ភ្នំពេញៈ ការប្រមូលផលអំបិលអាចនឹងចាប់ផ្តើមនៅដើមខែកុម្ភៈតទៅប្រសិនបើមិនមានភ្លៀងធ្លាក់ក្នុងរយៈពេលប៉ុន្មានថ្ងៃខាងមុខ ខណៈកាលពីឆ្នាំមុន ២០២២ កម្ពុជាបាននាំចូលអំបិលពីក្រៅប្រទេសប្រហែល ២ ម៉ឺនតោនមកបំពេញតម្រូវការក្នុងស្រុក។ នេះបើយោងតាមអ្នកនៅក្នុងវិស័យផលិតកម្មអំបិលកម្ពុជា។
កត្តាអាកាសធាតុដែលមានភ្លៀងធ្លាក់នៅក្នុងអំឡុងខែប្រាំង (រដូវប្រមូលផលអំបិល) បានបង្ខំឱ្យប្រទេសកម្ពុជានាំចូលអំបិលប្រមាណ ១ ម៉ឺនតោន ក្នុងឆ្នាំ ២០២០ និង ១ ម៉ឺនតោនឆ្នាំ ២០២១ ប៉ុន្តែក្នុងឆ្នាំ ២០២២ ដោយសារមានភ្លៀងធ្លាក់ច្រើនការនាំចូល (ពីប្រទេសឥណ្ឌា) បានកើនដល់ប្រហែល ២ ម៉ឺនតោន។ ខេត្តកំពត និងកែប គឺជាទីតាំងផលិតអំបិលសម្រាប់ប្រើប្រាស់ក្នុងស្រុក។ ជាមធ្យមក្នុង ១ ឆ្នាំ កម្ពុជាត្រូវការអំបិលចន្លោះពី ៧១០ ម៉ឺនតោនមកបំពេញតម្រូវការប្រើប្រាស់។
ថ្លែងប្រាប់ ភ្នំពេញ ប៉ុស្តិ៍ ក្នុងថ្ងៃទី ៣០ ខែមករា លោក សុខ គឹមជឿន ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពត បានប្រាប់ថា ការប្រមូលផលអំបិលនៅតាមស្រែក្នុងខេត្តកំពតអាចនឹងចាប់ផ្តើមនៅចុងសប្តាហ៍ទី ១ នៃខែកុម្ភៈ ប៉ុន្តែប្រសិនបើមានភ្លៀងធ្លាក់ច្រើនការប្រមូលផលនឹងត្រូវអូសបន្លាយពេលទៀត។ អំបិលកម្ពុជា ជាអំបិលធម្មជាតិ ដូច្នេះវាត្រូវពឹងផ្អែកយ៉ាងខ្លាំងលើអាកាសធាតុ បើអាកាសធាតុក្តៅ និងមិនមានភ្លៀងធ្លាក់រយៈពេល ៣ ខែជាប់គ្នា គឺផលអំបិលអាចកើនដល់ជាង ១០ ម៉ឺនតោនដែលគ្រប់គ្រាន់សម្រាប់តម្រូវការក្នុងស្រុក និងសល់នៅក្នុងឃ្លាំងស្តុកទៀតផង។
លោកថ្លែងថា៖ «កាលពីដើមឆ្នាំ ២០២៣ យើងរំពឹងថា នឹងអាចប្រមូលផលអំបិលបាននៅចុងខែមករានេះ ប៉ុន្តែដោយសារខេត្តកំពតមានភ្លៀងធ្លាក់ខ្លាំងកាលពីអំឡុងថ្ងៃទី ១០ ខែមករា វាធ្វើឱ្យផែនការប្រមូលផលត្រូវពន្យារទៅចុងសប្តាហ៍ទី ១ ខែកុម្ភៈវិញ។ បើក្នុងករណីរយៈពេល ៤៥ ថ្ងៃនេះមានភ្លៀងធ្លាក់ខ្លាំង កសិករនឹងត្រូវការពេលបន្ថែមយ៉ាងតិចជាង ១០ ថ្ងៃលើសពីនោះ»។
លោក ប៊ុន ណារិន កសិករ និងជាម្ចាស់សិប្បកម្មផលិតអំបិល ថូង អ៊ីនធ័រប្រាយស៍ នៅក្នុងខេត្តកំពត បាននិយាយថា ភាពយឺតយ៉ាវការប្រមូលផលបានធ្វើឱ្យតម្លៃអំបិលនាពេលនេះខ្ពស់ជាងឆ្នាំមុនបន្តិចបន្តួច (៥១០ភាគរយ) ដោយនៅតាមស្រែក្នុងពេលនេះ គឺអំបិលមានតម្លៃចន្លោះពី ២៥ ០០០-២៨ ០០០ រៀលក្នុង ១ បាវទម្ងន់ ៥០ គីឡូក្រាម។ ការប្រមូលផលអាចនឹងចាប់ផ្តើមពីដើមខែកុម្ភៈ ខណៈនៅពេលនេះសកម្មភាពនៃការបង្ហូរទឹកចូលស្រែកំពុងប្រព្រឹត្តទៅយ៉ាងសកម្ម។
លោកបញ្ជាក់ថា៖ «ដោយសារអំបិលនៅកម្ពុជាអាស្រ័យលើអាកាសធាតុ ដូច្នេះគេមិនទាន់អាចនិយាយថា ឆ្នាំនេះផលប្រមូលបាននឹងទៅជាបែបណានោះទេ»។
លោក ប៊ុន បារាំង ម្ចាស់ក្រុមហ៊ុននាំចូលអំបិលពីប្រទេសឥណ្ឌា បានប្រាប់ ភ្នំពេញ ប៉ុស្តិ៍ កាលពីចុងខែធ្នូ ឆ្នាំ២០២២ ថា ការនាំអំបិលពីប្រទេសឥណ្ឌាមកបំពេញតម្រូវការក្នុងស្រុកបានផ្អាកតាំងពីចុងខែវិច្ឆិកា គឺបន្ទាប់ពីក្រុមហ៊ុននាំចូលសរុបបានជាង ២ ម៉ឺនតោន ខណៈរដ្ឋាភិបាលអនុញ្ញាតរហូតដល់ ៦ ម៉ឺនតោន។
ខេត្តកំពត និងខេត្តកែប គឺជាទីតាំងផលិតអំបិលនៅកម្ពុជា ដោយក្នុងឆ្នាំ ២០២២ ផ្ទៃដីធ្វើស្រែអំបិលក្នុងខេត្តទាំង ២ មានចំនួន ៤ ៧៤៨ ហិកតា។ ទំហំផ្ទៃដីនេះ គឺនៅដដែលបើធៀបនឹងឆ្នាំ ២០២១។ នេះបើតាមក្រសួងឧស្សាហកម្ម។
ធម្មតារដូវកាលផលិតអំបិល គឺចាប់ពីចុងខែធ្នូដល់ពាក់កណ្តាលខែឧសភានៃឆ្នាំនីមួយៗ ប៉ុន្តែឆ្នាំខ្លះអាកាសធាតុក្តៅនឹងអូសបន្លាយយូរ ការផលិតអាចដល់ខែមិថុនា។ បើអាកាសធាតុអំណោយ ដី ១ ហិកតាអាចផលិតអំបិលបានមធ្យម ២០ តោនក្នុងរយៈពេល ១ ឆ្នាំ៕