.jpg)
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ធ្វើសន្និសីទសារព័ត៌មាន កាលពីថ្ងៃទី ៧ ខែកុម្ភៈ។ រូបថត ABC
ភ្នំពេញៈ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជានឹងរៀបចំផែនការរបស់ខ្លួន ដើម្បីចូលរួមជាមួយរដ្ឋាភិបាល ប្រយុទ្ធប្រឆាំងនឹងអ្នកផ្ដល់កម្ចីក្រៅផ្លូវការ ក្រោយពីមានសកម្មភាពផ្សព្វផ្សាយ និងផ្តល់សេវាហិរញ្ញវត្ថុក្រៅផ្លូវការ ជាពិសេសសេវាឥណទាន តាមរយៈទូរស័ព្ទ បណ្តាញសង្គមនានា និងអនឡាញ យ៉ាងអនាធិបតេយ្យដោយគ្មានច្បាប់អនុញ្ញាត។
នៅក្នុងសន្និសីទសារព័ត៌មានស្តីពី ស្ថានភាពវិស័យធនាគារ និងហិរញ្ញវត្ថុ និងវិធានការបុរេសកម្មឆ្លើយតបទៅនឹងការផ្ដល់សេវាហិរញ្ញវត្ថុក្រៅផ្លូវការ កាលពីថ្ងៃទី ៧ ខែកុម្ភៈ លោក រ័ត្ន សោភ័ណ អនុប្រធានសមាគមធនាគារនៅកម្ពុជា បានលើកឡើងថា កន្លងទៅ មានសកម្មភាពផ្សព្វផ្សាយ និងផ្តល់សេវាហិរញ្ញវត្ថុក្រៅផ្លូវការ ជាពិសេសសេវាឥណទាន តាមរយៈទូរស័ព្ទ បណ្តាញសង្គមនានា និងអនឡាញ។ សកម្មភាពនេះបានបង្កផលវិបាកជាច្រើនមកលើសេដ្ឋកិច្ច និងសង្គមតាមរយៈ ការយកអត្រាការប្រាក់ខ្ពស់ហួសហេតុ ការគំរាមកំហែងបំភិតបំភ័យ ការអនុវត្តកិច្ចសន្យាមិនសុចរិត ដោយបង្កប់នូវការកេងចំណេញហួសហេតុពីអ្នកខ្ចីប្រាក់ ដែលបណ្តាលឱ្យប៉ះពាល់ដល់ជីវភាពរស់នៅ របស់ពលរដ្ឋ និងធ្វើឱ្យធ្លាក់ក្នុងបំណុលច្រើនលើសលប់។
លោក សោភ័ណ បន្ថែមថា ការផ្តល់ឥណទានដោយគ្មានអាជ្ញាប័ណ្ណត្រឹមត្រូវ វានាំឱ្យកើតមានបញ្ហាសង្គមច្រើន ដោយខាងសមាគមពិបាកក្នុងការក្តាប់ព័ត៌មាន ដែលការណ៍នេះ បានជះឥទ្ធិពលដល់ស្ថិរភាពហិរញ្ញវត្ថុ ជំនឿទុកចិត្តរបស់សាធារណជន បរិយាប័ន្នហិរញ្ញវត្ថុ និងការរីកចម្រើននៃវិស័យធនាគារ នៅកម្ពុជាទាំងមូល។ «នៅក្នុងឆ្នាំ ២០២៣ នេះសមាគមទាំង ២ មានផែនការរៀបចំឱ្យមានការអប់រំបណ្តុះបណ្តាលចំណេះដឹងទូទៅ ទាក់ទិនទៅនឹងថា តើមានស្ថាប័នហិរញ្ញវត្ថុណាខ្លះ ដែលស្របច្បាប់ និងស្ថាប័នណា ដែលមិនស្របច្បាប់ ដល់ពលរដ្ឋនៅតាមសហគមន៍ ដើម្បីឱ្យពួកគាត់បានយល់ដឹងកាន់តែច្បាស់មុននឹងសម្រេចចិត្តខ្ចីប្រាក់ពីស្ថាប័ននោះ»។
លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ក៏បានឱ្យដឹងដែរថា សមាគមនឹងចាប់ផ្តើមបញ្ជ្រាបការយល់ដឹងទាក់ទងទៅនឹងការបញ្ចៀសការទទួលបានឥណទានពីស្ថាប័នក្រៅផ្លូវការ ដល់អាជ្ញាធរនៅតាមសហគមន៍ ដើម្បីឱ្យពួកគាត់ផ្សព្វផ្សាយ និងអប់រំបន្តដល់ប្រជាពលរដ្ឋនៅក្នុងតំបន់នោះ។
លោកបន្តថា នៅក្នុងការអនុវត្តបន្តបន្ទាប់ទៀត សមាគមមីក្រូហិរញ្ញវត្ថុកម្ពុជានឹងរៀបចំជាបញ្ជីឈ្មោះស្ថាប័ន ដែលមានអាជ្ញាប័ណ្ណត្រឹមត្រូវពីធនាគារជាតិ ហើយចែកជូនទៅសហគមន៍នីមួយៗ ដើម្បីឱ្យពួកគាត់អាចទទួលបានព័ត៌មានច្បាស់លាស់ មុននឹងសម្រេចចិត្តទទួលយកកម្ចីពីស្ថាប័នទាំងនោះ។
លោក សុខ វឿន បញ្ជាក់ដូច្នេះថា៖ «ការផ្តល់សេវាឥណទាន តាមរយៈអនឡាញនេះ មានទាំងគុណសម្បត្តិ និងគុណវិបត្តិ ដោយវាជាការប្រសើរ បើសិនជាស្ថាប័នដែលផ្តល់កម្ចីនោះជាស្ថាប័នមានច្បាប់ត្រឹមត្រូវ តែវានឹងមានហានិភ័យ បើសិនជាស្ថាប័ននោះ មិនមានច្បាប់អនុញ្ញាតត្រឹមត្រូវពីធនាគារជាតិ។ អ្វីដែលយើងមើលឃើញនាពេលបច្ចុប្បន្ននេះ ការផ្តល់សេវាតាមប្រព័ន្ធអនឡាញ ស្ទើរទាំងអស់ គឺមិនមានអាជ្ញាប័ណ្ណពីធនាគារជាតិទេ។ ដូច្នេះហើយ ការផ្តល់កម្ចីតាមអនឡាញសព្វថ្ងៃ គឺរងផលប៉ះពាល់ខ្លាំង ដល់កេរ្តិ៍ឈ្មោះនៃវិស័យមីក្រូហិរញ្ញវត្ថុ »។
បើតាមសមាគមធនាគារនៅកម្ពុជា នៅឆ្នាំ ២០២២ នេះ ប្រព័ន្ធធនាគារកម្ពុជាសម្រេចបានលទ្ធផលល្អ និងបានរួមចំណែកយ៉ាងសំខាន់ ក្នុងការរក្សាស្ថិរភាពម៉ាក្រូសេដ្ឋកិច្ច និងគាំទ្រកំណើនសេដ្ឋកិច្ច ដែលត្រូវបានប៉ាន់ស្មានថា ងើបឡើងវិញ ក្នុងអត្រា ៥,១%។ អត្រាប្តូរប្រាក់រៀល ធៀបនឹងដុល្លារអាមេរិកត្រូវបានរក្សាឱ្យមានស្ថិរភាពក្នុងរង្វង់ ៤ ១០២ រៀល ក្នុង ១ ដុល្លារអាមេរិក ហើយអត្រាអតិផរណាប្រចាំឆ្នាំ ២០២២ មានកម្រិត ៥,៥%។
បច្ចុប្បន្ននេះ ប្រព័ន្ធធនាគារកម្ពុជាមានធនាគារពាណិជ្ជ ៦០, ធនាគារឯកទេស ៩, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៥, គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨២, គ្រឹះស្ថានឥណទានជនបទ ២២៤, គ្រឹះស្ថានភតិសន្យាហិរញ្ញវត្ថុ ១៦, អ្នកដំណើរការតតិយភាគី ៥, គ្រឹះស្ថានផ្តល់ សេវាទូទាត់សងប្រាក់ ៣៤, អ្នកផ្តល់សេវាប្រព័ន្ធចែករំលែកព័ត៌មានឥណទាន ១, ការិយាល័យតំណាងធនាគារបរទេស ៦ និងអាជីវកម្មប្ដូរប្រាក់ ២ ៨៦៩៕
