.jpg)
ទិដ្ឋភាពនៅរោងចក្រកាត់ដេរសម្លៀកបំពាក់ ១ កន្លែង ក្នុងតំបន់សេដ្ឋកិច្ចពិសេស។ រូបថត ហុង មិនា
ភ្នំពេញៈ ការនាំចេញទំនិញពីប្រទេសកម្ពុជាទៅកាន់ទីផ្សារសហភាពអឺរ៉ុប (EU) បានកើនឡើងគួរឱ្យកត់សម្គាល់កាលពីឆ្នាំ ២០២២ ដោយមានទឹកប្រាក់ជាង ៤ ពាន់លានដុល្លារ កើនជាង ១/៤ ភាគរយបើធៀបនឹងឆ្នាំ ២០២១ ខណៈទំហំពាណិជ្ជកម្មរវាងទ្វេភាគីទាំង ២ មានចំនួនសរុបជាង ៤,៨ ពាន់លានដុល្លារ កើនឡើងជិត ១៦ ភាគរយ។ នេះបើយោងតាមក្រសួងពាណិជ្ជកម្ម។
ទិន្នន័យក្នុងរបាយការណ៍បូកសរុបលទ្ធផលការងារឆ្នាំ ២០២២ របស់ក្រសួងពាណិជ្ជកម្ម បានបង្ហាញថា ក្នុងឆ្នាំ ២០២២ ការផ្លាស់ប្តូរពាណិជ្ជកម្មរវាងកម្ពុជា ជាមួយសហភាពអឺរ៉ុប មានទឹកប្រាក់សរុប ៤ ៨៥៧ លានដុល្លារ កើន ១៥,៩២ ភាគរយបើធៀបឆ្នាំ ២០២១ ដែលមានចំនួន ៤ ១៩០ លានដុល្លារ។ ផ្អែកតាមតួលេខខាងលើ គឺទំនិញដែលកម្ពុជានាំទៅទីផ្សារសហភាពអឺរ៉ុប មានចំនួន ៤ ០៤៥ លានដុល្លារ កើនឡើង ២៥,២៧ ភាគរយពីចំនួន ៣ ២២៩ លានដុល្លារ និងទំនិញនាំពីសហភាពអឺរ៉ុបមកកម្ពុជាមាន ៨១២ លានដុល្លារ ធ្លាក់ចុះ ១៥,៥ ភាគរយពីចំនួន ៩៦១ លានដុល្លារ។
ក្រសួងពាណិជ្ជកម្ម ឱ្យដឹងទៀតថា សម្រាប់ប្រទេសសមាជិកសហភាពអឺរ៉ុប ដែលទិញទំនិញពីកម្ពុជាច្រើន ក្នុងឆ្នាំ ២០២២ រួមមាន អាល្លឺម៉ង់ ចំនួន ១ ០៨៤ លានដុល្លារ កើន ២៣ ភាគរយ, បែលហ្ស៊ិក ៦៤២ លានដុល្លារ កើន ២៦ ភាគរយ, ហូឡង់ ៥៥៣ លានដុល្លារ កើន ២៥ ភាគរយ និងបារាំង ៤២៣ លានដុល្លារ កើនឡើង ២៨ ភាគរយ។ សម្រាប់ពាណិជ្ជកម្មទ្វេភាគី គឺអាល្លឺម៉ង់ មានចំនួន ១ ២៤៧ លានដុល្លារ កើន ១៩,៣៣ ភាគរយ , បែលហ្ស៊ិក ៧៣២ លានដុល្លារ កើន ៣២,៣៦ ភាគរយ, ហូឡង់ ៥៩៧ លានដុល្លារ កើន ២៧,០២ ភាគរយ និងប្រទេសបារាំង ៥៤២ លានដុល្លារ កើនឡើង ២៥,៧៥ ភាគរយ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានឱ្យដឹងក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ ២០២២ និងទិសដៅអនុវត្តន៍ការងារឆ្នាំ ២០០៣ កាលពីថ្ងៃទី ៣០ ខែមករា ឆ្នាំ ២០២៣ ថា តាមរយៈទិសដៅការងារដែលបានដាក់ចេញកាលពីដើមឆ្នាំ ២០២២ ក្រសួងពាណិជ្ជកម្ម បានប្តេជ្ញាចិត្តខ្ពស់ក្នុងការជំរុញកំណើនវិស័យពាណិជ្ជកម្ម ដោយបានកែប្រែបញ្ហាប្រឈមឱ្យទៅជាឱកាសតាមរយៈការធ្វើកំណែទម្រង់ស៊ីជម្រៅលើគ្រប់ផ្នែក ការកាត់បន្ថយចំណាយ និងការពង្រឹងភាពប្រកួតប្រជែងនៃទំនិញនាំចេញពីកម្ពុជាទៅទីផ្សារអន្តរជាតិ និងបានបង្កលក្ខណៈងាយស្រួល និងបង្កើតបរិយាកាសអំណោយផលដល់ការធ្វើធុរកិច្ច និងការវិនិយោគនៅក្នុងប្រទេសកម្ពុជា។
លោកថ្លែងថា៖ «ក្រសួងបានចូលរួមជំរុញឱ្យមានកំណើនការនាំចេញ តាមរយៈការប្រើប្រាស់ទីផ្សារអនុគ្រោះដែលមានស្រាប់ និងការធ្វើពិពិធកម្មទីផ្សារបន្ថែមដូចជា ការចរចាបង្កើតតំបន់ពាណិជ្ជកម្មសេរីទ្វេភាគី និងពហុភាគីជាមួយដៃគូពាណិជ្ជកម្មនានា»។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍នៅថ្ងៃទី ៧ ខែកុម្ភៈថា ការផ្តល់ឱ្យរបស់សហភាពអឺរ៉ុបនូវគម្រោងគ្រប់យ៉ាងលើកលែងតែសព្វាវុធ (EBA) ចំពោះទំនិញផលិតនៅកម្ពុជា គឺបានចូលរួមចំណែកយ៉ាងច្រើនក្នុងការជំរុញការនាំចេញទៅទីផ្សារអឺរ៉ុប (នាំចូល EU ដោយមិនជាប់ពន្ធគយ)។
ទោះពេលនេះ EU បានដកចេញផ្នែកខ្លះនៃប្រព័ន្ធ EBA ពីកម្ពុជា ក៏ការនាំទៅកាន់ទីនោះនៅតែរក្សាបាននូវសញ្ញាវិជ្ជមានដដែល ពិសេសផលិតផលកាត់ដេរ ស្បែកជើង កាបូប និងកង់។ លោកបន្តថា កំណើនសេដ្ឋកិច្ចកម្ពុជាក្នុងរយៈពេលជាង ២ ទសវត្សរ៍មកនេះ គឺមិនអាចកាត់ផ្តាច់ពីការចូលរួមគាំទ្រយ៉ាងសកម្មរបស់ទីផ្សារសហភាពអឺរ៉ុបបានឡើយ។
លោកថ្លែងថា៖ «បច្ចុប្បន្នប្រព័ន្ធ EBA កំពុងដើរតួនាទីសំខាន់សម្រាប់ការនាំចេញទំនិញកម្ពុជាទៅទីផ្សារសហភាពអឺរ៉ុប។ ទឹកប្រាក់នាំចេញរបស់កម្ពុជាទៅទីនោះនឹងបន្តកើនឡើងថែមទៀត»។
លោកបន្ថែមទៀតថា៖ «សម្រាប់ពេលអនាគត ទោះជា EBA ត្រូវបាត់បង់ទាំងស្រុង ក៏ខ្ញុំមានសុទិដ្ឋិនិយមថា សហភាពអឺរ៉ុបនឹងនៅតែជាទីផ្សារដ៏សំខាន់របស់កម្ពុជា ព្រោះផលិតផលកម្ពុជាទទួលបានការគាំទ្រផ្នែកគុណភាពរួចទៅហើយនាពេលនេះ»។
លោក Anthony Galliano អគ្គនាយក Cambodia Investment Management Co Ltd ធ្លាប់និយាយថា EU គឺជាដៃគូពាណិជ្ជកម្មធំរបស់កម្ពុជា ខណៈការនាំទំនិញកម្ពុជាទៅទីនោះនឹងបន្តកើនឡើងទៀត៕
