.jpg)
ហោះហើរ AIR CHINA។ រូបថត AIR CHINA
ភ្នំពេញៈ កម្ពុជានឹងធ្វើពិធីស្វាគមន៍ភ្ញៀវទេសចរចិនលើកដំបូងតាមជើងហោះហើរ AIR CHINA នៅព្រលានយន្តហោះអន្តរជាតិភ្នំពេញនាព្រឹកថ្ងៃនេះ ខណៈក្រសួងទេសចរណ៍ និងផ្នែកឯកជនសង្ឃឹមថា នឹងមានភ្ញៀវទេសចរចិនចន្លោះពី ១ លានទៅ ១,៥ លាននាក់ធ្វើដំណើរមកកម្ពុជាក្នុងឆ្នាំ ២០២៣។
ពិធីស្វាគមន៍ភ្ញៀវទេសចរចិនលើកដំបូងតាមជើងហោះហើរ AIR CHINA (CA745) នេះនឹងធ្វើនៅព្រឹកថ្ងៃទី ៧ ខែកុម្ភៈ វេលាម៉ោង ៨:៣០ នាទី ដោយមានការចូលរួមពីលោក ថោង ខុន រដ្ឋមន្ត្រីក្រសួងទេសចរណ៍ លោក ម៉ៅ ហាវណ្ណាល់ រដ្ឋមន្ត្រីនៃរដ្ឋលេខាធិការដ្ឋានអាកាសចរស៊ីវិល និងលោកឃួង ស្រេង អភិបាលរាជធានីភ្នំពេញ។
ដំណើរមកដល់របស់ AIR CHINA ធ្វើឡើងបន្ទាប់ពីក្រសួងទេសចរណ៍ និងវប្បធម៌ប្រទេសចិន កាលពីថ្ងៃទី ២០ ខែមករា បានប្រកាសថា ប្រទេសចិននឹងចាប់ផ្តើមបើកឱ្យមានការធ្វើដំណើរទស្សនាឡើងវិញទៅកាន់ប្រទេសត្រូវបានជ្រើសរើស។ កម្មវិធីសាកល្បងនេះបានចាប់ផ្តើមពីថ្ងៃទី ៦ ខែកុម្ភៈ ដើម្បីអនុញ្ញាតឱ្យក្រុមហ៊ុន និងភ្នាក់ងារទេសចរណ៍អាចបើកដំណើរការទេសចរណ៍ក្រៅស្រុកទៅកាន់ប្រទេសចំនួន ២០ មានដូចជា កម្ពុជា ថៃ ឥណ្ឌូនេស៊ី ម៉ាល់ឌីវ ស្រីលង្កា ហ្វីលីពីន ម៉ាឡេស៊ី សិង្ហបុរី ឡាវ អារ៉ាប់រួម អេហ្ស៊ីប កេនយ៉ា ស្វ៊ីស គុយបា ហុងគ្រី អាហ្រ្វិកខាងត្បូង ហ្វីជី នូវែលសេឡង់ និងអាហ្សង់ទីន។
អ្នកនាំពាក្យក្រសួងទេសចរណ៍ លោក តុប សុភ័ក បានប្រាប់ ភ្នំពេញ ប៉ុស្តិ៍ នាថ្ងៃទី ៦ ខែកុម្ភៈថា ទេសចរចិន គឺជាទីផ្សារដ៏ធំសម្រាប់ទេសចរណ៍ពិភពលោក ខណៈរដ្ឋាភិបាលកម្ពុជាក៏បានកំណត់គោលដៅក្នុងការទាក់ទាញភ្ញៀវចិនមកកម្សាន្តឱ្យបានច្រើន តាមរយៈការរៀបចំសៀវភៅស «China ready» និងយុទ្ធសាស្ត្រថ្មីៗជាច្រើន។ មានកិច្ចការជាច្រើនដែលក្រសួងបានធ្វើដើម្បីត្រៀមទទួលភ្ញៀវចិន ដោយមួយចំនួនបានធ្វើតាំងពីមុនពេលមានវត្តមានជំងឺកូវីដ ១៩ មកម្ល៉េះ។ លោកបន្តថា កម្ពុជារំពឹងទទួលបានភ្ញៀវទេសចរបរទេសមកកម្សាន្តច្រើនចាប់ពីពេលនេះតទៅ។
លោកថ្លែងថា៖ «កម្ពុជាត្រៀមខ្លួនរួចជាស្រេចដើម្បីទទួលភ្ញៀវទេសចរចិន ពិសេសចាប់ពីឆ្នាំ ២០២៣ នេះតទៅ ដោយយើងហៅថា ឆ្នាំទស្សនាកម្ពុជា ព្រោះនៅកម្ពុជានឹងមានរៀបចំព្រឹត្តិការណ៍ធំៗជាច្រើនដូចជា អង្គរសង្ក្រាន្ត បុណ្យទន្លេ និងព្រឹត្តិការណ៍កីឡាថ្នាក់តំបន់ស៊ីហ្គេម និងប៉ារ៉ាហ្គេម ជាដើម»។
តាមរយៈការត្រៀមខ្លួនរបស់អាជ្ញាធរ និងផ្នែកឯកជន កម្ពុជារំពឹងអាចទទួលបានទេសចរបរទេសជាង ៤ លាននាក់ក្នុងឆ្នាំ ២០២៣ នេះ ខណៈភ្ញៀវចិននឹងអាចមានចំនួនលើសពី ១ លាននាក់។ នេះបើតាមក្រសួងទេសចរណ៍។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បាននិយាយថា ទោះបីវិបត្តិកូវីដ ១៩ ក្នុងរយៈពេលជិត ៣ ឆ្នាំកន្លងមកធ្វើឱ្យអ្នកក្នុងវិស័យទេសចរណ៍មួយចំនួនងាកចេញទៅប្រកបមុខរបរផ្សេង ក៏វានឹងមិនមានបញ្ហាសម្រាប់ការទទួលភ្ញៀវទេសចរបរទេសដែលនឹងមកកម្សាន្តនៅកម្ពុជាឡើយ។ លោកបន្តថា ដោយសារភ្ញៀវចិនមានចំនួនច្រើន ដូច្នេះគ្រប់ប្រទេសតែងចង់ឱ្យភ្ញៀវចិនឱ្យទៅកម្សាន្ត។ ភ្ញៀវទេសចរជនជាតិចិនចូលចិត្តដើរកម្សាន្តជាងគេនៅតំបន់ប្រាសាទ ខេត្តសៀមរាប ភ្នំពេញ និងខេត្តព្រះសីហនុ។
លោកលើកឡើងថា៖ «យើងត្រៀមខ្លួនហើយសម្រាប់ទទួលភ្ញៀវទេសចរបរទេសគ្រប់ជាតិសាសន៍ ពិសេសជនជាតិចិនដែលរំពឹងថានឹងមានចំនួនច្រើនចាប់ពីពេលនេះតទៅ»។ លោកបន្ថែមថា៖ «ជាង ៨០ ភាគរយនៃភ្ញៀវទេសចរចិន គឺធ្វើដំណើរត្រង់មកកម្ពុជា ដោយមិនមែនបន្តដំណើរពីការកម្សាន្តនៅប្រទេសណាមួយទេ»។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បាននិយាយថា ចំនួនភ្ញៀវទេសចរចិនដែលធ្វើដំណើរមកកម្ពុជាបានចាប់ផ្តើមមានជាបណ្តើរៗហើយក្នុងរយៈពេលប៉ុន្មានថ្ងៃមកនេះ ដោយខាងក្រសួង និងផ្នែកឯកជនក៏ធ្លាប់ធ្វើពិធីទទួលស្វាគមន៍ភ្ញៀវទេសចរមកពីប្រទេសចិនផងដែរ។ ការត្រឡប់មកវិញរបស់ភ្ញៀវចិន គឺជាក្តីសង្ឃឹមសម្រាប់វិស័យទេសចរណ៍កម្ពុជា ក៏ដូចជាកំណើនសេដ្ឋកិច្ចជាតិ ព្រោះក្នុងអំឡុងមុនមានវិបត្តិជំងឺកូវីដ ១៩ (ឆ្នាំ ២០១៩) ភ្ញៀវចិនបានកើនឡើងយ៉ាងច្រើនរហូតដល់ជាង ២ លាននាក់។
លោកស្រីនិយាយថា៖ «ប៉ូលទេសចរណ៍វប្បធម៌ខេត្តសៀមរាប និងតំបន់ឆ្នេរសមុទ្រនឹងនៅតែជាកន្លែងដែលមានភាពទាក់ទាញសម្រាប់ភ្ញៀវទេសចរចិន។ ទោះយ៉ាងណាក្នុងខ្សែទស្សនកិច្ច គឺយើងតែងតែដាក់បញ្ចូលតំបន់ផ្សេងៗទៀត រួមទាំងផលិតផលទេសចរណ៍ផងដែរ»។
កាលពីថ្ងៃទី ២៧ ខែមករា នៅអាកាសយានដ្ឋានអន្តរជាតិកងកេង ខេត្តព្រះសីហនុ ក៏បានទទួលជើងហោះហើរលើកដំបូងមកពីប្រទេសចិនបន្ទាប់ពីរដ្ឋាភិបាលចិនអនុញ្ញាតឱ្យប្រជាជនចេញក្រៅប្រទេសឡើងវិញ ជាមួយវត្តមានភ្ញៀវទេសចរ ១០៤ នាក់ និងក្រុមអ្នកបម្រើការលើយន្តហោះ ៦ នាក់៕
