​ភណ្ឌ​មួយចំនួន​។ កិច្ចព្រមព្រៀង​នេះ​នឹង​ជួយ​ឱ្យ​អ្នក​ផលិត​នៅក្នុង​ស្រុក​មានឱកាស​កា​ន់​តែ​ច្រើន​ក្នុង​ការនាំ​ទំនិញ​ទៅ​ប្រទេស​អេ​មី​រ៉ា​ត អារ៉ាប់​រួម​។​

​លោកស្រី​បញ្ជាក់ថា​៖ «​ការបង្កើតបាន​ទីផ្សារ​នាំចេញ​កាន់តែច្រើន គឺជា​ក្តី​ប្រាថ្នា​របស់​ម្ចាស់​អាជីវកម្ម ព្រោះ​វា​មិន​ត្រឹមតែ​ធ្វើឱ្យ​ក្រុមហ៊ុន​ក្នុងស្រុក ជាពិសេស SME រីកចម្រើន​លឿន​ប៉ុណ្ណោះ​ទេ ប៉ុន្តែ​ក៏​បង្ហាញ​ពី​កេរ្តិ៍ឈ្មោះ​ផលិតផល​កម្ពុជា​នៅលើ​ទីផ្សារ​អន្តរជាតិ​ផងដែរ​»៕